Mekim Gutpela Wok Taim Senis i Kamap Long Sindaun Bilong Yu
Pum, Jan, Dries, na Otto, ol i fopela elda Kristen long Netelan, na planti samting bilong ol i wankain. Olgeta i marit na ol i gat ol pikinini. Na tu, inap sampela yia i go pinis, ol i bin mekim wok mani fultaim na ol i stap long ol gutpela haus. Tasol olgeta bilong ol i lusim wok mani na ol i kirap givim bikpela hap taim na strong bilong ol long mekim wok bilong Kingdom. Wanem samting i kamap na ol inap mekim olsem? Olgeta fopela man i mekim gutpela wok taim senis i kamap long sindaun bilong ol.
BIHAIN sindaun bilong planti bilong yumi bai senis. Planti senis long sindaun—yumi marit, kamapim pikinini, lukautim ol papamama i lapun—ol i kamapim sampela wok moa yumi mas mekim. Tasol sampela senis i opim rot long yumi long mekim sampela wok Kristen moa bilong autim tok. (Matyu 9:37, 38) Olsem: Ol pikinini bilong yumi i go bikpela na lusim haus, o yumi ritaia long wok.
Na tu, sindaun bilong yumi inap senis maski yumi laikim o nogat, tasol sampela Kristen i stretim ol samting long sindaun bilong ol na dispela i opim rot long ol i ken insait moa long wok autim tok. Pum, Jan, Dries na Otto ol i bin mekim olsem. Ol i bin mekim olsem wanem?
Taim Ol Pikinini i Lusim Haus
Pum i bin mekim wok olsem kuskus long wanpela kampani bilong wokim marasin. Planti taim em na meri bilong em Anny, ol i mekim wok painia haptaim wantaim tupela pikinini meri bilong ol. Na tu, Pum na Anny i stretim rot wantaim ol narapela painia long painim amamas wantaim ol. Tupela i tok: “Dispela pasin i lukautim tupela pikinini bilong mitupela na tupela i no kisim hevi em pasin bilong poroman wantaim ol narapela kain man inap kamapim.” Pasin bilong papamama i kirapim tupela pikinini meri long kirap mekim wok painia oltaim taim tupela i pinis long haiskul.
Taim tupela pikinini bilong ol i lusim haus, Pum na Anny i luksave olsem dispela senis i mekim na nau tupela i gat sampela haptaim na mani moa em tupela inap mekim wok long en bilong i go raun lukim ol narapela ples o long painim sampela narapela amamas. Tasol tupela i pasim tok long mekim wok long dispela senis i kamap long ol long mekim sampela wok Kristen moa. Olsem na Pum i askim bos bilong em long wok fopela de tasol long olgeta wik. Na bihain, Pum i stretim rot na bai em i ken kirap wok long 7 klok long moning na pinis long 2 klok long apinun. Tru, taim em i lusim liklik hap taim tasol bilong mekim wok mani, dispela i makim olsem ol inap lusim liklik mani tasol bilong baim ol samting. Tasol tupela i stap orait, na long 1991, Pum i kirap mekim wok painia oltaim wantaim meri bilong em.
Bihain, ol i askim Pum long i stap helpim bilong man i lukautim Haus Kibung bilong ol Witnes Bilong Jehova. Dispela i makim olsem tupela i mas lusim haus bilong ol em tupela i bin stap long en inap 30 yia na i go stap long wanpela flet long hap bilong Haus Kibung. Tupela i mekim olsem. Olsem wanem? Tupela i bin hatwok long mekim dispela samting? Anny i tok, taim em i wari long ples na haus bilong ol long pastaim, em i save askim em yet olsem: ‘Mi wankain olsem meri bilong Lot?’ Em i no laik “lukluk i go bek.”—Stat 19:26; Luk 17:32.
Pum na Anny i pilim olsem ol samting ol i bin mekim i givim planti blesing long ol. Ol i save mekim planti samting, ol i amamas long wok bilong ol long Haus Kibung, ol i stretim ol samting bilong ol kibung distrik, na bung wantaim ol wasman sekit (ol wasman raun) em ol i save givim ol tok long dispela haus. Sampela taim tupela i save go raun lukim ol narapela narapela kongrigesen, taim Pum i mekim wok olsem helpim bilong wasman sekit.
Wanem samting i bin helpim tupela long mekim sampela wok Kristen moa? Pum i tok: “Taim bikpela senis i kamap long sindaun bilong yu, yu mas tingting strong long mekim gutpela wok long en.”
