Gutnius i Karim Kaikai Long Sau Tome na Prinsipi

ATING planti manmeri i no save long Sau Tome na Prinsipi. Ol buk i save stori long ol ples bilong malolo, i no save stori long dispela tupela ailan. Long wol mep, tupela ailan i luk olsem liklik mak klostu long nambis bilong Galf ov Gini long wes kos bilong Afrika. Sau Tome i stap antap long ekweta na Prinsipi i stap long hap not-is bilong Sau Tome. Ren i save pundaun na san i hat, olsem na i gat gutpela bikbus i karamapim ol maunten em ol i go antap inap 2,000 mita.

Naispela blupela solwara na ol diwai pam long nambis i raunim ol dispela ailan, na ol manmeri i stap long dispela tupela ailan ol i gat pasin pren, na gutpela pasin​—⁠ol i bilong Afrika na Yurop, olsem na gutpela pasin bilong ol dispela ples i bung wantaim. Inap 170,000 manmeri i stap long dispela hap na ol i insait long wok bilong salim kakau i go long ol narapela kantri, o mekim wok gaden na kisim pis. Inap sampela yia nau i bin hatwok long kisim kaikai bilong wan wan de.

Tasol long laspela 10-pela yia samting i go pinis, wanpela samting i bin kamap em dispela i bin stiaim sindaun bilong planti manmeri moa long ol dispela ailan. Long Jun 1993, gavman bilong Sau Tome na Prinsipi i orait long ol Witnes Bilong Jehova, na dispela i pinisim wanpela longpela haptaim ol Witnes Bilong Jehova i bin karim hevi long en long ol dispela ailan.

Planim Pikinini Kaikai Long Taim Bilong Hevi

I luk olsem namba wan Witnes i bin kam long ol dispela ailan long yia 1951 samting, taim ol i salim ol kalabusman bilong ol narapela kantri bilong Afrika em Potugal i bosim, long i go wok kalabus long ol dispela ailan. Dispela Witnes bilong Afrika, em i wanpela painia o man bilong autim tok fultaim, na ol i rausim em long Mosambik, long wanem, em i autim gutnius bilong Kingdom bilong God. Dispela wanpis Witnes i autim tok, na insait long 6-pela mun i gat 13 narapela man i autim gutnius. Bihain, long wankain as ol i salim sampela narapela Witnes long Angola i kam long dispela hap. Long taim ol i kalabus, ol i autim gutnius long ol asples taim rot i op.

Long 1966, olgeta brata i wok kalabus long Sau Tome, ol i go bek pinis long Afrika. Liklik lain pablisa i stap long ailan, ol i strongim bel na i mekim yet wok autim tok. Ol man i birua long ol, na paitim ol, na kalabusim ol, long wanem, ol i bung wantaim bilong stadi long Baibel, na i no gat man bilong go lukim ol o strongim ol. Sau Tome i kisim independens long Potugal long 1975, na isi isi pikinini kaikai bilong tok i tru bilong Kingdom i stat long karim kaikai.

Lain i Go Bikpela na Haus Kingdom

Long Jun 1993, taim gavman i orait long ol Witnes, i gat olsem 100 pablisa i autim tok bilong Kingdom. Long wankain yia, ol painia salim bilong Potugal i kam. Ol i wok strong long lainim tok ples Kriol bilong Potugal, na dispela i mekim na ol asples i laikim ol. Wok bilong painim hap graun bilong wokim Haus Kingdom i kamap bikpela samting. Taim wanpela sista, nem bilong em Maria, i harim tok long dispela samting, em i givim nating hap graun liklik haus bilong em i sanap long en. Dispela hap graun i bikpela inap long wanpela bikpela Haus Kingdom. Maria i no save olsem ol bisnisman bilong wokim ol haus samting i laikim dispela hap graun, long wanem, em i no gat wanpela wanblut i stap laip. Wanpela de wanpela bikpela bisnisman i kam toktok wantaim Maria.

Em i tokim Maria olsem: “Ol stori bilong yu mi harim i no gutpela! Mi harim olsem yu givim nating graun bilong yu. Yu save olsem dispela graun i gat bikpela pe bilong en, long wanem, em i stap long biktaun stret?”

Maria i askim dispela man olsem: “Sapos mi givim dispela graun long yu, bai yu givim hamas mani long mi?” Taim man i no bekim tok, Maria i tok moa olsem: “Maski yu givim olgeta mani bilong dispela graun long mi, em bai i no inap, long wanem, mani i no inap baim laip.”

Dispela man i askim Maria olsem: “Yu no gat ol pikinini, a?”

Bilong pinisim toktok, Maria i tok: “Dispela graun em i bilong Jehova. Em i bin givim mi na mi stap long en inap planti yia, na nau mi givim i go bek long em. Mi wet long taim mi ken stap laip oltaim oltaim.” Orait em i askim dispela man: “Ating yu inap givim laip oltaim long mi, a?” Dispela man i no mekim wanpela tok, na em i tanim na i wokabaut i go.

Olsem na ol i wokim wanpela naispela haus i gat 2-pela plua long en, ol brata long Potugal i gat save ol i kam helpim dispela wok. Long dispela haus, i gat bikpela rum aninit long haus, wanpela bikpela Haus Kingdom, na ol ples slip. Na tu, i gat ol klasrum bilong mekim skul bilong ol elda, kongrigesen sevent, na ol painia. Nau tupela kongrigesen i save mekim ol miting bilong ol long en, olsem na dispela haus i kamap gutpela ples bilong kisim skul long lotu i tru long biktaun.

Long Mé-Zochi, i gat wanpela kongrigesen i gat 60 pablisa long en. Ol i save mekim ol miting long wanpela Haus Kingdom i no gutpela tumas na i stap insait long gaden banana, olsem na ol i mas kisim wanpela gutpela Haus Kingdom. Ol i tokim siti kaunsil long dispela samting, na ol ofisa i sori na i givim wanpela gutpela hap graun long bikrot bilong taun. Ol brata bilong Potugal i helpim ol na long pasin bilong wokim hariap ol haus, ol i wokim wanpela naispela Haus Kingdom insait long tupela mun. Ol asples i kirap nogut long samting ol i lukim. Wanpela ensinia bilong Swiden i insait long wok bilong wokim ol haus long siti, em i kirap nogut long lukim ol brata na sista i mekim wok. Em i tok: “Dispela em i narakain samting tru! Ol Witnes Bilong Jehova hia long Mé-Zochi, ol i bihainim pasin bilong wokim hariap ol haus! Mipela i mas bihainim dispela pasin bilong stretim wok bilong mipela.” Ol i dediketim dispela Haus Kingdom long Jun 12, 1999, na inap 232 i bung. Dispela haus i stap olsem namba wan gutpela samting ol turis i laik lukim taim ol i kam long biktaun Mé-Zochi.

Bikpela Kibung

Wanpela bikpela samting bilong ol Witnes Bilong Jehova long Sau Tome na Prinsipi em tripela de “God i Skulim Yumi” Kibung Distrik long Janueri 1994​—⁠em namba wan kibung i kamap long ol dispela ailan. Ol i mekim kibung long bikpela haus bung i gat eakon, dispela haus em nambawan gutpela haus bung bilong kantri. Tingim bikpela amamas bilong 116 pablisa taim ol i lukim 405 i bung, na em namba wan taim ol inap lukim ol pilai bilong Baibel na kisim ol nupela buk samting long kibung. Inap 20 manmeri i dediket pinis ol i kisim baptais long nambis.

Wanpela narakain samting em ol man i luksave long en, em kat bilong kibung ol brata sista i pasim. Inap 25 manmeri bilong Potugal na Angola i kam long kibung na dispela i kamapim klia olsem ol manmeri i bung ol i bilong narapela narapela kantri. Pasin Kristen bilong laikim tru narapela i kamap, na planti ol i krai taim kibung i pinis na ol i tok gutbai.​​—⁠Jon 13:⁠35.

Ol niusman bilong Nesenel Redio i kam na toktok wantaim wasman bilong kibung. Ol i kisim sampela tok bilong kibung na putim long redio. Tru tumas, em i wanpela bikpela samting, na long ol dispela gutpela Witnes i stap longwe, dispela i mekim na i olsem oganaisesen bilong Jehova i stap klostu long ol.

