Suprim Kot i Helpim Lotu i Tru Long “Kantri Ararat”

Wanpela man Amenia i gat waitpela gras na em i papa bilong 3-pela pikinini, em i sanap long ai bilong nambawan kot bilong kantri bilong em. Pasin bilong em yet na planti wanbilip bilong em long i stap fri, em inap lus. Kot i putim yau taim em i kamapim ol tok bilong Baibel bilong kamapim as bilong ol bilip em i holim. Bilong save gut long olsem wanem trupela lotu long dispela kantri i bin win, pastaim yumi ken skelim ol samting i bin kamapim dispela kot.

KANTRI Amenia i stap long hap is bilong Turki, long hap saut bilong ol bikpela maunten bilong Caucasus. Winim 3 milion manmeri i sindaun long dispela hap. Long biktaun bilong en, Yerevan, yu inap lukluk i go long 2-pela kil bilong maunten Ararat, we, olsem stori bilong ol tumbuna i tok, sip bilong Noa i bin pas taim Bikpela Tait i pinis.​​—⁠Stat 8:⁠4.a

Kirap long 1975 na i kam, ol Witnes Bilong Jehova i bin mekim wok Kristen bilong ol long Amenia. Taim Amenia i kisim independens long Soviet Yunion long 1991, ol i kamapim wanpela lain, em Stet Kaunsil Bilong Relijes Afes, bilong rejistaim ol lotu. Tasol planti taim dispela lain i tok ol i no ken rejistaim ol Witnes Bilong Jehova, na nambawan as bilong dispela em ol Witnes i save bihainim pasin Kristen na ol i no insait long ol samting bilong pait. Olsem na kirap long 1991 na i kam, i gat 100 yangpela Witnes long Amenia em kot i tok ol i bin mekim rong, na planti i bin kalabus, na nambawan bikpela as bilong dispela em ol i save bihainim tok bilong Baibel na ol i no insait long ami.

Na tu, dispela lain i bin tokim ol ofisa bilong gavman bilong wokim kot long ol i mas skelim wok lotu bilong Lyova Margaryan, em wanpela elda Kristen na wanpela loya i save wok strong​—⁠em i wok long wanpela ples bilong wokim paua long atom. Ol i kotim Brata Margaryan long Lo Namba 244, em wanpela lo ol Soviet i bin kamapim long taim bilong Khrushchev na i bilong pasim na pinisim wok bilong ol Witnes Bilong Jehova na sampela lotu moa.

Dispela lo i mekim na man i brukim lo sapos em i stretim wok, o i go pas long mekim wok, bilong wanpela lain lotu, em long rot bilong autim bilip bilong ol, ol i ‘pulim ol yangpela i go long ol miting bilong wanpela lotu em gavman i no bin rejistaim’ na i ‘kirapim ol manmeri bilong dispela lotu long sakim ol wok em gavman i tokim ol long mekim.’ Bilong strongim tok bilong em, ofisa bilong kot i tok, ol yangpela pikinini i save go long ol miting em Brata Margaryan i save mekim long taun Metsamor. Na ofisa i tok Brata Margaryan i bin subim ol yangpela long kongrigesen long sakim wok ami.

Kot i Kirap

Kot i bin kirap long Fraide, Julai 20, 2001, long distrik kot long Armavir, na Jas Manvel Simonyan i stap olsem siaman. Kot i stap inap sampela wik. Ol witnes bilong lain i sutim tok ol i mekim toktok, tasol bihain ol i tokaut olsem sampela memba bilong Nesenel Sekiuriti Ministri (bipo em KGB) i bin kolim ol tok ol i bin raitim long pepa i bilong sutim tok long Brata Margaryan na ol dispela memba i bin subim ol long sainim. Wanpela meri i tokaut olsem wanpela bikman bilong dispela Sekiuriti Ministri i bin subim em long tok “ol Witnes Bilong Jehova i save birua long gavman na long lotu bilong mipela.” Meri i tok em yet i no save long wanpela Witnes Bilong Jehova​—⁠em i bin harim ol man i sutim tok long ol long nesenel-televisen tasol.

