Pilim Tru Long Bel—I Gutpela, Tasol Yu Ting Em Inap?
YU TING pasin bilong pilim tru ol samting i gutpela pasin long bihainim? Sampela i tok dispela pasin i makim olsem man i no giaman; tok tru tasol; tokaut stret; kamapim tru samting i stap long bel. Em nau, dispela pasin bai strongim pasin bilong pas gut wantaim ol narapela. Aposel Pol i tok: “Bihainim olgeta tok bilong ol bosman bilong yupela. Nogut yupela i ting long grisim ol na yupela i mekim gutpela wok long taim ol i stap klostu tasol. Nogat. Yupela i mas pret long Bikpela, na oltaim yupela i mas tingting tasol long ol rot bilong mekim gutpela wok.” (Kolosi 3:22) Olgeta man bai laikim kain gutpela wokboi olsem, a? Long nau ating em i isi moa long ol man i pilim tru ol samting long bel bilong ol long kisim wanpela wok na holim inap longpela taim.
Tasol dispela pasin bilong pilim tru ol samting i gutpela tru, long wanem, em i helpim yumi long pas gut wantaim God. God i bin mekim gut long ol Israel bilong bipo taim ol i tingim ol lo na ol bikpela de bilong lotu. Pol i stori long kongrigesen i mas i stap klin na em i tokim ol Kristen: “Redi long dispela bikpela de bilong lotu. Yumi mas rausim olgeta sin na pasin nogut long laip bilong yumi, olsem ol man i save rausim olgeta olpela yis long haus bilong ol long taim ol i laik redi long dispela bikpela de. Na yumi mas bihainim pasin bilong klinpela bel na tok tru.” (1 Korin 5:8) Bilong God i ken orait long lotu bilong yumi, yumi mas pilim tru ol samting. Tasol i gat sampela samting long mekim. Ol tok i tru i mas helpim dispela pasin.
Ol man i wokim sip Titanic na ol pasindia bilong en, ating ol i bin pilim tru olsem sip hia i no inap bagarap. Tasol long namba wan raun bilong en long 1912, sip i bamim traipela hap ais long solwara na 1,517 pipel i lusim laip bilong ol. Ating sampela man Juda long taim bilong ol aposel i bin pilim tru olsem ol i lotuim God long pasin i stret, tasol “ol i no klia gut long laik tru bilong God.” (Rom 10:2) Bilong God i ken orait long yumi, stretpela save i mas i stap olsem as bilong ol samting yumi pilim tru long bel. Ol Witnes Bilong Jehova long komiuniti bilong yu bai amamas long helpim yu long skelim ol samting man i mas mekim bilong pilim tru ol samting na lotuim God long pasin i tru.