Laip Long Refiuji Kem

YU TINGIM wanem samting taim yu harim dispela tok “refiuji kem”? Yu bin raun lukim wanpela? Em i luk olsem wanem?

Taim mipela i raitim dispela stori, ol i bin kamapim 13 narapela narapela refiuji kem long hap wes bilong Tansania. Ol pait i mekim na 500,000 manmeri bilong ol narapela narapela hap bilong Afrika i ranawe lusim ples bilong ol na kamap refiuji na gavman bilong Tansania i wok wantaim lain UNHCR (United Nations High Commissioner of Refugees) long helpim ol. I stap bilong ol manmeri long kem i olsem wanem?

Kamap Long Kem

Wanpela yangpela meri nem bilong em Kandida i stori long ol samting i bin kamap taim em na famili bilong em i kam nupela long refiuji kem sampela yia i go pinis. Em i tok: “Ol i givim mipela wanpela kat bilong gavman i gat ID namba long en bilong makim hamas kaikai samting bai mipela i kisim, na ol i salim mipela i go long Nyarugusu refiuji kem. Long dispela hap, ol i givim mipela lot na strit namba. Na ol i soim mipela wanem hap bai mipela i katim ol diwai na kisim gras bilong wokim liklik haus bilong mipela yet. Mipela i wokim ol brik long graun. Lain UNHCR i givim mipela wanpela traipela hap plastik bilong putim long rup bilong haus. Em i hatwok, tasol mipela i amamas taim mipela i wokim pinis liklik haus bilong mipela.”

Long olgeta fotnait Trinde ol i save yusim kat bilong kisim kaikai samting. Kandida i tok moa olsem: “Mipela i sanap long lain long fran bilong liklik stua bilong kisim ol kaikai samting em lain UNHCR i salim i kam.”

Ol wan wan man i save kisim hamas kaikai samting long olgeta wan wan de?

“Ol i save givim mipela wan wan olsem 3-pela kap plaua ol i wokim long kon, wanpela kap bin, 20 gram plaua ol i wokim long bin soya, 2-pela spun wel bilong kukim kaikai, na 10-pela gram sol. Sampela taim ol i givim tu wanpela sop, em bilong yusim inap wanpela mun.”

Olsem wanem? I gat klinpela wara bilong dring? Wanpela yangpela meri nem bilong em Riziki i tok: “Yes, ol i putim ol paip long ol bikpela wara i stap klostu na ol i pulim wara i go long ol bikpela tang. Na ol i putim marasin klorin long dispela tang wara paslain long ol i pamim wara i go long ol ples bilong kisim wara. Tasol tu, mipela i boilim wara paslain long mipela i dring bilong abrusim sik. Planti taim mipela i wok moning i go inap long apinun long kisim wara na wasim klos bilong mipela long ol dispela ples bilong kisim wara. Mipela inap kisim wan na hap baket wara tasol bilong wanpela de.”

Sapos yu draiv i go insait long wanpela bilong ol kem, yu inap lukim pri-skul, komiuniti skul, na ol haiskul. Na ating bai i gat sampela skul bilong ol man i bikpela pinis. Wanpela polis-stesin na wanpela ofis bilong gavman i stap klostu long kem bilong helpim ol manmeri long kem i stap gut. Ating bai yu inap lukim wanpela bikpela maket na planti ol liklik stua we ol refiuji i ken baim ol kumu, prut, pis, kakaruk na ol narapela kaikai. Sampela asples i kam long maket bilong salim ol samting. Tasol ol refiuji bai kisim we mani bilong baim ol samting? Sampela refiuji i wokim liklik gaden kumu samting bilong salim long maket. Na ating sampela i salim hap plaua o bin samting em ol i bin kisim long gavman bambai ol i ken kisim sampela mit o prut. Yes, kem i luk olsem wanpela bikpela ples. Planti taim bai yu lukim sampela manmeri i stap long maket na i wok long lap na amamas, wankain pasin ol bai mekim taim ol i stap long asples bilong ol.

