I Stret Yumi Singaut Long Ol Ensel Bilong Helpim Yumi?

OLSEM WANEM? I stret long singaut long ol ensel bilong helpim yumi long taim bilong hevi? Planti man i ting olsem. Buk New Catholic Encyclopedia i tok: “Man i beten long . . . ol ensel . . . tasol em i mekim long pasin i makim olsem ol ensel bai askim God long helpim yumi.” Olsem wanem? I stret yumi singaut long ol ensel na ol i askim God long helpim yumi?

Baibel i tokim yumi long nem bilong tupela gutpela ensel tasol, em Maikel na Gebriel. (Daniel 8:​16; 12:1; