Ol i Mekim Laik Bilong Jehova

Wanpela Gutpela Meri i Stretim Bikpela Hevi

WANPELA meri i gat stretpela pasin i marit long wanpela man nogut. Kain samting olsem i bin painim Abigel na Nabal. Abigel “em i naispela meri tumas na i gat planti save.” Tasol Nabal em i “man bilong kros na pasin bilong en i no gutpela.” (1 Samuel 25:3) Pasin bilong tupela i narapela narapela kain, na ol samting i kamap em tupela i insait long en, dispela i mekim na nem bilong tupela i stap long stori bilong Baibel long ol samting i bin kamap bipo. Yumi ken stori long dispela.

Em i No Tenkyu Long Wok Ol i Mekim

Klostu long yia 1100 B.C.E. samting, ol i makim Devit long kamap king bilong ol Israel long bihain, tasol em i no mekim wok king​—⁠em i wok long ranawe. Man i holim wok king, em Sol, em i laik kilim Devit i dai. Dispela i mekim na Devit i stap olsem wanpela ranaweman. Bihain Devit na 600 poroman bilong em i painim ples hait long ples drai nating bilong Paran, long hap saut bilong Juda na i go olsem long ples drai nating bilong Sainai.​—⁠1 Samuel 23:13; 25:⁠1.

Taim ol i hait long dispela hap, ol i bungim ol wasman bilong sipsip, em ol i wokboi bilong wanpela man nem bilong em Nabal. Nabal i maniman tru na em i kamap long lain bilong Kalep, na em i gat 3,000 sipsip na 1,000 meme. Em i save katim gras bilong ol sipsip bilong em long Karmel, em wanpela taun long hap saut bilong Hebron na em i stap 40 kilomita samting longwe long Paran.a Devit na ol man bilong em i helpim ol wokboi bilong Nabal long was long ol sipsip, nogut ol stilman i save raun nabaut long ples drai nating ol i stilim.​—⁠1 Samuel 25:​14-16.

Long dispela taim, ol i kirap pinis long katim gras bilong ol sipsip long Karmel. Em taim bilong bikpela kaikai na amamas, i wankain olsem long taim ol fama i kisim kaikai long gaden na ol i amamas. Em taim bilong givim presen long narapela, na ol papa bilong sipsip i save givim presen long ol man i wok long ol. Olsem na i stret Devit i salim 10-pela man i go long taun Karmel bilong askim Nabal long givim kaikai long ol olsem bekim bilong wok ol i bin mekim bilong was long ol sipsip bilong em.​—⁠1 Samuel 25:​4-9.

Nabal i no laik givim kaikai long ol. Em i lap na i askim: ‘Dispela Devit em husat?’ Em i mekim olsem Devit na ol lain bilong em i wokboi nating em ol i ranawe long bosman bilong ol, olsem na em i tok: “Yupela i kam long wanem hap, em mi no save. Olsem na mi no laik kisim bret na wara na ol abus mi bin kilim bilong ol man i wok long katim gras bilong ol sipsip bilong mi, na givim long yupela. Nogat tru.” Taim Devit i harim dispela tok, em i tokim ol lain bilong em: “Yupela olgeta kisim bainat na redi long pait”! Inap 400 man i redi long pait.​—⁠1 Samuel 25:​10-13.

Gutpela Tingting na Save Bilong Abigel

Bihain Abigel, meri bilong Nabal, i harim tok kranki bilong em. Ating em i no namba wan taim Abigel i mas kamap olsem namelman na stretim hevi em Nabal i kamapim. Abigel i no wet, em i kirap kwik na stretim dispela hevi. Em i no toksave long Nabal. Em i kisim 5-pela sipsip na planti kaikai na sampela samting moa, na em i go long ples drai nating bilong bungim Devit.​—⁠1 Samuel 25:​18-20.

Taim Abigel i lukim Devit, kwiktaim em i brukim skru long ai bilong Devit na i tok: “Yu no ken ting long tok bilong Nabal, long wanem, pasin bilong en i nogut tru. Olsem na bikman, mi laik bai yu kisim dispela presen mi bringim long yu na givim long ol lain man bilong yu.” Na em i tok moa: “Sapos yu no kilim nating sampela man o yu yet yu no bin mekim rong long wanpela man, orait long taim Bikpela i mekim yu i kamap king bai yu no gat wanpela samting bilong mekim yu i bel hevi o bilong mekim yu i sem.” Long tok Hibru, dispela tok “bel hevi” i olsem bel i gat tok. Olsem na Abigel i toksave long Devit olsem em i no ken kirap kwik na mekim wanpela samting na bihain bel bilong em bai i gat tok long en.​—⁠1 Samuel 25:​23-31.

Devit i harim tok bilong Abigel na i tokim em olsem: “Mi tenkyu long God long gutpela tingting na tok bilong yu, na em i ken mekim gut tru long yu. Long wanem, nau yu bin pasim mi na mi no kilim i dai sampela man na bekim rong bilong Nabal long han bilong mi yet.” Na Devit i tok moa: “Sapos yu no bin kam kwiktaim long mi, orait long moningtaim bai i no gat wanpela wokman bilong Nabal inap i stap laip.”​—⁠1 Samuel 25:​32-34.

Sampela Save Yumi Kisim Long En

Dispela stori bilong Baibel i soim olsem, i no gat rong long wanpela meri i save pret long God i bihainim stretpela tingting bilong stretim wanpela hevi sapos i stret em i mas mekim olsem. Abigel i no bihainim laik bilong man bilong em, Nabal, na em i mekim dispela samting, tasol Baibel i no kotim em long pasin em i mekim. Baibel i litimapim nem bilong em olsem wanpela meri i gat gutpela tingting na save, na em i save skelim stret ol samting. Abigel i kirap mekim ol samting bilong stretim dispela bikpela hevi, na laip bilong planti man i no lus.

Tru, meri i mas aninit long man bilong em, tasol i stret em i no wanbel long tok bilong man sapos samting man i laik mekim i brukim stretpela lo bilong Baibel. Tru, em i mas wok strong long “stap belgut na i stap bel isi” yet, na em i no ken bel nogut long man, o mekim pasin antap, o bikhet, na long dispela as em i kirap mekim ol samting long laik bilong em yet, nogat. (1 Pita 3:⁠4) Tasol meri i save pret long God, em i no ken larim man i subim em long mekim ol samting em i save i no stret liklik long mekim o i brukim ol lo bilong Baibel. Tru tumas, stori bilong Abigel i daunim tru tok bilong ol man em ol i strong long tok olsem, Baibel i makim olsem ol meri i olsem wokmeri nating tasol.

Na tu, dispela stori i lainim yumi long bosim gut bel. Sampela taim Devit i mekim tru dispela pasin. Olsem: Em i no laik kilim i dai King Sol, maski rot i op bilong em i ken mekim olsem, na i dai bilong Sol bai mekim na nau em inap i stap bel isi. (1 Samuel 24:​2-7) Tasol taim Nabal i no laik givim kaikai long em, em i no bosim gut bel na em i tok promis long bekim nogut long Nabal. Dispela em i wanpela tok lukaut i go long ol Kristen em ol i wok strong long abrusim pasin bilong bekim rong ol man i mekim long ol. Long olgeta taim ol i mas bihainim tok bilong Pol: “Oltaim yupela i mas painim rot bilong i stap wanbel wantaim olgeta man. Ol pren tru bilong mi, yupela yet i no ken bekim rong ol i mekim long yupela.”​—⁠Rom 12:​17-​19.

[Futnot]

[Piksa long pes 15]

Abigel i bringim ol presen i go long Devit