“Mi Painim Ol Poroman, Pasin Laikim, na Pasin Bilong Tingim Narapela”
“SAPOS yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Olsem Jisas i tok, pasin laikim i kamap olsem mak bilong ol brata Kristen bilong pastaim. Winim 100 yia bihain long indai bilong Krais, Tertullian i kamapim tok bilong ol man i bin lukim pasin bilong ol Kristen, ol i tok: ‘Narapela i laikim tru narapela na i redi long i dai bilong helpim em.’
Olsem wanem? Yumi ken painim yet kain pasin laikim olsem long dispela taim? Yumi inap. Skelim dispela pas em brens-ofis bilong ol Witnes Bilong Jehova long Brasil i kisim. Meri i raitim pas, em Marília, em i tok:
“Taim mipela stap long Villa Mercedes, long Ajentina, mama—em i Witnes Bilong Jehova—i kisim sik ostio-atraitas na dispela i mekim hap bodi bilong em long bel i go long lek i dai. Insait long 8-pela mun taim sik i kirap, ol Witnes long Villa Mercedes tasol i mekim pasin sori long em, tingim em na lukautim em. Ol i mekim olgeta samting, klinim haus bilong em na redim kaikai bilong em. Na tu, taim mama i stap long haus sik, wanpela i save stap wantaim em long san na long nait.
“Mitupela mama i kam bek pinis long Brasil, na em i wok long kamap orait. Long hap nau mipela stap long en ol Witnes i mekim olgeta samting ol inap mekim bilong helpim mama long kamap orait.”
Marília i pinisim pas bilong em olsem: “Mi mas tokaut olsem mi yet i no wanpela Witnes, tasol mi painim ol poroman, pasin laikim, na pasin bilong tingim narapela, namel long ol Witnes.”
Tru tumas, i gat sampela man i stap yet em ol i save mekim pasin Kristen tru bilong laikim narapela. Ol i mekim olsem na ol i kamapim klia olsem tok bilong Jisas i gat strong bilong senisim man.