Sapos yu go long haus sik, ating wanpela dokta bai tokim yu olsem i gat sampela klinik i stap long kem em bilong helpim ol manmeri sik bilong ol i no bikpela tumas, tasol ol man i gat bikpela sik samting ol i salim ol i go long haus sik. Yumi save, wod bilong ol mama long haus sik i bikpela samting, long wanem, long wanpela kem i gat 48,000 refiuji, bai i gat olsem 250 mama i karim pikinini long olgeta mun.

Kisim Planti Kaikai Bilong Spirit

Long olgeta hap bilong graun, ating ol Witnes Bilong Jehova i tingting planti long ol brata spirit bilong ol i stap long ol kem long Tansania. Inap olsem 1,200 i stap long 14 kongrigesen na 3-pela grup. Olsem wanem long i stap bilong ol?

Wanpela samting ol dispela gutpela Kristen i mekim hariap taim ol i kam i stap long ol kem, em ol i bin askim long kisim wanpela hap graun bilong wokim Haus Kingdom long en. Dispela bai helpim ol narapela refiuji long save long wanem hap ol inap painim ol Witnes na kam long ol miting i save kamap long olgeta wik. Long Lugufu kem, i gat 7-pela kongrigesen na 659 i save mekim wok Kristen. Long ol miting bilong Sande, namba bilong ol manmeri i bung long ol dispela 7-pela kongrigesen wantaim em inap 1,700.

Ol Witnes i stap long olgeta kem i kisim helpim tu long rot bilong ol bikpela na liklik kibung Kristen. Taim ol i kamapim namba wan kibung distrik long Lugufu kem inap 2,363 i bung. Ol Witnes i bin wokim hul long graun bilong putim wara bilong kisim baptais ausait liklik long ples kibung. Ol i putim plastik insait long dispela hul bilong holim wara. Ol brata i kalap long baiskol na ol i go kisim wara long wanpela bikpela wara i stap longwe inap 2-pela kilomita na ol i kam kapsaitim long dispela hul. Long wanpela raun ol inap kisim 20 lita wara, olsem na ol i bin go i kam planti taim bilong kisim inap wara. Ol lain bilong kisim baptais i werim ol klos i stret, na ol i sanap long lain bilong kisim baptais. Inap 56 olgeta i kisim baptais long rot bilong i go insait olgeta long wara. Long kibung ol i bin toktok wantaim wanpela Witnes Bilong Jehova i save autim tok fultaim na em i tok em i bin mekim Baibel-stadi wantaim 40 man. Fopela bilong ol dispela sumatin i kisim baptais long dispela kibung.

Brens-ofis bilong ol Witnes Bilong Jehova i bin stretim rot na bai ol wasman raun i ken go oltaim bilong lukim ol brata sista. Wanpela wasman raun i tok: “Ol brata bilong yumi i givim bel long autim tok. Ol i gat bikpela hap bilong autim tok long en, na long wanpela kongrigesen, olgeta wan wan Witnes i lusim olsem 34 aua insait long olgeta wan wan mun long autim tok. Planti bilong ol i mekim 5-pela o moa Baibel-stadi wantaim ol man i amamas long harim tok. Wanpela painia [Witnes i save autim tok fultaim] i tok em i no ting olsem i gat wanpela gutpela teritori long narapela hap i winim dispela. Ol manmeri long ol kem i amamas tru long ritim ol buk na nius bilong yumi.”

Olsem wanem ol manmeri long ol kem inap kisim ol buk na nius bilong Baibel? Brens-ofis i salim ol buk na nius long tren i go long Kigoma, em wanpela taun long hap is bilong raunwara Tanganyika. Long dispela hap ol brata i kisim na stretim rot bilong salim ol i go long ol kongrigesen. Sampela taim ol brata i rentim wanpela trak na ol yet i kisim ol dispela buk na nius i go long ol dispela kem. Ol i draiv long ol rot nogut inap 3-pela o 4-pela de bilong kamap long ol dispela kem.

