Ol Meri Em Ol i Mekim Bel Bilong Jehova i Amamas
“[God] i lukim pinis olgeta gutpela pasin yu bin mekim na em i ken givim gutpela pe long yu. Em i ken givim yu planti gutpela samting.”—RUT 2:12.
1, 2. Taim yumi tingim pasin bilong ol meri em stori bilong ol i stap long Baibel na ol i bin mekim bel bilong Jehova i amamas, dispela inap helpim yumi olsem wanem?
PASIN bilong pret long God i bin kirapim tupela meri long sakim tok bilong wanpela king bilong Isip. Bilip i kirapim wanpela pamukmeri long mekim samting em inap kisim bagarap long en bambai em i ken lukautim tupela man Israel i kam bilong lukstil long ples. Gutpela tingting na pasin daun long taim nogut i helpim wanpela meri long lukautim laip bilong planti man na pasim wanpela man Jehova i makim olsem king na bai em i no gat asua long kilim i dai planti man. Pasin bilong bilip long Jehova na mekim gut long ol man i kirapim wanpela mama, man bilong en i dai pinis long givim laspela hap kaikai bilong em long profet bilong God. Em sampela tasol bilong planti meri em stori bilong ol i stap long Baibel na ol i bin mekim bel bilong Jehova i amamas.
2 Tingting bilong Jehova long ol kain meri olsem, na gutpela presen em i bin givim long ol i kamapim klia olsem samting em i laikim tru em ol gutpela pasin bilong spirit, maski man o meri i mekim. Long nau ol man i tingim ol samting bilong skin i bikpela samting, olsem na i hatwok long putim ol samting bilong spirit i stap nambawan. Tasol yumi inap mekim olsem, na dispela i kamap ples klia long pasin bilong planti milion meri em ol i pret long God na ol i stap insait long lain bilong God long nau. Ol dispela meri Kristen i bihainim bilip, gutpela tingting, pasin bilong mekim gut long man, na ol narapela gutpela pasin em ol meri i pret long God ol i bin mekim bipo na nem bilong ol i stap long Baibel. Ol man Kristen tu i laik bihainim ol gutpela pasin bilong ol dispela meri bilong bipo. Bilong save long olsem wanem yumi ken mekim moa yet ol dispela gutpela pasin, yumi ken kamapim gut stori bilong Baibel long ol dispela meri em yumi bin toktok long ol long kirap bilong dispela stori.—Rom 15:4; Jems 4:8.
Ol Meri i Bin Sakim Tok Bilong Wanpela King
3, 4. (a) Bilong wanem Sifra na Pua i no laik bihainim tok bilong king taim em i tok long kilim i dai olgeta nupela pikinini man bilong ol Israel? (b) Tupela meri hia i gat strongpela bel na ol i pret long God, olsem na Jehova i givim wanem gutpela pe long ol?
3 Long kot i bin kamap long Nuremberg long Jemani bihain long Namba Tu Pait, planti man em ol i bin kot long kilim i dai planti manmeri ol i tok ol i no gat asua, long wanem, ol i bihainim tok bilong ol bikman bilong ol na ol i mekim. Orait nau skelim dispela wantaim pasin bilong tupela meri Israel i save helpim ol meri long taim ol i laik karim pikinini, em Sifra na Pua, ol i bin stap long Isip long taim bilong wanpela king nogut em Baibel i no kolim nem bilong em. Lain Hibru i wok long kamap planti na king i pret long dispela, olsem na em i tokim tupela meri hia long ol i mas kilim i dai olgeta nupela pikinini man bilong ol Hibru. Orait tupela meri i mekim wanem long samting nogut king i tok ol i mas mekim? “Tupela i no bihainim tok bilong king. Olsem na tupela i larim ol pikinini man i stap, tupela i no kilim ol.” Olsem wanem na tupela i no pret long king? Long wanem, ol i “pret long God.”—Kisim Bek 1:15, 17; Stat 9:6.
4 Em nau, tupela meri i go long Jehova, em i ples hait bilong ol, olsem na em i lukautim ol olsem “hap plang bilong pait” na belhat bilong king i no painim ol. (2 Samuel 22:31; Kisim Bek 1:18-20) Tasol Jehova i givim narapela gutpela pe tu long tupela. Sifra na Pua i kamapim ol pikinini bilong ol yet. Na em i mekim gut long tupela na nem wantaim ol gutpela wok bilong tupela i stap long Baibel na ol lain i kamap bihain ol inap ritim, tasol nem bilong dispela king i lus pinis.—Kisim Bek 1:21; 1 Samuel 2:30b; Sindaun 10:7.