Kisim Liklik Samting Tasol Bilong Skin
Jan na meri bilong em, Woth, i gat tripela pikinini. Olsem Pum na famili bilong em, Jan i mekim gutpela wok taim senis i kamap long sindaun bilong em. Inap planti yia, Jan i bin holim gutpela wok mani long beng na em i givim gutpela sindaun long famili bilong em. Tasol em i gat bikpela laik long mekim sampela wok moa bilong autim tok. Em i tok: “Long ol yia mi bin stap laip, pasin bilong mi long laikim tok i tru na Jehova i kamap strong tru.” Olsem na long 1986, Jan i mekim wanpela senis long sindaun bilong em. Em i tok: “Taim ol i stretim ol wok samting long ples wok, rot i op na nau mi kirap mekim wok inap sampela aua tasol. Ol wanwok bilong mi i kirap nogut na ol i givim mi nem Diwodo, long wanem, mi save wok long dinsdag [Tunde], woensdag [Trinde], na donderdag [Fonde]. Pe bilong mi i go daun inap 40 pesen. Mi salim haus bilong mipela na baim wanpela haus-bot na bai mipela inap i go autim tok long ol hap i sot long ol man bilong autim tok bilong Kingdom. Bihain, mi ritaia hariap long wok; mani mi kisim i go daun inap 20 pesen moa, tasol long 1993, mi inap kirap long mekim wok painia oltaim.”
Long nau, Jan em i insait long lain Hospital Lieson Komiti na planti taim em i save mekim wok olsem wasman bilong kibung. Sampela taim Woth i save mekim wok painia haptaim, maski em i gat sik. Olgeta tripela pikinini bilong ol i marit, na ol wantaim ol poroman marit bilong ol, ol i givim bel tru long autim tok bilong Kingdom.
Olsem wanem Jan na Woth inap lain long lusim liklik mani tasol bilong kisim ol samting bilong skin? Jan i tok: “Long taim mipela i gat planti mani, mipela i no givim bel tumas long kisim planti samting bilong skin. Nau mipela i mas wet liklik taim pastaim bilong kisim sampela samting, tasol ol blesing na wok bilong spirit mipela i kisim i inapim tru mipela.”
Olsem Jan na Woth, Dries na meri bilong em, Jenny, tupela tu i bin pasim tok long ol bai no wok long kisim planti samting bilong skin na bai ol i ken lusim bikpela haptaim moa bilong mekim wok bilong Kingdom. Dries na Jenny i mekim wok painia i go inap long taim tupela i kamapim pikinini. Bilong lukautim famili bilong em, Dries i wok olsem wanpela bosman bilong wanpela bikpela kampani. Ol bos bilong em i amamas long wok em i mekim na ol i laik givim em bikpela namba moa. Tasol Dries i no laik kisim dispela wok, long wanem, sapos em i kisim dispela wok em bai i gat liklik taim tasol bilong mekim ol wok Kristen.
Tupela i mas lusim bikpela hap taim na strong bilong lukautim famili bilong ol na mama bilong Jenny i gat sik. Tasol tupela i holimpas yet tingting olsem bilong ol painia. Wanem samting i bin helpim ol long mekim olsem? Jenny i tok: “Mipela i larim ol painia long i stap wantaim mipela, na singautim ol i kam kaikai wantaim mipela, na mipela i save kisim ol wasman sekit long i stap wantaim.” Dries i tok moa: “Mipela i no kisim planti samting bilong skin na mipela abrusim pasin bilong kisim dinau. Mipela i pasim tok long mipela i no inap insait long ol bikpela wok bisnis o baim wanpela haus, nogut ol dispela samting i pasim mipela long mekim wok bilong Kingdom long bihain.”
Ol samting Dries na Jenny i bin mekim bilong stretim rot na bai tupela i gat sampela haptaim moa bilong mekim wok bilong Kingdom i kamapim gutpela samting. Tupela pikinini man bilong ol i kamap elda, na wanpela i mekim wok painia wantaim meri bilong em. Dries na Jenny i mekim wok painia salim, na bihain Jenny i raun wantaim Dries long mekim wok sekit. Nau ol i mekim wok long Betel, na Dries em i wanpela memba bilong Komiti Bilong Brens.
Ritaia Long Wok Taim Em i No Lapun Yet
Olsem Dries na Jenny, Otto na meri bilong em, Judy, ol i bin mekim wok painia paslain long tupela i kamapim tupela pikinini meri. Taim Judy i gat bel long namba wan pikinini, Otto i kisim wanpela wok olsem tisa.
Taim ol pikinini i wok long i go bikpela, planti taim Otto na Judy i save singautim ol painia long kam long haus bilong ol na bai tupela pikinini meri bilong ol i ken lukim amamas ol painia i kisim long wok Kristen ol i mekim. Bihain, bikpela pikinini meri bilong tupela i kirap mekim wok painia. Na bihain em i go long Skul Gileat, na nau em wantaim man bilong em i mekim wok misineri long wanpela kantri long Afrika. Yangpela pikinini meri bilong tupela i kirap mekim wok painia long 1987, na Judy tu i kirap mekim wok painia.
Taim senis i kamap na Otto inap wok inap sampela aua tasol long skul, em i mekim wok long dispela haptaim em i kisim bilong mekim wok painia. Bihain, em i lusim wok bilong em olgeta. Nau em i mekim wok olsem wasman raun, na em i save mekim wok long save bilong em olsem wanpela tisa long strongim ol kongrigesen long ol samting bilong spirit.