Orait nau em taim bilong Brata Margaryan na em i tok, taim ol liklik pikinini i go long ol miting bilong ol Witnes Bilong Jehova, papamama bilong ol i orait long dispela. Na em i tok wok bilong go insait long ami o nogat em samting bilong ol wan wan yet. Inap sampela de, ofisa bilong kot i wok long givim ol askim long em. Brata Margaryan i mekim wok long Baibel na long pasin isi em i bekim ol askim long ol bilip bilong em, na ofisa i skelim ol dispela skripsa long Baibel bilong em yet.

Long Septemba 18, 2001, jas i tokaut olsem Margaryan “i no gat asua” na wok bilong em “i no brukim lo liklik.” Lain Associated Press i kamapim ripot i stori long dispela kot. Ripot i tok: “Tude ol i rausim kot bilong wanpela lida bilong ol Witnes Bilong Jehova long Amenia. Em i no bin mekim samting ofisa bilong kot i bin tok em i mekim, olsem kirapim ol man long kam insait long lotu na subim ol yangpela long sakim wok ami. Bihain long dispela kot bilong tupela mun, Kot i tok i no gat wanpela samting i kamapim klia olsem dispela lida, Levon Markarian [Lyova Margaryan], i gat asua. Sapos Kot i bin tok em i gat asua, ating em inap kisim 5-pela yia long kalabus. . . . Maski Konstitiusen Bilong Amenia i tok olgeta man inap bihainim wanem wanem lotu ol i laik bihainim, i hatwok tru long ol nupela lotu i ken rejista, na ol lo i save helpim nambawan bikpela lotu, Amenian Apostolik Sios.” Long Septemba 18, 2001, Oganaisesen Bilong Sekiuriti na Koperesen long Yurop (OSCE) i tok: “Lain OSCE i amamas olsem Kot i bin tok Margaryan i no gat asua, tasol mobeta sapos dispela kot i no bin kamap pastaim.”

Kot i Go Yet

Tupela ofisa bilong kot i apil, na kot bilong apil i go inap 4-pela mun. Long kirap bilong kot, long taim bilong Brata Margaryan i mas mekim toktok, namba wan askim i go long em i bin kam long wanpela jas. Taim Brata Margaryan i stat long bekim tok, siaman i katim tok na sutim askim long em. Na taim Brata Margaryan i wok long bekim sampela askim moa, siaman i no larim em i bekim gut. Na tu, klostu olgeta askim ol loya i givim long em, siaman i no larim ol i raitim long buk, na em i no kamapim as bilong dispela. Long kot, ol man bilong lotu i save birua long ol Witnes, em ol i bin kam insait long haus kot, ol i wok long singaut na toknogutim Brata Margaryan. Planti tok ol i mekim long televisen bilong stori long dispela kot, ol dispela tok i giaman na i paul. Olsem: Ol i tok Brata Margaryan yet i bin tokaut olsem em i bin mekim rong.

Namel long kot, siaman bilong 3-pela jas i ritim wanpela pas i bin kam long Stet Kaunsil Bilong Relijes Afes i tok ol ofisa bilong kot i mas stopim wok bilong Brata Margaryan. Ol man bilong ol narapela kantri i stap long kot ol i kirap nogut tru, long wanem, taim Amenia i bin putim aplikesen long kamap memba bilong Kaunsil Bilong Yurop, Amenia i bin tokaut olsem ol i save ol i gat wok long “helpim olgeta Sios o lain bilong lotu, na ol liklik lotu tu, long stap fri long mekim lotu bilong ol.”

Taim kot i wok long go yet long ol wik bihain, ol samting i no stap isi. Ol birua i wok long paitim ol Witnes insait na ausait long haus kot. Ol i kikim ol Witnes meri long lek. Taim ol i paitim wanpela Witnes na em i no bekim pait, ol i paitim em nogut tru long baksait na em i mas slip long haus sik.

Orait nau ol i makim wanpela nupela siaman bilong kot. Maski sampela long odiens i laik pretim loya bilong Brata Margaryan, dispela nupela siaman i bosim gut kot​—⁠taim wanpela meri i singaut na toknogutim loya, siaman i tokim polis long rausim em long haus kot.

