Taim Ol i Tingim Tru Wok Autim Tok Ol i Bin Mekim

“San i hat nogut tru. I luk olsem liklik rot long maunten i no gat pinis bilong en. Planti hevi i painim mipela tasol mipela i winim ol dispela hevi na mipela i go kamap long hap mipela i laik i go long en: wanpela ples i stap longwe tru. Skin i les olgeta, tasol mipela i amamas tru taim mipela i paitim dua long namba wan haus na ol haus lain i amamas tru long mipela. Taim apinun i kamap, mipela i tilim pinis olgeta nius mipela i bin bringim na mipela i kirapim pinis sampela Baibel-stadi. Ol manmeri i laik tru long kisim save. Nau mipela i mas lusim ol, tasol mipela i promis long i go bek gen.”

WANPELA lain painia bilong Meksiko i save kisim planti kain ekspiriens olsem. Ol dispela painia i tingting strong long givim bel tru long inapim wok Jisas Krais i bin givim long ol disaipel bilong em: “Yupela bai i autim tok bilong mi . . . long olgeta hap bilong graun.” (Aposel 1:⁠8) Long Meksiko, ol i stretim rot long mekim ol bikpela wok autim tok​—⁠ol i kolim olsem ol painia-raun​—⁠na bai ol inap i go autim tok long ol teritori i no gat kongrigesen i lukautim, na wan wan taim tasol ol i autim gutnius bilong Kingdom bilong God long ol. Ol dispela teritori i stap longwe tru na i hatwok long i go long en. Ol i helpim tu ol kongrigesen i stap longwe long ol narapela na teritori bilong ol i bikpela tru.

Bilong makim wanem ol hap bilong kantri ol painia-raun bai karamapim, brens-ofis bilong ol Witnes Bilong Jehova i skelim gut wanem ol hap i mas i gat sampela helpim.a Taim ol i mekim pinis, ol i makim ol painia salim long i go autim tok long ol dispela teritori. Ol i givim ol ka long ol, em ol ka i stret long ol dispela rot nogut. Ol i putim ol buk na nius samting long ol dispela ka, na tu, ol i slip insait long ol ka sapos i gat wok long ol i mekim olsem.

Ol i Kirap Kwiktaim

Kirap long Oktoba 1996, ol i bin singautim ol narapela pablisa tu long insait long dispela wok, na ol i wok wantaim ol painia salim. Ol pablisa na ol painia oltaim husat i gat laik long autim tok long ol hap we ol i sot long ol man bilong autim tok, ol i go insait long dispela wok long ol narapela narapela taim. Ol i makim sampela long wok wantaim ol kongrigesen i stap insait long ol hap em wok painia-raun bai inapim, na bai ol i ken autim tok long ol teritori bilong ol dispela kongrigesen na kirapim laik bilong ol man i laik harim tok. Planti yangpela pablisa na painia i orait long mekim dispela wok na ol i kisim planti gutpela ekspiriens i strongim tru ol.

Olsem: Abimael, em wanpela yangpela Kristen i mekim wok mani i gat bikpela pe bilong en long wanpela kampani bilong mobail-fon, em i pasim tok long insait long wok autim tok long ol dispela longwe ples. Taim ol bos bilong em i kisim save olsem em bai pinis long wok, ol i tok long apim namba na pe bilong em. Ol wanwok i subim em, na ol i tok em gutpela rot tru i op long em na em i no gat gutpela tingting sapos em i sakim dispela samting. Tasol Abimael i tingting strong long helpim dispela bikpela wok autim tok inap 3-pela mun. Abimael i amamas tru long dispela wok, na em i pasim tok long stap inap sampela taim moa long wanpela kongrigesen i stap longwe em ol i sot long ol pablisa. Nau em i gat liklik wok mani na em i bin lain long senisim sampela pasin na bai em i no gat wok long baim planti samting bilong skin.

Julissa i mas raun long bas inap 22 aua bilong i go kamap long hap ol i makim em bilong i go long en. Long laspela hap bilong raun bilong em, em i leit liklik na laspela bas bilong i go long dispela hap i go pinis. Tasol i gat wanpela trak bilong kisim ol wokman i go i kam. Julissa i strongim bel na em i askim sapos em inap go wantaim ol long dispela trak. Em i pret liklik, long wanem, em wanpela meri tasol namel long planti man. Taim em i kirap autim tok long wanpela yangpela man, em i kisim save olsem dispela man em i wanpela Witnes Bilong Jehova! Julissa i tok: “Na tu, draiva bilong dispela trak em i wanpela elda long kongrigesen ol i makim mi long i go long en!”

Ol Lapun i Insait Long Wok

Tasol dispela wok i no bilong ol yangpela tasol, nogat. Adela, em wanpela lapun sista, oltaim em i bin i gat laik long lusim bikpela taim moa long autim tok. Rot i op long em inap mekim olsem taim ol i singautim em long insait long dispela bikpela wok autim tok. Em i tok: “Mi amamas tru long wok ol i makim mi long mekim, olsem na mi askim ol elda long kongrigesen long larim mi i stap na mekim dispela wok inap sampela taim moa. Mi amamas, long wanem, maski mi lapun, mi inap yet long mekim wok bilong Jehova.”

