Askim

Bilong wanem Baibel i tok meri i mas singaut taim man i laik reipim em?

Ol lain i no bin kisim hevi long pasin bilong reip, ol i no inap save tru long olsem wanem dispela hevi inap bagarapim tru laip bilong narapela. Dispela hevi i pretim meri nogut tru, em inap bagarapim bel na tingting bilong meri inap long laip olgeta bilong em.a Wanpela yangpela meri Kristen em man i bin laik reipim em inap sampela yia i go pinis, em i tok: “I no gat wanpela tok mi inap mekim bilong kamapim stret bikpela pret mi bin pilim long dispela nait o pasin bilong wari mi bin hatwok long daunim i kam inap long nau.” Planti ol i nolaik tingting long dispela samting bilong pret nogut tru long en. Tasol reip em i wanpela hevi bilong dispela graun em pasin nogut i pulap long en.

Baibel i no surik long kamapim sampela stori long bipo we narapela i bin reipim o i traim long reipim narapela. (Stat 19:​4-11; 34:​1-7; 2 Samuel 13:​1-14) Tasol Baibel i kamapim tu sampela samting meri i mas mekim taim man i laik reipim em. Tok em Lo i kamapim long dispela samting i stap long Buk Lo 22:​23-27. Dispela tok i stret long tupela samting em inap kamap. Namba wan stori i bilong wanpela man i kisim yangpela meri i stap long taun na mekim pasin sem long em. Tasol meri i no singaut o krai long narapela i kam helpim em. Olsem na ol i tok meri i gat asua, long wanem, “meri i bin i stap long taun we ol man inap harim krai bilong em, tasol em i no singaut.” Sapos em i bin singaut, ol pipel i stap klostu inap kam na helpim em. Long namba tu stori, wanpela man i bin lukim yangpela meri i stap longwe long taun na em i ‘pulim dispela meri’ na mekim pasin sem long em. Bilong sakim man, meri i bin “singaut long ol man i helpim em, tasol i no gat man i stap.” Dispela i narapela kain long samting meri long namba wan stori i bin mekim, meri long dispela namba tu stori i kamapim klia olsem em i no orait long samting man i mekim long em. Meri i strong long sakim man, em i singaut long kisim helpim, tasol strong bilong man i winim em. Singaut bilong meri i kamapim ples klia olsem em i no amamas long samting man i mekim; meri i no gat asua long wanpela rong.

Ol Kristen long nau i no stap aninit long Lo Bilong Moses, tasol ol stiatok bilong en i gutpela long soim rot long ol. Stori antap i kamapim klia olsem em i bikpela samting long sakim man na singaut long helpim. Planti manmeri i gat tingting olsem pasin bilong singaut taim hevi bilong reip i laik kamap i stap yet olsem gutpela samting long mekim. Wanpela saveman long wok bilong traim stopim pasin raskol i bin tok: “Sapos wanpela man i traim pulim wanpela meri, pasin bilong singaut bikmaus i stap yet olsem nambawan gutpela samting long mekim.” Singaut bilong wanpela meri inap kirapim ol narapela long kam, na ol inap helpim em, o em inap mekim man i kirap nogut na lusim meri. Wanpela yangpela meri Kristen em wanpela man i bin traim long reipim em, i tok: “Mi singaut strong nogut tru na man hia i surik long mi. Na taim em i kam gen long mi, mi singaut na ranawe. Bipo mi bin ting olsem: ‘Olsem wanem pasin bilong singaut bai helpim mi taim wanpela strongpela man i holim mi na em i gat tingting nogut?’ Tasol nau mi save olsem dispela pasin bilong singaut i gutpela!”

Maski sapos man i strong moa na em i reipim meri, pasin bilong meri long strong long sakim man na singaut i no lus nating, nogat tru. Dispela i kamapim klia olsem meri i bin traim bes bilong em long sakim man. (Lo 22:26) Tasol meri i karim hevi long dispela pasin bilong reip, em i no ken sem na bel i no ken kotim em, na em i ken bilip tru olsem em i stap gut yet long ai bilong God. Dispela samting nogut tru i painim em inap bagarapim tru bel bilong em, tasol em i save olsem em i bin strong tru long sakim man, na dispela save em i wanpela bikpela samting bilong helpim em long kamap orait gen.

Bilong klia gut olsem tok bilong Lo 22:​23-27 i stret long samting i kamap o nogat, yumi mas save olsem dispela sotpela stori i no kamapim olgeta samting em inap kamap. Olsem: Em i no stori long samting i kamap we meri em man i traim long reipim i no inap singaut, long wanem, em i mauspas, o hap i dai, o pret nogut tru na em i no inap mekim wanpela samting, o man i yusim han o plasta samting na pasim maus bilong meri. Tasol Jehova inap skelim olgeta samting i bin kamap, na ol samting i stap long tingting, olsem na taim kain hevi olsem i kamap, savepasin na pasin i stret i bosim olgeta samting em i mekim, long wanem, ‘pasin bilong em i gutpela na stretpela tasol.’ (Lo 32:⁠4) Em i save long samting tru tru i bin kamap na long samting meri i bin mekim bilong sakim man. Olsem na meri husat i no inap singaut taim man i reipim em, tasol em i bin mekim olgeta narapela samting em inap mekim bilong traim sakim man, dispela meri inap larim samting i stap long han bilong Jehova tasol.​—⁠Song 55:22; 1 Pita 5:⁠7.

Tasol sampela meri Kristen em man i bin reipim ol, oltaim bel bilong ol i save kotim ol. Taim ol i tingim ol samting i bin kamap, ol i pilim olsem i gutpela sapos ol i bin mekim sampela samting moa na bai dispela samting i no inap painim ol. Tasol ol i no ken putim asua i go long ol yet, mobeta ol meri olsem i beten askim Jehova long helpim ol, na ol i ken bilip tru long bikpela pasin sori na marimari bilong em.​—⁠Kisim Bek 34:6; Song 86:⁠5.

Olsem na ol meri Kristen long nau husat i karim hevi long bel bilong ol i bagarap, long wanem, man i bin reipim ol o traim long reipim ol, ol inap bilip tru olsem Jehova i pilim tru pen na hevi ol i karim. Tok bilong God long Baibel i strongim ol olsem: “God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.” (Song 34:18) Narapela samting tu bilong helpim ol long karim dispela hevi, em ol i ken amamas long ol wanbilip long kongrigesen Kristen em ol i pilim tru hevi bilong ol na laik strongim ol long gutpela pasin sori. (Jop 29:12; 1 Tesalonaika 5:14) Na tu, pasin bilong ol dispela meri yet long tingting tasol long ol gutpela samting bai helpim ol long kisim “bel isi God i save givim.”​—⁠Filipai 4:​6-9.

[Futnot]