Karim Kaikai Bilong Givim Biknem Long Jehova

Taim tok bilong Kingdom i karim kaikai, em i kirapim man long mekim gutpela pasin i givim biknem na ona long Jehova. (Taitus 2:​10) Wanpela yangpela meri i amamas long ol samting em i wok long lainim long olgeta wik taim em i stadi long Baibel. Tasol papa bilong em i pasim em long go long ol miting bilong kongrigesen. Long gutpela pasin em i stori gut long papa olsem ol miting Kristen em i bikpela samting, na em i gat bikpela laik long i go long ol dispela miting, papa i rausim em long haus. I luk olsem papa i bin ting pikinini bilong em bai mekim samting planti yangpela i save mekim​—⁠kwiktaim go stap wantaim wanpela man husat bai lukautim em. Taim papa i kisim save olsem pikinini i bihainim gutpela pasin, na em i stap klin olsem wanpela Kristen, dispela i kirapim papa long kisim bek pikinini na i larim em i stap fri olgeta long mekim wok bilong Jehova.

Narapela stori em i bilong lida bilong wanpela grup bilong mekim musik. Em i no amamas long pasin nogut em i save mekim. Long taim em i wok long painim as bilong i stap bilong em, ol Witnes i bungim em. Taim em i kirap long bihainim stretpela pasin olsem Baibel i kolim, planti manmeri bilong taun i stori long em. I no longtaim em i luksave olsem em i mas lusim olgeta poroman nogut. (1 Korin 15:33) Bihain em i mekim bikpela samting olsem kisim baptais bilong makim olsem em i dediket pinis long Jehova.

I gat sampela yangpela i wok long painim trupela lotu. Dispela i mekim na ol i toktok wantaim ol pasto bilong sampela evanjelikal grup, tasol ol i paul na tingting planti moa yet. Olsem na ol i kamap ol man nogut bilong slip nabaut long rot na rabisim olgeta samting bilong lotu.

Wanpela de wanpela Witnes Bilong Jehova, em wanpela misineri, em i wokabaut i go bilong mekim wanpela Baibel-stadi na em i kam kamap long hap we ol dispela yangpela i stap. Ol dispela yangpela i laik bai misineri i mas bekim sampela askim na ol i kisim em i go baksait long haus na tokim em long sindaun long wanpela liklik sia. Orait nau ol i tromoi ol askim long em long spirit bilong man i no inap i dai, helpaia, laip long heven, na pinis bilong pasin bilong dispela graun. Dispela Witnes i bekim olgeta askim bilong ol long Baibel em lida bilong ol dispela raskol i givim em. Wanpela aua bihain, lida bilong ol, nem bilong em Law, i tokim misineri olsem: “Taim mipela i askim yu long kam na bekim ol askim bilong mipela, mipela i gat tingting long tok bilas long yu, olsem mipela i bin mekim long ol narapela lotu. Mipela i ting i no gat wanpela man inap bekim ol dispela askim. Tasol yu mekim, na yu bekim long rot bilong Baibel tasol! Tokim mi, olsem wanem mi ken kisim sampela save moa long Baibel?” Misineri i kirapim Baibel-stadi wantaim Law, na i no longtaim na em i kirap long go long ol miting. Bihain liklik, em i lusim dispela grup na em i lusim pasin nogut bilong em. Insait long wanpela yia, em i dediketim laip bilong em long Jehova na kisim baptais. Nau em i mekim wok olsem wanpela kongrigesen sevent.

Wanpela pasin bilong ples em planti i save mekim em man na meri i stap nating wantaim na i no marit stret. Planti manmeri i stap nating wantaim inap planti yia, na ol i gat ol pikinini. Ol i hatwok long bihainim tingting bilong God long dispela samting. Yumi amamas long save olsem wanem Tok Bilong God i bin helpim wanpela man long winim dispela hevi.​​—⁠2 Korin 10:​4-6; Hibru 4:​12.

Antonio i save olsem em i mas stretim marit bilong em na em i stretim rot bilong mekim olsem bihain long taim em i kamautim kon bilong em bambai em i gat sampela mani bilong mekim kaikai bilong marit. Wanpela nait paslain long kamautim kon, ol stilman i kam na stilim kon bilong em. Em i tingting long wet long narapela yia bilong kamautim ol narapela kon em i planim, tasol ol man i stilim gen. Taim em i traim narapela rot bilong kisim mani bilong marit bilong em na dispela i no wok, orait nau Antonio i luksave husat tru i birua long em. Em i tok: “Satan bai i no inap giamanim mi moa. Insait long wanpela mun na hap mipela bai i marit, maski i gat kaikai bilong marit o nogat!” Olsem na ol i marit, na ol i kirap nogut olsem ol pren i givim ol kakaruk, pato, na wanpela meme long kaikai bilong marit. Bihain long ol i rejistaim marit, Antonio na meri bilong em wantaim 6-pela pikinini bilong tupela, ol i kisim baptais bilong makim olsem ol i dediket pinis long Jehova.

Ailan Prinsipi

Inap sampela yia pinis, ol wasman sekit na ol painia bilong Sau Tome i bin raun i go lukim ol 6,000 manmeri bilong Prinsipi. Ol manmeri bilong dispela ailan i save lukautim gut ol narapela, na ol i amamas long harim ol tok ol Witnes i autim. Taim wanpela man i ritim pinis liklik nius ol painia i bin lusim long em, long narapela de em i raun painim ol dispela painia na i tok em i laik helpim ol long tilim ol liklik nius long ol man. Ol painia i tok em wok bilong ol long mekim, tasol dispela man i strong long poromanim ol long ol haus na bai em i ken stori long ol painia long ol man bilong haus na tokim ol long harim gut tok. Bihain dispela man i lusim ol, tasol paslain em i tok amamas long ol painia long bikpela wok ol i wok long mekim.

Long 1998, tupela painia bilong Sau Tome i go long Prinsipi, na i no longtaim na ol i lukautim 17 Baibel-stadi. Wok i wok long i go bikpela, na bihain liklik averes bilong ol man i kam long Buk-Stadi Bilong Kongrigesen em 16, na winim 30 i kam long pablik-tok. Ol i tokim siti kaunsil long ol i mas kisim ples bilong mekim ol miting, na gutpela tru, ol i givim wanpela hap graun bilong wokim Haus Kingdom long en. Ol brata long Sau Tome i volantia long wokim wanpela liklik Haus Kingdom we i gat ples slip tu bilong tupela painia salim.

Yumi save gutnius i wok long karim planti kaikai na i wok long i go bikpela long ol ailan i stap longwe. (Kolosi 1:​5, 6) Long Janueri 1990, i gat 46 pablisa long Sau Tome na Prinsipi. Long sevis yia bilong 2002, i gat 388 man bilong autim tok bilong Kingdom! Winim 20 pesen bilong ol pablisa i insait long fultaim sevis, na ol i lukautim inap olsem 1,400 Baibel-stadi. Long 2001 inap 1,907 i bin kam long Memorial, dispela namba i winim olgeta taim bipo. Tru tumas, long ol dispela ailan tok bilong Jehova i wok long kamap strong na kisim biknem.​​—⁠2 Tesalonaika 3:⁠1.

[Blok/Piksa long pes 12]

Wanpela Program Long Redio Planti Man i Laikim

Wanpela buk planti manmeri long ol dispela ailan i laikim tumas em Askim Bilong Ol Yangpela​—⁠Ol Gutpela Bekim.a Long olgeta 2-pela 2-pela wik, i gat wanpela 15 minit program i gat dispela het-tok i save kamap long Nesenel Redio. Man! Bai yu amamas taim yu harim niusman bilong redio i tromoi askim olsem, “Ol yangpela, olsem wanem yu inap save yu laikim em tru o bel i kirap nating tasol?” na bihain em i ritim sampela hap bilong dispela buk! (Lukim sapta 31.) Wankain program i save kamapim sampela hap bilong buk Rot Bilong Famili i Ken Stap Amamas.b

[Ol Futnot]

[Piksa long pes 9]

Namba wan Haus Kingdom long Sau Tome long 1994

[Ol Piksa long pes 10]

1. Haus Kingdom ol i wokim hariap long Mé-Zochi

2. Ol i mekim kibung distrik long dispela bikpela haus bung

3. Ol lain i kisim baptais long kibung ol i amamas

[Piksa Kredit Lain long pes 8]

Globe: Mountain High Maps® Copyright © 1997 Digital Wisdom, Inc.