Autim Tok Long Narakain Tok Ples Long Korea

WANPELA lain i givim bel tru, tasol ol i stap isi, ol i bung long wanpela kibung distrik bilong ol Witnes Bilong Jehova long 1997. Em namba wan kibung bilong ol yaupas i bin kamap long Korea. Ol lain i bung ol inap olsem 1,174. Long dispela kibung, ol i mekim olgeta tok, inteviu, na drama long tok ples bilong ol yaupas, na ol i sutim piksa bilong ol dispela samting long wanpela laplap em olgeta long Haus Kibung inap lukim. Em wanpela gutpela samting i bin kamap long hatwok ol volantia i bin mekim inap planti yia.

Bihain, taim graun i kamap Paradais, “ol yaupas bai ol i harim toktok.” (Aisaia 35:⁠5) Bilong kisim laip long Paradais, olgeta man, na ol yaupas tu, pastaim ol i mas go insait long paradais bilong spirit​—⁠long dispela ples ol manmeri bilong God ol i gat planti gutpela kaikai bilong spirit na ol i stap amamas. Ol i mas dediket na kamap Witnes Bilong Jehova i baptais pinis, na larim Jehova i skulim ol.​​—⁠Maika 4:​1-4.

Liklik Lain Tasol

Long 1960 samting ol i bin autim tok long sampela yaupas, na long 1970, sampela bilong ol yaupas i kirap long go long ol miting bilong ol Witnes Bilong Jehova long Seoul, biktaun bilong Korea. Wanpela brata Kristen em inap long rait hariap em i bin raitim ol bikpela tok bilong ol miting, na ol skripsa tu, long wanpela blakbot.

Long 1971 long biktaun Taejon, wanpela Witnes i gat wanpela pikinini man i yaupas, em i kirap skulim em, wantaim ol yaupas pren bilong em, long tok bilong Kingdom. Sampela bilong ol, nau ol i stap olsem nambawan bikpela helpim bilong ol yaupas long Korea.​​—⁠Sekaraia 4:​10.

Ol Yangpela i Amamas Long Helpim

Bilong ol yaupas i ken kisim save long Jehova na Jisas na wokabaut long rot bilong laip, i mas i gat sampela volantia moa long mekim bikpela wok bilong helpim ol. (Jon 17:⁠3) Bilong mekim olsem, sampela Witnes Bilong Jehova i bin lainim tok ples bilong ol yaupas na ol i bin kisim planti gutpela ekspiriens long dispela rot.

Park In-sun i gat 15 krismas, em i bin putim mak bilong lain long mekim tok ples bilong ol yaupas. Bilong mekim olsem, em i kamap wanpela aprentis long wanpela faktori we i gat 20 yaupas manmeri i mekim wok. Inap etpela mun em i wok wantaim ol bambai em i ken lainim tok ples na pasin bilong ol long tingim ol samting. Long yia antap em i kamap painia oltaim, o man bilong autim tok bilong Kingdom fultaim, na em i helpim sampela yaupas i laik kisim save long tok i tru bilong Baibel. Namba bilong ol yaupas i go bikpela hariap, na i no longtaim winim 35 i kam long ol miting bilong Sande.​​—⁠Song 110:⁠3.

Bihain ol i stretim rot bilong mekim ol miting long tok ples bilong ol yaupas long Seoul, em namba wan taim ol i mekim olsem. Brata Park In-sun i mekim wok olsem painia salim wantaim dispela grup. Nau em i save gut long tok ples bilong ol yaupas. Long sampela mun, em i mekim 28 Baibel-stadi wantaim ol yaupas. Planti bilong ol i kamap strong na i kamap ol Witnes Bilong Jehova.

Pasin bilong ol volantia long wok strong i mekim na namba wan kongrigesen long tok ples bilong ol yaupas i kamap long Seoul long Oktoba 1976 we i gat 40 pablisa na 2-pela painia oltaim. Dispela i bin strongim wok i kamap long ol narapela biktaun long Korea. Planti yaupas i hangre long harim gutnius na ol i wet long ol Witnes i kam lukim ol.

Wok Namel Long Ol Yaupas

Ating bai yu tingting olsem wanem ol i bin painim ol yaupas. Ol i bin painim planti yaupas long rot bilong narapela i tokim narapela. Na tu, ol i go lukim ol papa bilong ol stua i salim rais na kisim nem na atres bilong ol yaupas long ol. Sampela man i wok long ol ofis bilong gavman i helpim long givim nem samting. Pasin bilong wok strong long painim ol yaupas long hap ol i stap long en i kamap gutpela na i no longtaim na 4-pela kongrigesen long tok ples bilong ol yaupas i kamap. Ol i strongim planti yangpela Kristen long lainim tok ples bilong ol yaupas.

