Askim
Wanem insait bilong tok bilong Pol, em i tok: “Olgeta taim yupela i kaikai dispela bret na dring long dispela kap”?
Pol i toktok long Memorial bilong tingim indai bilong Jisas, em i tok: “Olgeta taim yupela i kaikai dispela bret na dring long dispela kap, yupela i save tokaut long pen na i dai bilong Bikpela, inap long taim em i kam bek.” (1 Korin 11:25, 26) Sampela i ting dispela tok “olgeta taim” i makim olsem yumi mas mekim ol samting bilong tingim indai bilong Krais long olgeta taim, olsem planti taim. Olsem na ol i save mekim planti taim insait long wanpela yia. Tasol yu ting Pol i tingim olsem?
Nau em klostu 2,000 yia bihain long taim Jisas i kirapim Memorial bilong tingim indai bilong em. Olsem na taim yumi mekim Memorial wanpela taim long yia, dispela i makim olsem yumi bin mekim planti taim pinis kirap long yia 33 C.E. Tasol long ol tok klostu long 1 Korin 11:25, 26, Pol i no toktok long hamas taim yumi mas mekim Memorial; em i toktok long yumi mas mekim olsem wanem. Long tok Grik bilong bipo, Pol i no kolim dispela tok pol·laʹkis, insait bilong en i olsem “planti taim,” nogat. Em i kolim dispela tok ho·saʹkis, em i olsem “olgeta taim,” o ‘long wanem wanem taim,’ o ‘long olgeta taim.’ Pol i tok olsem: ‘Olgeta taim yupela i mekim olsem, yupela i save tokaut long pen na indai bilong Bikpela.’a
Orait hamas taim yumi mas mekim Memorial bilong tingim indai bilong Jisas? I stret yumi mas mekim wanpela taim tasol long yia. Em i de tru tru bilong tingim bek samting i bin kamap long dispela de long bipo, na de bilong tingim dispela samting, yumi save mekim wanpela taim tasol long olgeta yia. Na tu, Jisas i dai long de Pasova bilong ol Juda, em i save kamap wanpela taim tasol long yia. I stret Pol i tok long Jisas olsem, ‘Krais em i olsem sipsip yumi ofaim long Bikpela De Bilong Tingim De God I Larim Ol Israel I Stap Gut,’ long wanem, indai bilong Jisas i opim rot long ol Israel bilong spirit long kisim laip oltaim, olsem ofa bilong namba wan Pasova i bin helpim ol namba wan pikinini man bilong ol Israel bilong skin long Isip na ol i no dai, na em i opim rot long ol i lusim kalabus. (1 Korin 5:7; Galesia 6:16) Ol samting bilong de Pasova bilong ol Juda i save kamap wanpela taim long olgeta yia em i kamapim klia narapela as na Memorial bilong tingim indai bilong Jisas i mas kamap wanpela taim tasol long yia.
Na tu, Pol i bungim indai bilong Jisas wantaim narapela bikpela de bilong ol Juda i save kamap wanpela taim long yia, em Bikpela De Bilong Tekewe Sin Bilong Ol Manmeri. Long Hibru 9:25, 26, Pol i tok: “Long olgeta yia [long Bikpela De Bilong Tekewe Sin Bilong Ol Manmeri] hetpris i save kisim blut bilong ofa, na em i go insait long Rum Tambu Tru. Na dispela blut em i kisim, em i no blut bilong em yet. Tasol Jisas i no mekim olsem. Em i go long heven bilong givim em yet long God olsem ofa. . . . Nau em i klostu long taim bilong las de, na Krais i kamap long graun wanpela taim tasol, bilong givim em yet long God olsem ofa bilong rausim ol sin.” Ofa bilong Jisas i senisim Bikpela De Bilong Tekewe Sin Bilong Ol Manmeri, olsem na i stret yumi save mekim Memorial bilong tingim indai bilong Jisas long olgeta yia. I no gat wanpela tok bilong Baibel i makim olsem yumi mas mekim Memorial planti taim long yia.
Tok bilong saveman John Laurence von Mosheim i stret wantaim dispela, em i tok, ol Kristen i bin stap long yia 100 samting long Esia Maina ol i save mekim Memorial bilong tingim indai bilong Jisas “long namba 14 de bilong namba wan mun [Nisan] bilong ol Juda.” Inap sampela yia bihain na em i kamap pasin bilong Kristendom long mekim planti taim insait long wanpela yia.
[Futnot]
a Skelim wantaim tok bilong 1 Samuel 1:3, 7. Long hia, dispela tok “olgeta taim” (long tok Hibru bilong nau) em i makim ol bikpela de samting ol i save mekim long olgeta yia, o wanpela taim long olgeta yia, em taim Elkana na tupela meri bilong em ol i save go long haus lotu long Silo.