Kot i Go Long Nambawan Kot Bilong Amenia

Long Mas 7, 2002, kot bilong apil i sambai long tok em namba wan kot i bin pasim. Ol man i kirap nogut olsem, long de paslain long dispela, Stet Kaunsil Bilong Relijes Afes i pinis. Ol ofisa bilong kot i apil gen, ol i go long nambawan bikpela kot bilong Amenia​—⁠em Suprim Kot. Ol i askim Kot long mekim gen kot na bai ol i ken tok em “i gat asua.”

Sikspela jas, em Jas Mher Khachatryan i siaman bilong ol, i kirap mekim kot long 11:⁠00 a.m. long Epril 19, 2002. Long namba wan tok em i mekim, wanpela ofisa bilong kot i kamapim kros bilong em olsem tupela narapela kot bipo i no bin tokaut olsem Brata Margaryan “i gat asua.” Tasol nau, jas i katim tok bilong em na 4-pela jas i wok long givim ol askim long em. Wanpela jas i krosim ofisa long em i bin wok long stiaim Kot​—⁠taim ofisa i tok olsem Margaryan i bin brukim Lo Namba 244, ofisa i bin kamapim tu olsem ol Witnes Bilong Jehova i mekim wok autim tok na lotu bilong ol i no rejista, tasol dispela tupela samting i no brukim Lo Namba 244. Orait nau jas i tok samting ofisa i bin mekim, dispela i “bin mekim nogut tru” long Brata Margaryan. Narapela jas i stori long sampela kot em Yuropian Kot i bin harim we ol i bin tokaut olsem ol Witnes Bilong Jehova i stap olsem “wanpela lotu ol man i save long en,” na Yuropian Konvensen Long Human Raits i mas helpim ol. Taim jas i tok olsem, wanpela pris i stap long haus kot i singaut bikmaus olsem ol Witnes Bilong Jehova i wok long brukim kantri. Kot i tokim em long pasim maus.

Lyova Margaryan i sindaun long odiens, na nau ol jas i singautim em long sanap na mekim tok​​—⁠em samting dispela nambawan kot i no bin mekim bipo. Brata Margaryan i mekim gutpela wok long autim tok long pasin Kristen ol Witnes Bilong Jehova i save bihainim long kain kain samting. (Mak 13:⁠9) Ol jas i go bung long narapela rum na ol i toktok wantaim, na bihain liklik ol i kam bek na ol i tok Brata Margaryan “i no gat asua.” Em i amamas tru. Tok ol i pasim na raitim long buk i tok olsem: “Dispela wok [bilong Lyova Margaryan] i no brukim wanpela lo, na dispela tok ol i bin sutim long em i no stret wantaim Lo Namba 23 bilong Amenian Konstitiusen na Lo Namba 9 bilong Yuropian Konvensen.”

Tok Ol i Pasim Long Kot i Mekim Wanem?

Sapos lain bilong sutim tok long Brata Margaryan i bin win, bai rot i op long kotim sampela moa elda Witnes long ol kongrigesen long olgeta hap long Amenia. Mipela laik bai dispela tok ol i bin pasim long kot i ken mekim na dispela pasin bilong mekim nogut long ol Witnes i no ken kamap gen. Na tu, sapos Kot i bin tok Brata Margaryan i gat asua, bai dispela inap kamap wanpela samting ol man i ken mekim yet wok long en bilong pasim ol Witnes Bilong Jehova long rejista. Gutpela tru olsem dispela Kot i bin sakim dispela tok giaman ol i bin sutim long Ol Witnes.

Gavman bai orait long 7,000 Witnes Bilong Jehova long dispela kantri i ken rejista o nogat, em samting yumi no save long en long nau, yumi mas wet tasol. Tasol nau long dispela taim yumi wet i stap, trupela lotu i stap yet long “kantri Ararat.”

[Futnot]

[Piksa long pes 12]

Lyova Margaryan long kot

[Piksa long pes 13]

Brata Margaryan na famili bilong em