5. Olsem wanem planti meri Kristen long nau ol i kamapim wankain tingting olsem Sifra na Pua? Jehova bai givim wanem gutpela pe long ol?
5 Yu ting i gat sampela meri olsem Sifra na Pua long nau? I gat! Long olgeta yia, long ol kantri em “lo bilong king” i tambuim wok bilong autim tok bilong Baibel, planti tausen meri olsem ol i no pret long autim dispela tok i save helpim man long kisim laip, maski ol inap kalabus o kisim bagarap long mekim dispela wok. (Hibru 11:23; Aposel 5:28, 29) Ol i save laikim tru God na ol man, na dispela i kirapim ol dispela strongpela meri na ol i no larim wanpela man i pasim ol long mekim wok bilong autim gutnius bilong Kingdom bilong God long ol man. Olsem na planti meri Kristen i save kisim hevi long ol man, em ol i birua long ol na mekim nogut long ol. (Mak 12:30, 31; 13:9-13) Olsem Sifra na Pua, Jehova i save tru long ol gutpela wok ol dispela gutpela strongpela meri i mekim, na em bai kamapim long ples klia olsem em i laikim tru ol—em bai putim nem bilong ol long “buk bilong laip” na nem bilong ol bai stap long en sapos ol i stap strong na stap gut long em inap long las de.—Filipai 4:3; Matyu 24:13.
Pamukmeri i Mekim Bel Bilong Jehova i Amamas
6, 7. (a) Rahap i gat wanem save long Jehova na lain bilong em? Dispela save i mekim wanem long em? (b) Olsem wanem Baibel i litimapim nem bilong Rahap?
6 Long yia 1473 B.C.E., wanpela pamukmeri nem bilong en Rahap i sindaun long taun Jeriko long Kenan. Yumi ken ting Rahap i gat save long sampela samting i bin kamap. Taim tupela man Israel i kam bilong lukstil na ol i laik hait insait long haus bilong em, em inap kamapim gut stori bilong taim God i bin wokim mirakel na ol Israel i lusim Isip, maski dispela samting i bin kamap inap 40 yia i go pinis! Na em i save tu long ol pait ol Israel i winim, taim ol i pait long ol king bilong lain Amor, em Sihon na Ok. Tingim samting dispela save i mekim long em. Em i tokim tupela man: “Mi save, Bikpela i givim pinis dispela kantri long han bilong yupela Israel . . . long wanem, . . . God, Bikpela bilong yupela, em i God bilong heven na graun.” (Josua 2:1, 9-11) Tru tumas, bel bilong Rahap i pilim tru dispela save em i kisim long Jehova na ol wok Em i bin mekim bilong helpim lain Israel, na dispela i mekim na Rahap i bilip long Jehova.—Rom 10:10.
7 Bilip bilong Rahap i kirapim em long mekim sampela samting. Em i kisim ol man Israel i bin kam lukstil na em “i helpim tupela,” na em i bihainim tok tupela i givim long em bambai em i no ken bagarap taim ol Israel i kam pait long Jeriko. (Hibru 11:31; Josua 2:18-21) Ol wok bilong bilip em Rahap i mekim i amamasim bel bilong Jehova. Yumi save long dispela, long wanem, Jehova i bin kirapim disaipel Kristen, Jems, long raitim nem bilong Rahap klostu long nem bilong Abraham, em pren bilong God, bilong i stap olsem gutpela piksa ol Kristen i ken bihainim. Jems i tok: “Olsem tasol pamukmeri Rahap i lukautim ol man Josua i bin salim i kam na Rahap i salim ol i go bek long narapela rot. Olsem na God i kolim em stretpela meri.”—Jems 2:25.
8. Rahap i bilip na bihainim tok, olsem na Jehova i mekim gut long em olsem wanem?
8 Jehova i givim gutpela pe long Rahap long kain kain rot. Olsem: Jehova i wokim mirakel na lukautim laip bilong em wantaim laip bilong olgeta manmeri i kam painim ples hait insait long haus bilong em—em “olgeta lain famili bilong en.” Na bihain Jehova i larim ol “i stap long Israel” na ol Israel i mas mekim gut long ol olsem lain bilong ol yet. (Josua 2:13; 6:22-25; Wok Pris 19:33, 34) Tasol i no dispela samting tasol. Jehova i mekim gut long Rahap na em i kamap wanpela tumbuna bilong Jisas Krais. Tru tumas, Jehova i mekim pasin sori moa yet long dispela meri em pastaim em i wanpela meri Kenan i bin lotuim ol god giaman!a—Song 130:3, 4.
9. Olsem wanem tingting bilong Jehova long Rahap na sampela meri Kristen long taim bilong ol aposel inap strongim bel bilong sampela meri long nau?
9 Olsem Rahap, sampela meri Kristen kirap long taim bilong ol aposel na i kam inap nau, ol i bin lusim pasin pamuk bambai God i ken amamas long ol. (1 Korin 6:9-11) Yumi save, sampela i kamap bikpela insait long pasin i wankain olsem long Kenan bilong bipo, em pasin pamuk i pulap tru long en na ol man i ting em i orait tasol. Tasol ol dispela meri i kisim bilip em stretpela save bilong Baibel i as bilong en na ol i senisim pasin bilong ol. (Rom 10:17) Olsem na Baibel i tok long ol dispela meri olsem “God i no sem long dispela tok bilong ol” em ol i tok, “Yu God bilong mipela.” (Hibru 11:16) Man! God i givim biknem tru long ol, a?
Meri i Gat Gutpela Tingting i Kisim Blesing
10, 11. Wanem samting i kamap namel long Nabal na Devit na dispela i kirapim Abigel long mekim kwik wanpela samting?
10 Planti meri bilong bipo i stap gut long God ol i kamapim moa yet pasin bilong gutpela tingting, olsem na ol i gutpela samting tru long lain bilong Jehova. Wanpela meri olsem, em Abigel, em meri bilong wanpela maniman Israel i gat bikpela hap graun, nem bilong em Nabal. Gutpela tingting bilong Abigel i mekim na planti man i abrusim bagarap, na Devit, em bilong kamap king bilong Israel bihain, em i no kisim asua long kapsaitim blut bilong ol man. Stori bilong Abigel i stap long 1 Samuel sapta 25.
11 Dispela stori i kirap long taim Devit wantaim lain bilong em ol i kem klostu long ol lain sipsip bilong Nabal na lukautim ol long san na long nait na ol i no singaut long pe, long wanem, ol i laik mekim gut long brata Israel bilong ol, em Nabal. Orait bihain ol kaikai bilong Devit i laik pinis na em i salim tenpela yangpela man i go long Nabal bilong askim em long sampela kaikai. Nau Nabal i gat rot long soim olsem em i tenkyu long Devit na givim biknem long em olsem man God i bin makim bilong kamap king. Tasol Nabal i no mekim olsem. Em i belhat nogut tru na em i tok nogut long Devit na i rausim ol yangpela man i go nating. Taim Devit i harim dispela samting Nabal i mekim, em i bungim 400 man i holim bainat na ol i go bilong bekim nogut long Nabal. Abigel i harim stori bilong hatpela pasin man bilong em i bin mekim na em i tingting gut na kwiktaim em i kirap salim planti kaikai i go long Devit bilong mekim kol bel bilong em. Orait nau em yet i kirap na i go long Devit.—Ves 2-20.
12, 13. (a) Olsem wanem Abigel i kamapim klia olsem em i gat gutpela tingting na em i stap gut long Jehova na man Jehova i makim? (b) Taim Abigel i go bek long haus, em i mekim wanem? Olsem wanem long Abigel bihain?
12 Taim Abigel i bungim Devit, em i mekim pasin daun na krai long Devit long mekim pasin marimari, na dispela i kamapim olsem em i daun tru long man Jehova i bin makim. Em i tok: “Mi save, taim Bikpela i laik yu go pait long ol birua, orait yu save go pait long ol. . . . Olsem na Bikpela bai i mekim yu i kamap king, na ol king bilong Israel bai i kamap long ol lain tumbuna bilong yu.” (Ves 28-30) Tasol Abigel i kamapim olsem em i gat strongpela bel—em i tokim Devit, sapos em i strong long bekim nogut long Nabal na em i no daunim dispela belhat, em bai i gat asua long kilim man i dai. (Ves 26, 31) Pasin daun bilong Abigel na pasin bilong em long rispek tru long Devit, na gutpela tingting bilong em i mekim na Devit i kisim bek stretpela tingting. Em i tokim Abigel: “God, Bikpela bilong yumi Israel, i bin salim yu i kam nau, na yu bungim mi. Olsem na mi . . . tenkyu long God long gutpela tingting na tok bilong yu, na em i ken mekim gut tru long yu. Long wanem, nau yu bin pasim mi na mi no kilim i dai sampela man na bekim rong bilong Nabal long han bilong mi yet.”—Ves 32, 33.
13 Taim Abigel i go bek long haus, em i strongim bel na i laik tokim man bilong em long ol samting em i bin givim long Devit olsem presen. Tasol taim Abigel i painim em pinis, em i lukim Nabal “i spak tru.” Olsem na em i wetim het bilong Nabal i klia gen na nau em i tokim em. Orait Nabal i mekim wanem? Em i harim dispela tok na tingting bilong em i pas, na i olsem wanpela kain sik strok i kisim em na skin bilong em i dai. Tenpela de bihain, em i dai long han bilong God. Taim Devit i harim olsem Nabal i dai pinis, em i askim Abigel long maritim em; em i laikim tru Abigel na i rispek tru long em. Abigel i tok orait long maritim Devit.—Ves 34-42.
Yu Inap Bihainim Pasin Bilong Abigel?
14. Wanem ol pasin bilong Abigel ating yu laik kisim moa yet?
14 Yu lukim sampela pasin bilong Abigel em yupela—ol man na meri wantaim—i laik kisim moa yet? Ating yu gat laik long mekim ol pasin i gat gutpela tingting long en taim sampela hevi i kamap. O ating yu laik mekim tok olsem bel i stap isi na mekim gutpela tok taim bel bilong ol narapela i kirap na ol i laik kros. Sapos olsem, orait beten long Jehova long dispela samting. Em i tok promis pinis long givim gutpela tingting na save na pasin bilong wokim gut tingting long olgeta man i “bilip tru na i beten long God.”—Jems 1:5, 6; Sindaun 2:1-6, 10, 11.
15. Wanem taim em i bikpela samting tru long ol meri Kristen i mas bihainim ol gutpela pasin em Abigel i bin kamapim?
15 Ol dispela gutpela pasin i bikpela samting tru long meri em man bilong em i no bilip na i no save harim liklik ol stiatok bilong Baibel. Na tu, ating em i save dring planti. Yumi laik bai ol kain man olsem i senisim pasin bilong ol. Planti i bin mekim, long wanem, ol i lukim meri bilong ol i mekim pasin isi, na daun tru long ol, na wokabaut stret.—1 Pita 3:1, 2, 4.
16. Maski sista Kristen i gat wanem kain hevi long sindaun bilong em, olsem wanem em i ken kamapim klia olsem pasin bilong pas gut wantaim Jehova i bikpela samting tru long em?
16 Maski yu mas karim wanem hevi long sindaun bilong yu, yu no ken lusim tingting, oltaim Jehova i stap wantaim yu bilong helpim yu. (1 Pita 3:12) Olsem na yu mas wok long strongim yu yet long ol samting bilong spirit. Beten long kisim gutpela tingting na bel isi. Yes, go klostu moa long Jehova long rot bilong stadi oltaim long Baibel, na beten, na tingim tingim long bel, na bung wantaim ol narapela Kristen. Pasin bilong man bilong Abigel, olsem em i no save tingim ol samting bilong spirit, dispela i no pasim Abigel long laikim tru Jehova na daun long man God i bin makim. Em i bihainim ol stretpela stiatok long ol samting em i mekim. Na insait long famili em papa i wanpela wokman bilong God na em i stap olsem gutpela piksa tru, meri Kristen bilong em i save em yet i mas taitim bun long kamap strong moa long ol samting bilong spirit na holimpas dispela pasin. Tru, man bilong em i gat wok long lukautim em long samting bilong spirit na bilong skin, tasol em i samting bilong meri yet long “wok strong long mekim ol samting bambai God i ken kisim bek [em], na mekim long pasin bilong pret na guria.”—Filipai 2:12, NW; 1 Timoti 5:8.
Em i Kisim ‘Gutpela Pe’
17, 18. (a) Wanem narapela kain samting i painim meri wanpis bilong Sarefat bilong traim bilip bilong em? (b) Meri i mekim wanem long samting Elaija i askim em long mekim? Jehova i givim wanem gutpela pe long meri?
