Yu Tingim Yet?
Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:
• I gat hamas sapta bilong Buk Maika? Ol i bin raitim Buk Maika long wanem taim, na long dispela taim ol manmeri i stap olsem wanem?
Buk Maika i gat 7-pela sapta. Profet Maika i bin raitim dispela buk long yia 700 B.C.E. samting, taim ol manmeri bilong God i bruk long tupela lain—Israel na Juda.—8/15, pes 9.
• Olsem Maika 6:8 i tok, God i laik yumi mas mekim wanem?
Yumi mas bihainim “stretpela pasin.” Pasin bilong Jehova long mekim ol samting, dispela i stap olsem lo i makim stretpela pasin, olsem na yumi mas bihainim ol pasin i stret. Em i tokim yumi long “laikim gutpela pasin sori,” (NW, sta daunbilo). Ol Kristen i bin mekim gutpela pasin sori taim ol i helpim ol narapela, olsem long taim ol bikpela bagarap i kamap. Bilong “daunim tingting bilong yumi yet na i stap wanbel wantaim” Jehova, yumi mas save long mak bilong strong bilong yumi na bilip long em.—8/15, pes 20-22.
• Taim wok mani bilong wanpela Kristen i lus, ating em i ken mekim wanem?
Em i gutpela tingting long skelim gut sindaun bilong em. Ating em i ken lusim sampela samting bilong skin olsem lusim bikpela haus na go sindaun long wanpela haus i liklik o lusim sampela samting bilong skin i no olsem em i mas i gat. Em i bikpela samting long em i no ken tingting planti tumas long ol samting em i mas kisim bilong i stap laip, em i mas bilip long God inap painim rot bilong helpim em long kisim ol samting em i mas i gat. (Matyu 6:33, 34)—9/1, pes 14-15.
• Yumi mas tingim wanem samting taim yumi givim presen long ol lain i marit o yumi kisim presen bilong marit?
Yumi no gat wok long givim ol presen i gat bikpela pe o tingting long kisim presen i gat bikpela pe long en. Tingting i stap long bel bilong man i givim samting em i bikpela samting. (Luk 21:1-4) Em i no gutpela pasin long kolim nem bilong man i givim presen. Sapos yumi mekim olsem, dispela inap givim sem long man. (Matyu 6:3)—9/1, pes 29.
• Bilong wanem yumi mas beten oltaim?
Pasin bilong beten olgeta taim i helpim yumi long pas gut wantaim God na i helpim yumi long karim ol bikpela hevi. Beten bilong yumi i ken sotpela o longpela inap long mak bilong ol samting i kamap. Beten i save strongim bilip na i helpim yumi long stretim ol hevi.—9/15, pes 15-18.
• Wanem insait bilong 1 Korin 15:29, em sampela Baibel i tanim olsem “baptais bilong helpim ol man i dai pinis”?
Tok bilong Pol i makim olsem ol Kristen, em God i bin makim ol long spirit holi, ol i baptais, o go insait tru, long rot bilong holimpas bilip i go inap long ol i dai, olsem Krais i bin mekim. Bihain ol bai kirap bek na kisim laip long heven olsem Krais i bin mekim.—10/1, pes 29.
• Olsem wanem yumi save olsem bilong kamap Kristen, dispela i no makim olsem yumi no ken mekim ol rong em 1 Korin 6:9-11 i tok long en na em tasol?
Taim Pol i kolim ol pasin nogut olsem pasin pamuk, lotu long giaman god, na spak, tok bilong em i no pinis long dispela hap, nogat. Tok bilong em long narapela ves i soim olsem Kristen i mas mekim sampela senis moa, em i tok: ‘Olgeta samting i orait long yumi mekim, tasol i no olgeta samting i save helpim yumi long i stap gut.’—10/15, pes 18-19.
• Husat sampela meri long bipo em ol i mekim bel bilong Jehova i amamas?
Sifra na Pua, tupela i save helpim ol meri long taim ol i laik karim pikinini. Tupela i sakim tok bilong king na i no kilim ol pikinini man bilong ol Israel. (Kisim Bek 1:15-20) Rahap, wanpela pamukmeri bilong Kenan, em i lukautim tupela man Israel i go lukstil. (Josua 2:1-13; 6:22, 23) Gutpela tingting bilong Abigel i mekim na planti man i abrusim bagarap na Devit i no kisim asua long kapsaitim blut bilong ol man. (1 Samuel 25:2-35) Ol i stap gutpela piksa bilong ol meri long nau.—11/1, pes 8-11.
• Olsem wanem “ol sta long skai i pait” long Sisera olsem Hetman 5:20 i tok?
Sampela man i tok dispela tok i makim olsem God i bin helpim ol Israel. Sampela narapela i tok dispela i makim olsem ol ensel i helpim ol Israel, o ol ston (meteorite) i pundaun i kam daun, o Sisera i lukluk long ol sta bilong save em bai win o nogat. Baibel i no stori long olsem wanem ol sta i insait long dispela pait, olsem na yumi ken ting olsem dispela tok i makim sampela samting God i mekim bilong helpim ol Israel.—11/15, pes 30.
• Planti lain long olgeta hap bilong graun i les long lotu, tasol i gat wanem as na planti manmeri i save tok ol i bilip long God?
Sampela manmeri i go long lotu bilong painim bel isi. Sampela narapela i wet long kisim laip oltaim bihain long ol i dai, o ol i laik i gat gutpela helt, o kisim planti mani samting, na wok bilong ol i ken kamap gutpela. Long sampela hap, ol manmeri i save go long lotu na bai ol i ken painim ol samting bilong spirit ol i lus long en taim pasin Komiunis i pinis na ol tingting bilong wok bisnis i kamap strong. Sapos Kristen i save long ol dispela samting, dispela i ken helpim em long mekim ol tok i stret long man bilong haus.—12/1, pes 3.