“Stap Stret Long Ai Bilong God”
PLANTI taim yumi harim dispela tok: “Larim maus bilong bel i stiaim yu.” Tasol bambai maus bilong bel i ken stiaim gut yumi, yumi mas skulim gut bel long samting i stret na i no stret, na yumi mas bihainim maus bilong bel.
Tingim stori bilong wanpela man, nem bilong em Sakius, na Baibel i stori long em. Sakius i bin sindaun long Jeriko, na em i hetman bilong ol man bilong kisim takis, na em i gat planti mani. Olsem em yet i tok, em i kisim bikpela mani kago bilong em long pasin bilong giaman na pulim planti mani—em pasin planti man i kisim hevi long en. Olsem wanem? Maus bilong bel bilong Sakius i kotim em long ol pasin nogut em i mekim? Sapos bel i bin kotim em, ating em i sakim tasol.—Luk 19:1-7.
Tasol wanpela samting i kamap na Sakius i skelim pasin bilong em. Jisas i kam long Jeriko. Sakius i sotpela man na em i laik lukim Jisas, tasol em i no inap, long wanem, i gat bikpela lain manmeri i stap. Olsem na em i ran i go pas na i go antap long wanpela diwai bai em i ken lukim Jisas. Jisas i kirap nogut long bikpela laik bilong Sakius, na em i tokim Sakius olsem em bai kam lukim em long haus bilong em. Sakius i amamas tru long dispela man i gat nem i kam long haus bilong em.
Ol samting Sakius i lukim na harim taim em i stap wantaim Jisas i sutim tru bel bilong em na kirapim em long senisim pasin bilong em. Em i tok: “Bikpela, yu harim. Nau bai mi tilim olgeta samting bilong mi long tupela hap na givim wanpela hap long ol rabisman. Na sapos mi bin giamanim wanpela man na stilim wanpela samting bilong en, orait bai mi bekim 4-pela samting long en.”—Luk 19:8.
Ol tok bilong Jisas i skulim bel bilong Sakius, na em i harim na bihainim ol dispela tok. Ol gutpela samting i kamap long dispela i helpim tru planti manmeri. Tingim amamas bilong Sakius taim Jisas i tokim em: “Nau God i kisim bek pinis ol manmeri bilong dispela haus.”—Luk 19:9.
Man! Sakius i stap olsem gutpela piksa bilong strongim bel bilong yumi! Stori i kamapim klia olsem maski yumi mekim wanem kain pasin long bipo, yumi inap senisim pasin bilong yumi. Olsem Sakius, yumi inap bihainim tok bilong Jisas long Baibel na skulim tingting bilong yumi long samting i stret na i no stret. Orait nau yumi inap bihainim tok bilong aposel Pita na “stap stret long ai bilong God.” Yumi inap bihainim maus bilong bel em yumi skulim pinis na mekim ol samting i stret.—1 Pita 3:16.