17 Pasin Jehova i bin mekim bilong lukautim wanpela rabismeri em man bilong en i dai pinis, em i stap long taim bilong Elaija, dispela i soim olsem Jehova i tingim tru ol manmeri i save givim ol yet na ol samting bilong ol bilong helpim lotu i tru. Long taim bilong Elaija, i no gat ren inap longtaim tru, na planti manmeri ol i laik bagarap long hangre, olsem wanpela meri, em man bilong en i dai pinis, na yangpela pikinini man bilong en ol i sindaun long Sarefat. Tupela i gat liklik hap kaikai tasol i stap, na nau wanpela man i kam lukim ol—em profet Elaija. Samting em i singaut long en i narapela kain tru. Em i save olsem kaikai bilong meri i laik pinis, tasol em i askim meri long kisim liklik hap wel na plaua i stap yet na “kukim bret” bilong em. Tasol em i tokim meri: “God, Bikpela bilong Israel, i tok olsem, plaua long sospen bilong yu i no inap long pinis na wel long sospen bilong yu i no inap long sot, i go inap long taim Bikpela i salim ren i kam daun gen long graun.”—1 King 17:8-14.
18 Sapos profet i bin askim yu long mekim dispela samting, bai yu mekim wanem? Yumi ken ting dispela meri wanpis bilong Sarefat i luksave olsem Elaija em i profet bilong Jehova, olsem na em i “mekim olsem Elaija i tokim em.” Jehova i mekim wanem long pasin bilong meri long kisim dispela profet na givim kaikai long em? Jehova i wokim mirakel na givim kaikai long meri, na pikinini man bilong em, na Elaija, i go inap long taim ren i kam daun gen. (1 King 17:15, 16) Tru tumas, Jehova i givim dispela meri ‘wankain gutpela pe olsem ol profet i save kisim,’ maski em i no bilong lain Israel. (Matyu 10:41) Pikinini bilong God tu i litimapim nem bilong dispela meri taim em i stori long gutpela pasin bilong em long ol wanples long Nasaret em ol i no bilip.—Luk 4:24-26.
19. Olsem wanem planti meri Kristen long nau ol i kamapim wankain pasin olsem meri wanpis bilong Sarefat? Jehova i ting olsem wanem long ol dispela meri?
19 Long nau planti meri Kristen i save kamapim wankain pasin olsem dispela meri wanpis bilong Sarefat. Long olgeta wik ol meri Kristen em ol i no save tingim ol yet tasol—em planti ol i stap rabis na ol i gat famili bilong lukautim—ol i save givim kaikai long ol wasman bilong raun na meri bilong ol. Sampela ol i save givim kaikai long ol lain i mekim wok bilong God fultaim, na helpim ol manmeri i sot long ol samting, o long narapela rot ol i givim ol yet na ol mani samting bilong ol bilong helpim wok bilong Kingdom. (Luk 21:4) Yu ting Jehova i save lukim ol dispela gutpela wok ol i mekim? Em i save lukim! “God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God, na dispela i bin kirapim yupela long helpim ol manmeri bilong em. Na yupela i save mekim olsem yet.”—Hibru 6:10.
20. Long stori i kamap bihain long dispela, bai yumi toktok long wanem samting?
20 Long taim bilong ol aposel, sampela meri i save pret long God ol i bin mekim wok bilong lukautim Jisas wantaim ol aposel bilong em. Long stori i kamap bihain long dispela, bai yumi toktok long olsem wanem ol dispela meri i bin mekim bel bilong Jehova i amamas, na bai yumi stori long ol meri bilong nau i givim bel long mekim wok bilong Jehova, maski ol i gat hatwok tru long mekim.
[Ol Futnot]
a Matyu i bin raitim nem bilong ol tumbuna bilong Jisas na em i kolim nem bilong 4-pela meri—Tamar, Rahap, Rut, na Maria. Baibel i litimapim nem bilong ol dispela meri.—Matyu 1:3, 5, 16.
Stori Gen
• Ol dispela meri em nem bilong ol i stap daunbilo, olsem wanem ol i bin mekim bel bilong Jehova i amamas?
• Sifra na Pua
• Rahap
• Abigel
• Meri wanpis bilong Sarefat
• Sapos yumi tingim tingim long bel pasin bilong ol dispela meri i stap olsem gutpela piksa, dispela bai helpim yumi olsem wanem? Stori long en.
[Ol Piksa long pes 9]
Planti meri em ol i stap gut long God ol i bin mekim wok bilong em maski long “lo bilong king”
[Piksa long pes 10]
Olsem wanem na Rahap i stap olsem gutpela piksa bilong meri i gat bilip?
[Piksa long pes 10]
Yu laik bihainim wanem sampela gutpela pasin em Abigel i kamapim?
[Piksa long pes 12]
Planti meri Kristen bilong nau i kamapim wankain pasin olsem bilong meri wanpis bilong Sarefat