Yu Inap Bilip Olsem Graun Bai Kamap Paradais?
I NO planti man i bilip olsem bihain graun bai kamap wanpela paradais. Planti ol i ting dispela graun i no ken i stap oltaim oltaim. Buk The Sacred Earth, bilong Brian Leigh Molyneaux, i tok, dispela graun i bin kamap taim ‘i gat wanpela bikpela pairap i kamap antap,’ olsem pairap bilong bom, inap planti milion yia i go pinis. Na sapos ol man yet i no bagarapim graun olgeta, planti ol i bilip olsem graun na ples antap bai ‘kamap olsem wanpela bal i paia olgeta.’
Wanpela man bilong raitim ol stori, em John Milton bilong Inglan, em i bin i stap olsem 300 yia bipo, em i no gat wankain tingting. Long stori bilong em, Paradise Lost, em i tok God i bin wokim graun bilong kamap wanpela paradais bilong ol man i ken i stap long en. Dispela Paradais bilong pastaim i lus pinis. Tasol Milton i bilip olsem em bai kamap bek—olsem Jisas Krais, em man bilong kisim bek ol man, bihain em bai i “praisim ol man i stap gut long em, na kisim ol bilong i stap amamas tru . . . long Heven o long Graun.” Milton i tok: “Long wanem, long dispela taim Graun bai kamap Paradais.”
Paradais—Long Heven o Long Graun?
Planti man bilong lotu ol i gat wankain tingting olsem Milton, olsem bihain ol man bai kisim wanpela kain pe long ol bikpela hevi na pen ol i bin karim hia long graun. Tasol ol bai kisim dispela pe we? Ol bai kisim “long Heven o long Graun”? Sampela man i no ting ol bai kisim long graun. Ol i tok ol man bai kisim dispela “amamas tru” taim ol i lusim graun na ol i stap long wanpela ples spirit long heven.
Long wanpela buk (Heaven—A History), C. McDannell na B. Lang i tok, wanpela tisa bilong lotu, em Irenaeus, i bin stap long 100 yia samting bihain long Krais, em i bilip olsem, i stap bilong ol man long paradais i kamap bek, em i “no ken kamap long wanpela longwe ples long heven—em bai kamap long graun.” Dispela buk i tok, tru John Calvin na Martin Luther i gat tingting long i go long heven, tasol ol i bilip tu olsem “God bai stretim bek graun.” Ol man bilong sampela ol narapela lotu i gat wankain bilip. McDannell na Lang i tok tu olsem, sampela man Juda i bilip olsem: Long taim God i makim, olgeta hevi bilong ol man “bai i tekewe na ol bai i gat gutpela sindaun tru long graun.” Ol Persia bilong bipo ol i bilip olsem “graun bai kamap gutpela ples gen olsem bilong pastaim na ol manmeri bai stap bel isi gen wantaim.”—Buk The Encyclopaedia of Middle Eastern Mythology and Religion.
Olsem wanem? Ating ol man i lusim pinis dispela tingting long graun bai kamap olsem paradais? Yu ting yumi bilong i stap sotpela taim tasol long graun? Yu ting yumi bilong “i stap liklik hap taim tasol na painim planti hevi” na bihain yumi kamap long wanpela ples spirit na stap long en, olsem wanpela Juda long taim bilong ol aposel, em Filo, em i bilip long en? O yu ting God i gat narapela laik taim em i bin wokim graun na putim ol man long en na ol i stap long gutpela ples Paradais? Inap ol man i ken inapim tru ol laik bilong spirit i stap long bel bilong ol na ol i ken i stap amamas tru hia long graun? I gutpela yu ken skelim tok bilong Baibel long dispela samting, a? Ating bai yu kisim tingting—olsem planti milion manmeri i kisim pinis—olsem yu inap tru long bilip na wetim Paradais i kamap bek long graun.
[Piksa long pes 3]
John Milton, em man bilong raitim stori, em i bilip olsem Paradais bai kamap gen
[Piksa Kredit Lain long pes 2]
COVER: Earth: U.S. Fish & Wildlife Service, Washington, D.C./NASA
[Ol Piksa Kredit Lain long pes 3]
Earth: U.S. Fish & Wildlife Service, Washington, D.C./NASA; John Milton: Leslie’s