Mekim Kibung Long Ples i Stap “Namel Long Dispela Graun”

Yu bin harim dispela tok “Te Pito o Te Henua”? Long tok Rapa Nui, em tok ples ol i mekim long Ista Ailan, dispela tok i makim “Namel Long Dispela Graun.” Wanem samting i mekim kibung long dispela hap i narapela kain?

DISPELA ailan i stap longwe tru long ol narapela ples ol man i save stap long en, em i luk narapela kain, na ol narakain naispela samting i stap long en. Em sampela tok ol man i mekim long Ista Ailan, o Rapa Nui olsem ol asples i kolim. Tru tumas em wanpela ples i stap longwe long ol narapela, na em i stap long biksolwara stret long solwara Saut Pasifik, inap 3,790 kilomita longwe long Santiago, Sili. Rapa Nui i kamap wanpela provins bilong Sili long Septemba 9, 1888.

Bikpela bilong dispela ailan em inap 166 skwe kilomita. Tripela volkeno bilong bipo i bin kamapim dispela ailan na em i luk olsem wanpela traiengol. Wankain olsem ol narapela ailan bilong Pasifik, dispela ailan em i kil bilong ol traipela maunten i stap aninit long wara. Ol i bin tokaut olsem dispela ailan olgeta em i olsem wanpela hap bilong graun i stap olsem bikpela samting long ol manmeri. Yumi no kirap nogut olsem planti man i save long dispela ailan, long wanem, em i gat ol narakain imis ston, ol i kolim moai.a

Ista Ailan i gat ol gutpela diwai na plaua i pulim ai na ol hap ol man bilong bipo i bin stap long en, na tu, em i gat ol kain kain gutpela kaikai. Graun i kamapim ol prut olsem painapol, diwai bata, popo, na 9-pela narapela narapela kain banana. Na solwara i gat planti pis na ol narapela samting bilong kaikai.

San i no hat tumas long Ista Ailan, ren i save pundaun na renbo i save kamap, olsem na ol man i raun lukim ailan inap pulim klinpela win na lukim ol hap i naispela tru. Long nau, i gat samting olsem 3,800 man i sindaun long ailan. Ol man nau i stap long ailan ol i tumbuna pikinini bilong ol namba wan lain i kam long ailan, na ol lain bilong Yurop na Sili, na ol narapela kantri. Planti handet turis bilong Yurop na Esia i save go raun lukim dispela ailan, na dispela pasin bilong ol turis i go lukim ailan em i bikpela samting i save pulim mani i kam insait long ailan.

Planim Pikinini Kaikai Bilong Kingdom Namba Wan Taim

Long 1982 Yearbook of Jehovah’s Witnesses i gat stori olsem: “Inap liklik taim mipela i bin i gat wanpela pablisa tasol long Ista Ailan. Em i kisim helpim long samting bilong spirit long rot bilong raitim pas i go i kam long narapela sista misineri long brens-ofis [long Sili]. Maski dispela pablisa i go bek pinis long Sili, mipela i gat nem bilong sampela long ailan i save kisim sabskripsen bilong Wastaua. Mipela i kirap nogut tru olsem long Epril 1980, wanpela man i gat laik long kisim save em i ring i kam long mipela, em i laik save long de bilong mekim bung bilong Memorial. Bihain, long dispela yia yet, tupela marit bilong Valparaiso i kam long ailan, na tupela i mekim Baibel-stadi wantaim ol man i amamas long kisim save. Long Epril 1981, ol i mekim bung bilong Memorial long dispela ailan, em namba wan taim ol i mekim olsem na i bin i gat 13 manmeri i bung. Mipela i amamas tru olsem ‘gutnius’ i wok long go insait long dispela ples i stap longwe!”