Brens-ofis bilong ol Witnes Bilong Jehova i bin salim ol painia salim husat i save long tok ples bilong ol yaupas long wok wantaim ol dispela kongrigesen. I no longtaim i go pinis, ol brata i bin go long Ministerial Trening Skul ol i bin go long ol dispela kongrigesen na strongim ol long ol samting bilong spirit.

I gat ol hevi ol i mas winim. Bilong autim tok long kain teritori olsem, ol i mas wok strong long save gut long tingting na pasin bilong ol yaupas. Ol yaupas i save tokaut stret long tingting na pasin bilong ol. Sampela taim dispela i save mekim ol manmeri i kirap nogut na ol inap kisim tingting kranki. Na tu, taim ol Witnes i mekim Baibel-stadi wantaim ol yaupas, ol i mas helpim ol yaupas long save gut long tok ples bilong ol yaupas na strongim ol long mekim moa yet pasin bilong ol long rit na stadi.

Long ol wok ol yaupas i mekim long wan wan de, i gat ol hevi i save painim ol em ol narapela i no inap save. Pasin bilong toktok gut long ol lain insait long ol ofis bilong gavman na haus sik samting na bilong mekim ol liklik wok samting bilong bisnis, planti taim ol dispela samting i givim bikpela hevi long ol. Tasol ol Witnes long ol kongrigesen i stap klostu i bin givim gutpela helpim, olsem na ol yaupas insait long kongrigesen Kristen ol i pilim tru gutpela pasin bilong i stap brata brata.​​—⁠Jon 13:​34, 35.

Autim Tok Long Kain Kain Taim na Ples

Long Pusan, em wanpela biktaun long hap saut bilong Korea, wanpela Witnes i bungim tupela yaupas man em ol i raitim tok long pepa olsem: “Mipela i laikim Paradais. Mipela i laik save long ol tok bilong Baibel i stori long laip oltaim.” Brata i raitim atres bilong ol na i stretim rot bilong i go bek lukim ol. Taim em i go bek, em i lukim ol yaupas i pulap long wanpela rum na i wet long harim tok bilong Kingdom. Dispela samting i kirapim em long lainim tok ples bilong ol yaupas. I no longtaim na wanpela kongrigesen bilong ol yaupas i kamap long Pusan.

Wanpela brata long dispela kongrigesen i lukim tupela yaupas i wokim han long narapela narapela na em i go bungim tupela. Em i painimaut olsem ol i bin go long wanpela miting bilong lotu, olsem na em i singautim ol long kam long Haus Kingdom long 2 klok apinun long dispela de yet. Ol i kam, na em i kirapim Baibel-stadi wantaim ol. Bihain liklik 2-pela yaupas i go long kibung distrik wantaim 20 narapela pren bilong tupela em ol tu i yaupas. Long dispela grup, sampela i bin dediketim laip bilong ol long Jehova. Tupela i bin kamap elda long kongrigesen bilong ol yaupas na wanpela i bin kamap kongrigesen sevent.

Gutpela Pe Long Pasin Bilong Wok Strong

Sampela yaupas i stap longwe long ol kongrigesen i mekim tok ples bilong ol yaupas, olsem na planti taim ol brata i mas tromoi bikpela hap taim na strong bambai ol inap helpim ol dispela yaupas long kisim kaikai bilong spirit long olgeta taim. Olsem: Bilong lukautim em yet, wanpela man i gat 31 krismas i save mekim wok bilong kisim pis klostu long nambis bilong wanpela ailan. Em i harim tok bilong Baibel long rot bilong liklik brata bilong em, em ol Witnes Bilong Jehova i bin toktok wantaim em. Bilong inapim hangre bilong em long samting bilong spirit, dispela yaupas man i raun long bot inap 16 kilomita bilong i go long biktaun Tongyoung, long sauten kos bilong Korea. Em i mekim olsem bilong bungim wanpela painia salim bilong wanpela kongrigesen bilong ol yaupas i stap long biktaun Masan. Long olgeta Mande, dispela painia salim i raun inap 65 kilomita bilong go mekim Baibel-stadi wantaim dispela yaupas.