Kisim Helpim Long Ol Samting Bilong Skin

Ol Witnes Bilong Jehova long Frans, Beljam, na Swiselan i bin helpim tru ol refiuji i stap long ol dispela kem. Sampela i kisim tok orait long lain Ministry of Home Affairs na lain UNHCR bilong i go lukim ol kem i stap long Tansania. Ol Witnes long Yurop i bin bungim planti ton susu ol i wokim long bin soya, ol klos, ol su, ol buk bilong skul na sop. Ol dispela samting em bilong givim long olgeta refiuji, na dispela pasin i stret wantaim stiatok bilong Baibel i tok: “Taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.”​​—⁠Galesia 6:​10.

Ol dispela wok bilong helpim ol narapela i kamapim ol gutpela samting​—⁠planti refiuji i bin kisim helpim. Lain Refiuji Komiuniti Komiti long wanpela bilong ol kem i kamapim amamas bilong ol na ol i tok: “Mipela i makim maus bilong olgeta manmeri bilong komiuniti na tok tenkyu long helpim oganaisesen bilong yupela i bin givim mipela inap tripela taim . . . Ol klos i bin helpim 12,654 ol man, meri na pikinini, na ol bebi . . . Namba bilong ol refiuji i stap nau long Muyovozi kem em inap 37,000. Na inap 12,654 i bin kisim helpim, em olsem 34.2 pesen bilong ol manmeri i stap long kem.”

Long narapela kem, olgeta 12,382 refiuji wan wan i bin kisim olsem 3-pela klos, na narapela kem i kisim planti tausen ol skul-buk em ol i yusim long ol haiskul na ol komiuniti skul, na ol ples bilong lukautim ol pikinini long san. Wanpela ofisa bilong lain UNHCR i tok: “Mipela i amamas tru long ol samting yupela i givim, dispela i bin [helpim] planti manmeri long ol refiuji kem em ol i sot tru. I no longtaim i go pinis mipela i kisim 5-pela kontena i pulap long ol skul-buk, em lain bilong mipela i givim long ol refiuji. . . . Tenkyu tru.”

Na tu, ol niuspepa i stori long dispela helpim ol Witnes i givim. Long wanpela het-tok bilong Sunday News bilong Me 20, 2001, i tok: “Ol Klos Bilong Ol Refiuji Long Tansania i Wok Long Kam.” Wanpela stori bilong dispela niuspepa i kamap long Februeri 10, 2002, i tok: “Ol refiuji i amamas long kisim ol dispela samting, long wanem, sampela pikinini i no gat klos, olsem na ol i bin lusim skul, tasol nau ol i wok long go olgeta taim long skul.”

Ol i Hatwok Tru Tasol i No Olsem Ol i No Gat Helpim

Long planti bilong ol refiuji, wanpela yia samting i save lus bilong ol i ken lain gut long nupela sindaun bilong ol. Ol i no gat planti samting. Ol Witnes Bilong Jehova i stap long ol dispela kem i yusim bikpela hap taim bilong ol long autim tok bilong gutnius i stap long Baibel long ol refiuji i stap klostu. Ol Witnes i tokim ol long nupela taim, we olgeta manmeri “bai i paitim bainat bilong ol i kamap olsem ain bilong brukim graun, na paitim spia bilong ol i kamap olsem naip. Na olgeta lain manmeri bai i no pait moa, na bai ol i no skul moa long pait.” Na bihain “olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret. Bikpela I Gat Olgeta Strong i bin promis long mekim ol dispela samting.” Dispela i kamapim klia olsem taim God i blesim ol man bai i no gat ol refiuji kem long graun.​​—⁠Maika 4:​3, 4; Song 46:⁠9.

[Piksa long pes 8]

Ol haus long Nduta kem

[Ol Piksa long pes 10]

Haus Kingdom long Lukole (han sut) Ol i kisim baptais long Lugufu (daunbilo)

[Piksa long pes 10]

Kibung Distrik long Lugufu kem