Bihain, long Janueri 30, 1991, brens i salim tupela marit ol i painia salim, Dario na Winny Fernandez, i kam long ailan. Brata Fernandez i tok: “Mipela i flai long balus inap 5-pela aua bilong kamap long dispela longwe ples, long hap we ol kastam bilong en i narapela kain.” Long rot bilong helpim bilong wanpela asples brata na bilong wanpela sista em nau tasol i bin kam long ailan wantaim tupela pikinini bilong em, ol i stretim rot bilong mekim miting na wok autim tok. Maski famili bilong ol i givim hevi long ol, na ol man i strong tru long lotu, na sampela pasin ol lain Polinisia i save bihainim i givim hevi long ol, ol i lukim blesing bilong Jehova long hatwok bilong ol. Brata na Sista Fernandez i no moa mekim wok painia salim, tasol ol i stap yet long ailan, na ol i mekim bikpela long pikinini man bilong ol, em mama i karim long hap. Long nau i gat 32 pablisa bilong autim tok bilong Kingdom. Sampela bilong ol em ol asples Rapa Nui, na ol narapela em ol i kam i stap long ailan o i kam bilong autim tok long hap i sot long ol man bilong autim tok bilong Kingdom.

Redim Ol Samting Bilong Kibung Sekit

Ailan i stap longwe tru long bikples, olsem na 3-pela taim long yia, kongrigesen i kisim ol vidio-kaset bilong program bilong bikpela de kibung, kibung sekit, na kibung distrik. Tasol klostu long pinis bilong yia 2000, Komiti Bilong Brens long Sili i skelim sapos ol inap kamapim kibung bilong ol yet, em namba wan kibung i kamap long ailan. Bihain, ol i pasim tok long mekim kibung sekit long Novemba 2001, na ol i singautim sampela brata na sista bilong ol narapela hap bilong Sili long i go long dispela spesel bung. Sediul bilong ron bilong balus i mekim na ol i mas mekim kibung long Sande na Mande.

Ol brata sista ol i bin singautim ol inap 33 olgeta, ol i amamas long i go long dispela ailan bilong insait long namba wan kibung sekit i kamap long dispela ples. Bihain long ol i flai antap long solwara Pasifik inap longpela taim, ol i bin amamas taim ol asples brata i wetim ol long ples balus na i tok welkam long ol. Ol asples brata i givim ol naispela bilas long ol (nekles ol i wokim long ol plaua), em pasin bilong ol man long ailan. Bihain ol brata i kisim ol i go long ples slip bilong ol, na bihain long ol i raun sotpela taim bilong lukim ailan, ol brata sista i insait long sampela hap bilong program bilong kibung, ol i go bung long Haus Kingdom.

Toksave i Kamap Long Rot Mipela i No Tingim

Taim sampela brata sista i raun long ka bilong i go long kibung, ol i kirap nogut long harim wanpela asples pris i toktok long redio long i kam bilong ol. Pris i tok olsem ol turis bilong Saut Amerika bai raun long ol haus na toktok long pinis bilong dispela graun. Em i tokim ol lain i insait long lotu bilong em long no ken harim tok bilong ol, tasol dispela toksave bilong em i mekim na ol manmeri inap save olsem bikpela lain bilong ol Witnes Bilong Jehova i stap long ailan. Dispela i kirapim tingting bilong ol man long ailan. Long ol de i kamap bihain long dispela samting, long gutpela pasin ol brata i toktok wantaim ol long gutnius.

Kibung i Kirap

Long Sande moning, ol asples brata i sanap wet long dua bilong Haus Kingdom bilong tok welkam long ol brata i kam long namba wan de bilong kibung. “Iorana Koe! Iorana Koe!” “Welkam!” Sampela sista i putim bilas bilong ples na bilasim gras bilong ol wantaim ol naispela plaua, em long stail tru bilong ol lain Polinisia.

Bihain long musik bilong kirapim bung, inap 100 nek i bung wantaim bilong mekim singsing “Sanap Strong, No Ken Surik!” dispela em i namba wan taim planti lain i mekim dispela singsing long ailan. Aiwara i pundaun long pes bilong ol asples brata taim ol i harim siaman i tok welkam long ol long tok ples bilong ol, Rapa Nui. Long belo, long taim bilong malolo, 3-pela nupela Witnes i kisim baptais bilong makim ol i dediket long God. Taim program bilong namba wan de i pinis, olgeta brata sista i pilim olsem ol i go klostu moa long Jehova na long lain brata i stap long olgeta hap.​—⁠1 Pita 5:⁠9.

Autim Tok Long Moning

Sampela samting i kamap long ailan, olsem na program bilong namba tu de bilong kibung sekit i kirap long belo bek. Ol brata i ting em i gutpela rot bilong mekim wok autim tok long moning. Wanem samting i painim ol?

Wanpela lapun meri i gat 8-pela pikinini i tokim ol Witnes olsem em i no inap toktok wantaim ol, long wanem, em i wanpela Katolik. Taim ol i tokim em olsem ol i laik toktok wantaim em long ol hevi i save painim olgeta manmeri, olsem pasin bilong kisim drak na ol hevi bilong famili, em i orait long harim.

Wanpela lapun asples meri i no mekim gutpela pasin pren long tupela marit Witnes. Em i tokim tupela long i go toktok long ol pipel bilong Saut Amerika em ol i save mekim nogut long ol narapela. Tupela marit i tokim em olsem tok bilong “gutnius bilong kingdom” em bilong olgeta man long harim na ol i kam long ailan em bilong mekim kibung, dispela bai helpim olgeta man long laikim God. (Matyu 24:14) Ol i askim em sapos em i amamas long i stap longpela taim long graun i kamap paradais, wankain olsem ol lain i stap long ailan, tasol bai i no gat sik na dai long en. Taim ol i toktok gut wantaim em long hamas yia ol volkeno i bin stap long ailan, meri ya i tingim laip bilong yumi i sotpela, olsem na em i askim: “Bilong wanem yumi stap sotpela taim olsem?” Em i kirap nogut taim em i ritim Song 90:⁠10.

Long dispela taim stret, ol Witnes i harim singaut i kamap long haus klostu. Maski ol i no save long tok ol lain i stap klostu i mekim, meri ya i tokim ol olsem ol neiba i bikmaus na tok bilas long ol bilong soim olsem ol i no laik ol Witnes i go lukim ol. Tasol dispela meri em i wanpela nua, o namba wan pikinini meri long famili. Papa bilong em i bin dai, olsem na em wok bilong em long makim wanem samting i gutpela bilong helpim famili. Long ai bilong ol wanblut bilong em, em i mekim tok bilong helpim ol brata na em i kisim ol nius ol i tilim long em. Sampela taim bihain insait long dispela wik, taim em na brata bilong em i raun long ka na abrusim ol Witnes, em i tokim brata bilong em long stopim ka. Maski brata bilong em i no amamas, meri ya i tok gutbai long ol brata na i mekim gutpela tok long wok ol i mekim.

Maski long pastaim i luk olsem sampela manmeri bilong ailan i no laik harim tok ol Witnes i autim, ol brata i luksave olsem ol Rapa Nui i gat gutpela pasin na pasin pren. Klostu olgeta bilong ol i bin amamas long harim gutnius. Long 20 Witnes em ol i bin kisim baptais long dispela ailan, 6-pela ol i asples. Wanpela bilong ol 6-pela hia i bin kisim tok i tru bilong Baibel long rot bilong i stap long wanpela rum klostu na harim tok long stadi bilong Baibel ol i mekim wantaim meri bilong em. Nau em na meri bilong em ol i Witnes i baptais pinis, na em i wanpela kongrigesen sevent.

Program Bilong Namba Tu De

Bihain long belo bek, program bilong namba tu de i kirap. Na long dispela de tu i gat ol man i laik harim tok i kam bung wantaim 32 asples brata na sista na 33 brata sista i kam long Sili. Klostu 100 manmeri i harim ol tok bilong program, na tu, pablik-tok “Olsem Wanem Pasin Sori na Pasin Bilong Bilip Bai Winim Strong Bilong Dispela Graun.” Tru tumas ol lain i bung i bin lukim olsem pasin laikim i stap namel long ol manmeri bilong Jehova, maski sampela bilong ol i bilong ol narapela narapela ples.​—⁠Jon 13:⁠35.

