Wanpela Gutpela Stori

MAN bilong raun na painim ol narapela kantri, Richard E. Byrd, em i bin raun long Antaktik inap 5-pela taim namel long 1928 na 1956. Long olgeta de em i bin raitim ol samting i bin kamap long wanpela notbuk bilong em, na tu, em i gat ol narapela buk we em i bin raitim ol samting bilong ol raun bilong em. Long dispela rot em yet na ol man i raun wantaim em ol i bin redim ol mep, na kisim save long wokabaut bilong win na planti samting bilong Antaktik.

Ol raun bilong Byrd i kamapim klia olsem em i gutpela long raitim long wanpela buk ol samting i kamap long taim man i raun long sip o long balus. Bihain ol inap mekim wok long ol dispela tok bilong tingim gen ol samting i bin kamap o bilong skelim ol samting bilong helpim ol man i raun long dispela hap long bihain.

Baibel i kamapim wanpela gutpela stori long Bikpela Tait long taim bilong Noa. Dispela Tait i bin stap inap wanpela yia samting. Bilong redi long dispela Tait, Noa, na meri bilong em, na tripela pikinini man na ol meri bilong ol, ol i bin wokim wanpela sip inap 50 o 60 yia​—⁠sip i traipela tru inap olsem 40,000 kubik mita. Wanem wok bilong dispela sip? Em bilong helpim sampela man na animal long abrusim bagarap long Tait.​​—⁠Stat 7:​1-3.

Buk Stat i gat stori bilong Noa long ol samting i bin kamap long kirap bilong Tait i go inap long taim Noa na famili bilong em i lusim sip. Olsem wanem? Dispela stori em i bikpela samting long yumi long nau?