Olsem Adela, pasin bilong tenkyu long Jehova na laikim tru ol man i kirapim Martha, em i gat 60 krismas, long givim em yet long mekim dispela bikpela wok autim tok. Teritori ol i makim Martha long i go long en i longwe, na i gat ol maunten samting na dispela i pasim grup bilong em long autim tok long olgeta man long dispela hap, olsem na em i baim wanpela ka bilong ol painia i ken yusim. Dispela i opim rot na ol inap i go long planti teritori moa na autim tok i tru bilong Baibel long planti man moa.

Ol Man i Amamas Long Harim Tok

Ol lain i insait long dispela bikpela wok autim tok ol i laik winim mak bilong mekim ol “manmeri i kamap disaipel.” Ol i bin mekim gutpela wok tru bilong inapim dispela mak. Ol manmeri i stap long ples i longwe ol i kisim tok i tru bilong Baibel em inap helpim ol long kisim laip. (Matyu 28:​19, 20) Ol i kirapim planti Baibel-stadi. Ol pablisa i stap long ol dispela hap o ol pablisa i stap bek long teritori ol i lukautim ol dispela Baibel-stadi. Long sampela hap ol i kirapim ol grup, na long sampela ol i kirapim ol liklik kongrigesen.

Magdaleno na lain bilong em ol i kisim PMV bilong i go long longwe teritori ol bai wok long en. Taim ol i ran long rot, ol i autim tok long draiva. Magdaleno i tok: “Dispela man i tokim mipela olsem long wik paslain, sampela Witnes i bin kam long haus bilong em taim em i no stap. Taim em i kam bek long haus, famili bilong em i tokim em long olgeta samting ol i bin harim. Mipela i tokim em olsem mipela i no stap klostu long dispela hap, nogat, mipela i bilong ol narapela narapela hap bilong kantri tasol mipela i kam bilong helpim dispela bikpela wok autim tok, na mipela wan wan yet i baim rot bilong mipela. Draiva i pilim tru wok mipela i mekim, olsem na em i tok long dispela wik yet em wantaim famili bilong em bai kirap stadi long Baibel. Em i helpim wok bilong mipela na em i tok mipela i no ken baim PMV.”

Magdaleno i kirap nogut tru long pasin bilong ol asples lain bilong ol maunten Chiapas. Em i tok: “Mi na meri bilong mi i autim tok bilong Kingdom long wanpela lain yangpela ol i save go long lotu Presbitirian, em namba bilong ol i 26 olgeta. Olgeta i putim gut yau inap 30 minit. Ol i kisim ol Baibel bilong ol, na mipela i autim gut tok long ol samting Jehova i tingting pinis long mekim. Planti manmeri ol i gat Baibel bilong ol yet long tok ples Tzeltal.” Ol i bin kirapim sampela gutpela Baibel-stadi.

Daunim Pasin Birua

I gat wanpela ples long Chiapas ol i no bin autim tok long en inap 2-pela yia, long wanem, sampela manmeri i bin birua long ol. Teresa, wanpela meri i save autim tok long olgeta de, em i lukim olsem sampela Witnes i pret long autim tok long dispela ples. Em i tok: “Mipela olgeta i kirap nogut taim ol manmeri i amamas long harim tok. Taim mipela i pinisim wok autim tok, bikpela ren tru i pundaun. Mipela i painim ples hait na mipela i kamap long haus bilong wanpela man em i amamas long mipela, em Sebastián, na em i larim mipela i go insait long haus na hait long ren. Taim mipela i go insait pinis long haus, mi askim em olsem i gat sampela i bin autim tok pinis long em o nogat. Taim em i tok nogat, mi kirap autim tok long em na kirapim Baibel-stadi long rot bilong buk Save i Bringim Man Long Laip Oltaim.b Taim mipela i pinis, aiwara bilong Sebastián i pundaun na em i strong long mipela i mas kam bek na stadi wantaim em.”

Narapela grup bilong ol painia em ol i go long Chiapas i stori olsem: “Jehova i helpim mipela na wok bilong mipela i kamapim ol gutpela samting. Long namba wan wik, mipela i kirapim 27 Baibel-stadi; long namba tu wik, mipela i singautim ol man i kam lukim video The Bible​—⁠Its Power in Your Life. Inap 60 manmeri i kam bung. Olgeta i amamas tru long dispela video. Long pinis bilong video, mipela i tok long kirapim wanpela grup bilong Baibel-stadi. Mipela i kirap nogut olsem mipela inap kirapim tupela grup long dispela ples.

“Taim mipela i autim tok pinis long ol teritori ol i makim mipela long wok long en, mipela i go bek long dispela ples long strongim ol man i laik harim tok, na long sekim ol Baibel-stadi grup mipela i bin kirapim. Mipela i singautim ol i kam long wanpela pablik-miting na Stadi Wastaua. Tasol i no gat wanpela hap i bikpela inap long mekim miting long en. Dispela man husat i orait long Baibel-stadi grup i ken yusim haus bilong em, em i makim han long baksait bilong haus na i tok: “Yumi ken mekim ol miting baksait long haus.’ ”

Long wiken, ol painia na ol man i laik harim tok, olgeta i go helpim wok bilong stretim ples bilong mekim miting. Inap 103 manmeri i kam bung long namba wan miting. Nau, inap 40 manmeri long dispela ples ol i mekim Baibel-stadi.