Long taim bilong kibung, wasman sekit na wasman distrik i mekim miting wantaim ol painia. Tripela painia oltaim i save stap long ailan i bung wantaim ol brata sista i kam long Sili em ol i painia oltaim na painia salim. Dispela miting i bin strongim tru olgeta.

Long neks de, sampela asples brata em wok mani bilong ol em bilong kisim ol turis raun, ol i kisim ol brata i raun lukim ailan. Ol i go lukim ples i gat ol ston em ol i bin wokim imis moai long en, na ol volkeno we ol lain bilong bipo tru i bin mekim ol pilai samting, na tu, naispela yelopela wesan long nambis Anakena, we ol namba wan lain i bin kam long ailan i bin kam sua long en.b

Laspela taim rot i op bilong i stap wantaim ol asples brata em long Buk-Stadi Bilong Kongrigesen. Bihain long Buk-Stadi, ol asples Witnes i givim kaikai bilong ples long ol brata na ol i kirap nogut. Bihain, ol i putim bilas bilong ol na ol i mekim ol naispela tumbuna danis. Ol brata i kam long Sili na ol brata sista bilong Rapa Nui, i save olsem ol hatwok ol i bin mekim bilong redim kibung i bin kamapim gutpela samting.

Ol brata i bin lusim Sili na kam i pas gut tru wantaim ol dispela brata sista bilong ol i stap longwe, em ol i bin stap wantaim ol inap wanpela wik. Bilong lusim ailan na i go bek, ol i pilim olsem em i hatwok. Ol bai tingim yet ol nupela pren ol i bin bungim na ol gutpela samting bilong spirit ol i kisim. Long ples balus, ol asples brata i bilasim nek bilong ol brata wantaim ol nekles em ol i bin wokim long ol sel bilong solwara.

Taim ol brata i lusim ples, ol i tok promis olsem: “Iorana! Iau he hoki mai e Rapa Nui ee,” em olsem: “Gutbai! Bai mi kam bek long yu, Rapa Nui.” Yes, ol i laik tru long kam bek bilong lukim ol nupela pren ol i bin painim na famili spirit i stap long dispela ailan i gat ol narakain naispela samting, na em i stap longwe tru, na i luk narapela kain, na ol manmeri i stap long en i gat pasin pren, em Ista Ailan!

[Ol Futnot]

[Blok long pes 24]

Autim Tok Long Ista Ailan

Inap 2-pela yia paslain long taim dispela kibung i kamap, wanpela wasman sekit na meri bilong em i bin go raun lukim ailan na i bin kisim amamas long planti gutpela ekspiriens. Olsem: Ol i kirap nogut tru taim sista husat i kisim ol i go long ples slip bilong ol i toksave long ol olsem ol i bin mekim stadi bilong Baibel wantaim em long hap saut bilong Sili taim em i yangpela, olsem 16 yia i go pinis. Bihain dispela pikinini kaikai i karim kaikai long Rapa Nui.

Na tu, wanpela pani samting i bin painim ol: Papa bilong wanpela stua i save salim ol kain kain samting bilong ples i bin kisim Baibel New World Translation of the Holy Scriptures na buk bilong helpim man long stadi long Baibel em Save i Bringim Man Long Laip Oltaim, dispela tupela buk ol Witnes Bilong Jehova i wokim. Taim ol i go bek bilong lukim papa bilong stua, em i tokim ol olsem em i no inap ritim dispela Baibel. Ol i bin lusim wanpela Baibel long em bilong tok Frans, na i no Spen! Kwiktaim ol i stretim dispela hevi, na man ya i luksave olsem i no hatwok long save long tok bilong Baibel taim ol asples Witnes i helpim em na em i gat Baibel long tok ples bilong em yet.

[Mep long pes 22]

(Bilong save ol dispela rait i stap we long pes, lukim buk o magasin)

ISTA AILAN

SILI

[Ol Piksa long pes 23]

Tupela bilong ol lain i kisim baptais long kibung sekit

[Ol Piksa long pes 25]

Ples daun bilong Rano Raraku volkeno; liklik piksa: Wel prut ol i kolim guayaba i kamap long ailan