Noa na Bikpela Tait—Stori Bilong En i Tru, i No Tumbuna Stori
OLSEM WANEM? Yu laik bai wanpela gutpela taim i ken kamap—em wanpela taim we olgeta manmeri i sindaun gut wantaim, na i no gat woa, pasin raskol, o pasin bilong daunim narapela? Sapos olsem, orait yu inap kisim strong long wanpela stori em ating yu save gut long en. Em stori bilong Noa, em wanpela gutpela man i bin wokim wanpela sip bilong lukautim em yet na famili bilong em taim wanpela bikpela tait i kamap long olgeta hap bilong graun na bagarapim ol man nogut.
Planti man i save long dispela stori. Stori bilong samting i bin painim Noa em i stap long Buk Stat, sapta 6 i go 9, long Baibel. Dispela stori i stap tu long buk Koran na ol tumbuna stori bilong planti lain long olgeta hap bilong graun. Olsem wanem? Tru Bikpela Tait i bin kamap, o em wanpela tumbuna stori tasol bilong kirapim ol man long bihainim stretpela pasin? Inap planti handet yia, ol tisa bilong lotu na ol saientis i bin paitim tok i go i kam long dispela askim. Tasol Baibel, em Tok Bilong God, i kamapim klia olsem stori bilong Noa na Bikpela Tait em i tru, na i no tumbuna stori. Tingim:
Stori long Buk Stat i kolim stret yia, mun, na de em Bikpela Tait i bin kirap, na i kolim tu taim na ples em sip i sindaun long maunten, na taim graun i drai. Na tu, dispela stori i kolim ol samting bilong dispela sip yet—hamas plua samting, na longpela na braitpela na antap bilong en i hamas mita, na ol samting ol i wokim sip long en. Tasol ol tumbuna stori i narapela kain, ol i no save kamapim ol yia na ples stret ol samting i bin kamap long en.
I gat tupela lista long Baibel i kolim nem bilong ol lain tumbuna na ol i kamapim klia olsem Noa em wanpela man i bin i stap tru. (1 Stori 1:4; Luk 3:36) Esra na Luk i bin kamapim dispela tupela lista, na ol i man bilong skelim gut ol samting. Luk i kolim nem bilong Jisas long lain bilong Noa.
Profet Aisaia na Esekiel, na Kristen aposel Pol na Pita, ol tu i bin stori long Noa o long Bikpela Tait.—Aisaia 54:9; Esekiel 14:14, 20; Hibru 11:7; 1 Pita 3:19, 20; 2 Pita 2:5.
Jisas Krais i bin stori long Bikpela Tait olsem: “Kain pasin ol i bin mekim long taim bilong Noa, ol bai i mekim wankain pasin tasol long taim Pikinini Bilong Man i laik i kam. Long taim bilong Noa ol i wok long kaikai na dring, na ol man i maritim ol meri, i go inap long taim Noa i go insait long sip. Orait na bikpela tait i bin kamap, na i bagarapim olgeta manmeri.” (Luk 17:26, 27) Sapos Bikpela Tait i no bin kamap, orait dispela tok Jisas i mekim long “taim Pikinini Bilong Man i laik i kam,” dispela bai i no gat as bilong en.
Aposel Pita i tok profet olsem, “ol man bilong tok bilas” bai kam na daunim tok bilong Baibel. Em i tok: “Ol i no laik tingting gut na save long dispela samting. . . . Bikpela tait i karamapim dispela graun [long taim bilong Noa], na graun i bagarap olgeta.” Yumi no ken bihainim pasin bilong ol na yumi no tingim “dispela samting,” nogat, long wanem, Pita i tok moa: “Skai na graun i stap na i wetim paia i kamap na i bagarapim ol. Skai na graun i wetim de bilong bikpela kot i kamap, na ol man i bin givim baksait long God, ol bai i bagarap olgeta.”—2 Pita 3:3-7.
Bihain, God bai kirap gen na bagarapim ol man nogut, na olsem bipo, bai i gat ol lain i abrusim bagarap. Sapos yumi bihainim pasin bilong Noa, bai yumi inap stap namel long ol stretpela man i go insait long nupela taim i kamap bihain.