Baibel i Tok Wanem?
Bikpela Tait—Samting Tru o Stori Nating?
‘Na wanpela man na wanpela meri long olgeta kain animal ol i go insait long sip wantaim Noa.’—Stat 7:8, 9.
ATING klostu olgeta man i bin harim stori long Bikpela Tait long taim bilong Noa. Taim yu pikinini ating yu bin harim dispela stori, a? Tru tumas, sapos yu go long haus buk bilong kisim save long Bikpela Tait, ating yu bai painim planti buk bilong pikinini i stori long dispela samting, winim ol buk bilong man i bikpela pinis na i stori long en. Olsem na ating yu bai ting stori bilong Bikpela Tait i wanpela stori nating bilong kaunim long ol pikinini taim ol i laik slip. Planti man i ting Bikpela Tait bilong Noa na planti ol narapela stori long Baibel, ol i stori nating tasol, o ol i gutpela stori man yet i bin kamapim bilong skulim yumi long bihainim stretpela pasin.
Na yumi kirap nogut, long wanem, sampela man i tok Baibel i as bilong ol bilip bilong lotu bilong ol tasol ol i gat tupela tingting long Bikpela Tait—em i bin kamap o nogat. Wanpela taim, Edward J. McLean, em wanpela pris Katolik, em i tok, stori bilong Noa i wanpela stori yumi yet i mas kamapim tingting bilong yumi long en, yumi no ken ting em wanpela samting tru i bin kamap bipo, “em i stori nating tasol.”
Tasol olsem wanem? Stori bilong Baibel long Bikpela Tait, em i wanpela stori nating na yumi no ken ting em i bin kamap tru? Baibel yet i larim yumi long ting olsem?
Ol Samting Yumi Inap Bilip Long En
Tingim stori bilong Moses long Buk Stat. Long dispela buk yumi painim yia, mun, na de Bikpela Tait i bin kirap, na taim sip i sindaun long maunten, na taim graun i drai. (Stat 7:11; 8:4, 13, 14) Buk Stat i no makim stret yia o mun samting bilong planti ol narapela samting i bin kamap, tasol Moses i raitim yia, mun, na de bilong Bikpela Tait na dispela i makim olsem em i bilip olsem dispela samting i bin kamap tru. Skelim tok i tru bilong Baibel wantaim namba wan tok bilong planti stori nating, olsem: “Long wanpela de . . .”
Na tingim sip bilong Noa. Baibel i stori olsem longpela bilong en inap olsem 130 mita, na braitpela inap 22 mita, na i go antap inap 13 mita. (Stat 6:15) Noa i no wanpela man bilong wokim sip. Na tingim, dispela wok i bin kamap inap olsem 4,000 yia i go pinis! Tasol olgeta hap bilong sip i stret tru bambai em inap mekim gut wok bilong en olsem wanpela traipela bokis i trip long wara. Long nau ol man bilong wokim piksa bilong ol nupela sip, ol i kisim save olsem sapos ol i wokim sip long wankain mak olsem bilong sip bilong Noa, dispela i stret bilong wokim wanpela strongpela sip i ken raun ausait tru long solwara. Baibel i no stori long hamas yia Noa i bin wokim sip, tasol taim yumi skelim dispela stori i olsem em i bin wok 50 o 60 yia samting. (Stat 5:32; 7:6) Ol dispela samting i narapela kain long Stori Bilong Gilgames bilong Babilon. Stori i tok long wanpela traipela bokis i skwe olgeta—em longpela inap 60 mita na braitpela inap 60 mita na i go antap inap 60 mita, na ol i bin wokim insait long 7-pela de tasol. Stori bilong Baibel long Bikpela Tait i no olsem dispela olpela stori bilong Babilon, nogat; yumi ken bilip olsem Baibel i stori stret long Bikpela Tait.
Inap 10-pela taim—Buk Stat i no insait long dispela—Baibel i stori long Noa o Bikpela Tait. Olsem wanem? Ol man i bin raitim ol dispela hap bilong Baibel, ol i bilip long Bikpela Tait olsem wanpela samting i bin kamap tru long bipo o ol i bilip olsem em i wanpela stori nating tasol?
Samting i Makim Olsem Yumi Inap Bilip
Long Baibel, nem bilong Noa i stap long tupela lista bilong ol tumbuna bilong lain Israel. Namba 2 lista i gat nem bilong Krais Jisas. (1 Stori 1:4; Luk 3:36) Esra na Luk, tupela man bilong raitim lista, ol i gat save long raitim stori bilong ol samting i bin kamap bipo, na tupela i bilip olsem Noa i bin stap tru.
Long sampela hap moa bilong Baibel, nem bilong Noa i stap wantaim nem bilong ol man i bin stap tru long bipo, na Baibel i tok Noa i man bilong bihainim stretpela pasin na man bilong bilip. (Esekiel 14:14, 20; Hibru 11:7) Olsem wanem? Yu ting ol man bilong raitim Baibel i bihainim gutpela tingting sapos ol i tokim yumi long bihainim pasin bilong wanpela man i no bin i stap tru? Nogat, a? Long wanem, dispela inap mekim na ol man i kaunim Baibel bai ting bilip i no wanpela samting ol man bilong graun inap kisim—em wanpela samting ol man insait long ol stori nating ol tasol inap kisim. Noa na ol narapela bilipman na bilipmeri i stap long Baibel, long wanem, ol i man na meri wankain olsem yumi—ol tu i bin popaia na bel hevi long sampela samting.—Hibru 12:1; skelim wantaim Jems 5:17.
Long ol narapela hap bilong Baibel, stori bilong Noa na Bikpela Tait i kamap taim Baibel i stori long strafe God i bin givim long ol manmeri i no bin bilip long taim bilong Noa. Tingim tok bilong Jisas long Bikpela Tait long Luk 17:26, 27: “Kain pasin ol i bin mekim long taim bilong Noa, ol bai i mekim wankain pasin tasol long taim Pikinini Bilong Man i laik i kam. Long taim bilong Noa ol i wok long kaikai na dring, na ol man i maritim ol meri, i go inap long taim Noa i go insait long sip. Orait na bikpela tait i bin kamap, na i bagarapim olgeta manmeri.”
Krais Jisas i bin lukim ol dispela samting em i stori long en, long wanem, taim em i no kamap man yet long graun em i bin stap laip long heven. (Jon 8:58) Sapos Bikpela Tait i wanpela stori nating, orait tok bilong Jisas olsem em bai kam bek, em tu i wanpela stori nating, o Jisas i giaman. Dispela tupela kain tingting i no stret wantaim ol narapela tok bilong Baibel. (1 Pita 2:22; 2 Pita 3:3-7) Krais Jisas i bin lukim Bikpela Tait na dispela i as na em i bilipim tok bilong Baibel olsem Bikpela Tait em wanpela samting tru i bin kamap bipo. Dispela i bikpela as na ol Kristen tru i bilip olsem Bikpela Tait bilong Noa i wanpela samting i bin kamap tru—i no wanpela stori nating.
[Piksa Kredit Lain long pes 16]
L. Chapons/Illustrirte Familien-Bibel nach der deutschen Uebersetzung Dr. Martin Luthers