“Yu Tok Stret, Laip i Gutpela Samting Tru!”

YU LAIK save long wanem as tru bilong i stap bilong yumi? Magdalena i gat 18 krismas, em wanpela Witnes Bilong Jehova long Szczecin, Polan, i helpim wanklas bilong em long haiskul em Katarzyna, long mekim olsem. Katarzyna i no save bilip long God, tasol taim Magdalena i stori long em long Baibel, em i laikim tru.

Maski Katarzyna i laikim tok bilong Baibel Magdalena i toktok wantaim em long en, em i no bilipim olgeta. Taim Katarzyna i toktok wantaim Magdalena long ol pren tru, wanpela taim em i tok: “Yu gat Baibel; yu save long wanem ol stiatok bilong bihainim na long wanem hap bai yu painim ol pren. Tasol olsem wanem long ol man, olsem long nau, em ol i no laikim ol dispela stiatok?”

Wanpela senis i kamap taim em i go raun long London, Inglan. Em i raun lukim brens-ofis bilong ol Witnes Bilong Jehova long hap, na em i pilim tru gutpela pasin ol i mekim long em. Ol liklik samting ol i mekim, olsem opim dua long em na ol i amamas tru long harim ol tok em i mekim, em i laikim dispela pasin.

Taim nupela yia bilong skul i kirap long Septemba 2001, Katarzyna i orait long stadi long Baibel long olgeta wik. Em i strongim pasin bilong em long laikim ol stiatok bilong Baibel na em i kirap mekim wok long en long i stap bilong em. I no longtaim i go pinis na em i tokim Magdalena: “Mi pilim olsem nau mi kirap long kisim nupela sindaun.” Na tu, em i ring long Magdalena na salim liklik toksave olsem: “Tenkyu tru long stadi bilong yumi tude! Yu tok stret, laip i gutpela samting tru! Em i gutpela long save long husat em yumi mas tok tenkyu long em.”