“Gutpela Samting Tru”

Ol gutpela samting tru i bin kamap long dispela wok autim tok, na tu, dispela wok i bin helpim tru ol lain i insait long en. María, em wanpela yangpela painia i bin insait long dispela bikpela wok autim tok, em i stori olsem long ol samting em i pilim: “I gat tupela as na dispela wok i gutpela samting tru. Amamas bilong mi long wok autim tok i kamap bikpela moa, na pasin bilong mi long pas gut wantaim Jehova i kamap strong moa. Wanpela taim mipela i go antap long maunten na mipela i pilim skin i les. Mipela i askim Jehova long helpim mipela, na taim mipela i mekim olsem pinis, mipela i pilim truim bilong Aisaia 40:​29-31, em i tok: ‘Ol manmeri i bilip long Bikpela na i wetim em i helpim ol, ol bai i stap strong oltaim.’ Olsem na mipela i go kamap long ples mipela i laik go long en, na mipela i mekim Baibel-stadi wantaim ol manmeri em ol i mekim gut long mipela.”

Narapela yangpela painia i gat 17 krismas, em Claudia, em i stori olsem: “Dispela wok i bin helpim mi long planti samting. Mi lainim pasin bilong mekim gut wok autim tok, na dispela i givim bikpela amamas long mi, na i kirapim mi long putim ol mak mi laik winim long ol samting bilong spirit. Na tu, mi kamap strong long ol samting bilong spirit. Long haus, mama tasol i save mekim olgeta wok samting na mi nogat. Tasol nau mi kisim sampela save moa long mekim ol wok, na mi no wet long mama i mekim. Olsem: Pastaim mi save laikim sampela kaikai tasol na sampela nogat. Tasol nau mi bin lain long senisim sindaun bilong mi na bai i stret long ol kain kain sindaun bilong ol man, olsem na nau mi no save toktok planti moa long ol kaikai. Dispela wok autim tok i bin helpim mi long kisim pasin bilong pren gut wantaim ol narapela. Mipela i save redi long helpim narapela narapela.”

Amamas Long Bungim Kaikai

Wanem ol samting i bin kamap long dispela bikpela wok autim tok? Long kirap bilong yia 2002, inap olsem 28,300 painia i bin insait long ol dispela painia-raun. Ol i bin mekim planti Baibel-stadi winim 140,000, na ol i bin lusim moa long 2 milion aua long wok autim tok. Bilong helpim ol man long kisim save long tok i tru bilong Baibel, ol i bin tilim klostu olsem 121,000 buk na 730,000 magasin. Planti painia i mekim olsem 20 Baibel-stadi.

Ol manmeri em ol painia i helpim, ol i tenkyu tru long bikpela hatwok ol painia i mekim bilong bringim tok bilong Baibel long ol. Maski ol i stap rabis tru, planti bilong ol i strong long ol pablisa i mas kisim ol mani samting ol i givim. Wanpela lapun meri i gat 70 krismas em i sot long ol samting, oltaim em i save givim samting long ol painia i go lukim em. Sapos ol i no laik kisim, em i save krai. Wanpela famili em ol i no gat planti samting, ol i tokim ol painia olsem kakaruk i putim kiau em bilong ol painia stret, na ol i strong long ol painia i mas kisim ol kiau.

Tasol bikpela samting moa, ol dispela manmeri i soim olsem ol i pilim tru ol samting bilong spirit. Olsem: Wanpela yangpela meri i save wokabaut wanpis inap 3 na hap aua bilong i go long ol miting Kristen, na em i no bin lusim wanpela miting. Wanpela lapun meri em i gat hevi long skru, em i lusim 2-pela aua bilong wokabaut i go na kisim save long ol tok bilong Baibel taim wasman raun i go lukim ol. Sampela em ol i no gat save long rit rait ol i laik lain long mekim olsem na bai skul bilong Baibel i ken helpim gut ol. Ol hatwok ol i mekim i bin kamapim ol gutpela samting tru.

Long Buk Aposel, Luk i stori long wanpela piksa olsem driman em aposel Pol i bin lukim, olsem: “Wanpela man bilong provins Masedonia i sanap na i singautim Pol na i tok olsem, ‘Yu mas brukim solwara na yu kam long Masedonia na helpim mipela.’ ” Pol i orait long dispela na em i bihainim singaut bilong dispela man. Long nau, long ol ples i stap longwe long Meksiko, planti man i bin bihainim dispela wankain pasin, na ol i givim ol yet long autim gutnius “long olgeta hap bilong graun.”​—⁠Aposel 1:8; 16:​9, 10.

[Ol Futnot]

[Piksa long pes 9]

Planti Witnes long Meksiko ol i bin insait long ol bikpela wok autim tok