“Mi Tenkyu Long God Long Gutpela Tingting na Tok Bilong Yu”

DEVIT em man bilong lain Israel bilong bipo, na em i mekim dispela tok long wanpela meri. Nem bilong em Abigel. Bilong wanem Devit i givim biknem long Abigel? Yumi inap kisim wanem skul long pasin bilong Abigel?

Devit i bungim Abigel taim em i ranawe long King Sol. Man bilong Abigel em Nabal, em wanpela maniman i gat bikpela lain sipsip i stap long ples maunten long hap saut bilong Juda. Devit na lain bilong em i “lukautim” gut ol wokman bilong Nabal na ol sipsip bilong em. Bihain Devit i salim sampela man i go askim Nabal ‘sapos em i gat sampela kaikai i stap, ating em i ken givim long ol.’ (1 Sml. 25:8, 15, 16) I stret long Devit na lain bilong em i askim Nabal long helpim ol bikos ol i lukautim ol sipsip bilong Nabal.

Mining bilong nem Nabal em “Krankiman.” Pasin em i mekim i stret wantaim nem bilong em. Nabal i bihainim hatpela pasin na mekim ol tok nogut long Devit, na em i no laik tru long helpim Devit. Olsem na Devit i redi long pait long Nabal. Longlong pasin bilong Nabal inap mekim na olgeta wanhaus bilong em i kisim bagarap.—1 Sml. 25:2-13, 21, 22.

Abigel i luksave long bikpela hevi inap kamap long samting Devit i laik mekim, olsem na em i strongim bel na i go bungim Devit. Abigel i soim rispek long Devit na tokim em long tingim pasin bilong em long i stap gut long Jehova. Na tu, Abigel i bringim planti kaikai long Devit na lain bilong em. Devit em man bai kamap king. Olsem na em i tok tenkyu long Jehova i bin yusim Abigel long pasim em long mekim samting we em bai i gat asua long ai bilong God. Devit i tokim Abigel: “Mi tenkyu long God long gutpela tingting na tok bilong yu, na em i ken mekim gut tru long yu. Long wanem, nau yu bin pasim mi na mi no kilim i dai sampela man.”—1 Sml. 25:18, 19, 23-35.

Oltaim yumi laik soim tenkyu long gutpela pasin ol narapela i mekim long yumi. Na tu, taim yumi luksave olsem hevi i laik kamap, yumi mas bihainim gutpela tingting na mekim ol samting bilong stopim dispela hevi. Yumi laik mekim wankain tok olsem man bilong raitim song i tokim God: “Yu ken givim gutpela tingting na gutpela save long mi.”—Sng. 119:66.

Ol narapela inap luksave long pasin yumi mekim we i soim olsem yumi gat savetingting. Olsem Devit, ol inap tok: “Mi tenkyu long God long gutpela tingting na tok bilong yu.”