Wanpela Video Ol i Wokim Bilong Kirapim Ol Yangpela

PLANTI yangpela i kirap skelim gut pasin bilong ol taim ol i lukim dispela video Young People Ask​​—⁠How Can I Make Real Friends?a Dispela video i kamapim sampela gutpela tok bilong Baibel, na ol yangpela Kristen i kamapim tingting bilong ol, na wanpela gutpela drama bilong taim bilong yumi em stori bilong Daina long Baibel i as bilong en. (Stat, sapta 34) Ol yangpela long Meksiko i kamapim tingting bilong ol long dispela video.

Martha i tok: “Mi pilim tru dispela video. I luk olsem ol i wokim dispela video bilong mi stret. Mi ting olsem sapos tisa bilong mi na ol wanskul i save olsem mi wanpela Witnes Bilong Jehova, orait em inap. Tasol mi no autim tok long ol na kamapim long ples klia olsem mi wanpela Witnes. Mi tenkyu tru long olgeta tok Jehova i save givim, na moa yet ol tok i kirapim tru mipela olsem dispela video i mekim.”

Juan Carlos i tok: “Dispela video i kirapim mi long wokim tingting. Mi wanpela yangpela man, na mi bin mekim sampela pasin kranki na mi inap pilim tru pasin bilong sampela yangpela long dispela drama. Sampela yia i go pinis, mi giaman long bihainim stretpela pasin, tasol mi luksave kain laip olsem inap kamapim samting nogut. Bihain long taim mi lukim dispela video, mi tingting strong long i stap gut long Jehova.”

Sulem i tokaut: “Taim mi lukim dispela video, dispela i kirapim mi tru. Paslain long dispela, mi no ritim Baibel moa, na mi no save beten tumas long Jehova. Taim mi harim ol tok ol yangpela long dispela video i mekim, dispela i kirapim mi long stat gen long stadim Baibel na beten long Jehova.”

Ol yangpela long nau i save bungim planti hatwok, na ol poroman ol i makim inap stiaim wokabaut bilong ol. (Song 26:4; Sindaun 13:20) Dispela video Young People Ask​​—⁠How Can I Make Real Friends? i wok long helpim planti yangpela long makim gut ol man ol i laik poromanim.

[Futnot]