Bilong go long ol miting bilong Sande long biktaun Masan, dispela Baibel-stadi i yaupas i mas kalap long bot na raun inap 16 kilomita na bihain em i mas kalap long bas na raun inap 65 kilomita. Pasin bilong em long wok strong i kamapim gutpela samting. Inap sampela mun tasol, em i kisim gut save long tok ples bilong ol yaupas, na em i lainim sampela moa rait bilong Korea, na bikpela samting moa em i kisim save long wanpela rot tasol bilong pas gut wantaim Jehova. Em i kisim save olsem em i bikpela samting long go long ol miting na go autim tok olgeta taim, olsem na em i go sindaun long hap em kongrigesen bilong ol yaupas i stap long en. Dispela i hatwok long em, long wanem, em i lusim wok bilong em long kisim pis em winmani bilong en inap 3,800 dola long wanpela mun, tasol em i kisim blesing long pasin bilong em long wok strong. Taim em i kamap strong long tok i tru, em i kisim baptais na nau em i amamas long mekim wok bilong Jehova wantaim famili bilong em.

Tanim Tok Ples Bilong Ol Yaupas

Planti taim yumi autim gutnius bilong Kingdom long rot bilong maus bilong yumi. Tasol bilong kamapim stret Tok Bilong God, em i bikpela samting long raitim long tok ples na bai em i ken stap longpela taim. Olsem, long taim bilong ol aposel, ol hetman i bin raitim ol buk na ol pas. (Aposel 15:​22-​31; Efesus 3:4; Kolosi 1:2; 4:​16) Long taim bilong yumi, i gat planti kaikai bilong spirit yumi kisim long rot bilong ol buk na nius Kristen. Ol i bin tanim tok bilong ol dispela buk long planti handet tok ples, na ol tok ples bilong ol yaupas tu. Bilong tanim long tok ples bilong ol yaupas bilong Korea, brens-ofis i gat wanpela dipatmen bilong tanim tok i go long tok ples bilong ol yaupas. Wanpela dipatmen bilong wokim video i wokim ol video long tok ples bilong ol yaupas. Dispela i helpim ol yaupas husat i save autim gutnius na ol man em ol i amamas long harim tok na ol i stap insait long ol kongrigesen long olgeta hap bilong Korea.

Maski planti man i save gut long tok ples bilong ol yaupas na ol i bin helpim long wokim ol dispela video, planti taim, nambawan gutpela lain bilong tanim tok em ol pikinini papamama bilong ol i yaupas. Ol i bin lainim tok ples bilong ol yaupas taim ol i bebi. Olsem na ol i save mekim gut tru tok ples, tasol moa yet, long rot bilong meknaisim lukluk bilong pes bilong ol, ol inap strongim ol tok na kamapim long pasin man i pilim tru long bel na dispela i save kirapim tru tingting na bel bilong ol yaupas.

Olsem yumi stori pinis, nau ol i save mekim ol bikpela na liklik kibung long tok ples bilong ol yaupas long Korea. Ol i mas mekim planti samting na tromoi bikpela mani, na taim bilong mekim ol dispela wok. Tasol ol lain i kam bung ol i tenkyu tru long dispela samting. Taim program bilong kibung i pinis, planti i stap liklik taim moa long ples kibung, long wanem, ol i laik bung yet wantaim ol narapela na toktok long ol gutpela kaikai bilong spirit ol i bin kisim. Dispela i kamapim klia olsem, bilong autim tok long dispela narakain tok ples, dispela i gat hatwok bilong en, tasol ol gutpela blesing bilong spirit i winim dispela hatwok.

[Piksa long pes 10]

Long Korea, ol i wokim ol dispela samting long video long tok ples bilong ol yaupas: “God i Laik Yumi Mas Mekim Wanem?,” “Amamas Long Ol Gutpela Samting Bilong Spirit Yumi Bin Kisim,” “Ol i Stap Olsem Piksa Bilong Givim Tok Lukaut Long Yumi Long Nau,” na “Rispektim Wok Bos Bilong Jehova”

[Ol Piksa long pes 10]

Daunbilo, kirap long han kais: Ol i wokim ol video long tok ples bilong ol yaupas long brens-ofis long Korea; ol i redim ol pasin bilong wokim han bilong makim ol wan wan samting long tok tiokratik; lain bilong tanim tok; ol i helpim man bilong wokim han long taim ol i wokim video