Otto i givim wanem gutpela tok long ol man i ritaia long wok taim ol i no lapun yet? “Taim yu ritaia long wok, no ken tingting long i stap nating tasol inap wanpela yia samting. Em i no hatwok long man i kisim pasin bilong stap tasol na i no wok strong. I no longtaim na bai yu lusim tingting long mekim wok painia. Olsem na yu mas kirap hariap long mekim bikpela wok moa long kongrigesen na wok autim tok.”
Mekim Wok Long Save Yu Bin Kisim
Tru, ol brata olsem Pum, Jan, Dries na Otto, skin bilong ol i no gat strong olsem long taim ol i yangpela. Tasol ol i strongpela Kristen, na kain kain samting i bin painim ol, na ol i gat gutpela tingting na save. (Sindaun 20:29) Ol i save long wok bilong ol papa, na ol i bin wok wantaim meri bilong ol, olsem na ol i save liklik long ol samting mama i mas mekim. Na wantaim ol meri bilong ol, ol i bin stretim ol hevi insait long famili na putim ol mak bilong spirit ol pikinini bilong ol i ken winim. Otto i tok: “Taim mi mekim wok sekit na givim tok kaunsel long ol samting bilong famili, mi inap givim ol gutpela tok, long wanem, mi bin mekim bikpela long ol pikinini.” Wankain tu long Dries, save em i bin kisim olsem wanpela papa i helpim famili Betel i gat planti yangpela i wok i stap long en.
Yes, save ol dispela brata i gat i helpim ol long mekim kain kain wok insait long kongrigesen. Yumi ken tok, ol samting i bin painim ol i sapim tul bilong ol na ol i ken yusim strong bilong ol long mekim gut wok bilong ol. (Saveman 10:10) Olsem na ol inap long mekim planti gutpela wok, winim ol man i gat strongpela skin em ol i no gat bikpela save.
Ol kain brata olsem wantaim ol meri bilong ol, ol i stap olsem gutpela piksa bilong ol yangpela namel long lain bilong Jehova. Ol yangpela i luksave olsem ol kain marit olsem i kisim kain kain hatwok na blesing em ol buk na nius bilong yumi i save stori long en. Em i strongim bel bilong yumi long lukim ol man na meri i daunim laik bilong ol yet wankain olsem Kalep, na em i redi long mekim wanpela wok i hatwok long mekim, maski em i lapun pinis.—Josua 14:10-12.
Bihainim Pasin Bilong Ol Long Bilip
Yu ting yu inap long bihainim pasin bilong ol dispela marit long bilip na mekim ol samting dispela stori i kamapim? Tingim, ol i larim tok i tru i stap namba wan samting long laip bilong ol. Ol i helpim ol pikinini bilong ol long kisim laik bilong mekim wok painia. Olsem Jan i tok, “ol yet i stap olsem gutpela piksa long pasin bilong laikim tru Jehova na oganaisesen bilong em, na ol i stretim rot bilong ol pikinini i ken poromanim ol gutpela poroman, na ol i skulim ol pikinini long lukautim ol yet long ol samting bilong skin.” Na ol i wok wantaim na mekim ol samting bilong amamas wantaim olsem famili. Pum i tok: “Long taim bilong holide, planti taim mipela olgeta long famili i save go autim tok long moning na long apinun mipela i save mekim ol samting bilong amamas wantaim.”
Na tu, ol dispela Kristen i save tingim ol samting ol bai mekim bihain, olsem na taim senis i kamap long sindaun bilong ol, ol i redi long mekim gutpela wok long en. Ol i putim ol mak ol i laik winim na ol i makim ol samting ol bai mekim na i helpim ol long winim hariap ol mak ol i putim. Ol i painim rot bilong lusim liklik aua long mekim wok skin na ol i redi long holim liklik mani tasol bilong baim ol samting. (Filipai 1:10) Ol meri bilong ol i helpim gut man bilong ol. Man na meri wantaim, ol i gat bikpela laik long mekim “bikpela wok bilong helpim planti manmeri i kamap Kristen,” olsem na ol i kisim planti blesing long Jehova.—1 Korin 16:9; Sindaun 10:22.
Olsem wanem? Yu tu i gat laik long mekim bikpela wok moa bilong autim tok? Sapos olsem, orait taim senis i kamap long sindaun bilong yu, mekim gutpela wok long en na bai yu inap long mekim bikpela wok moa bilong autim tok.
[Piksa long pes 20]
Pum na Anny i lukautim Haus Kibung
[Piksa long pes 20]
Jan na Woth i mekim wok autim tok
[Piksa long pes 21]
Dries na Jenny i wok long Betel
[Piksa long pes 21]
Otto na Judy i redi long i go lukim wanpela kongrigesen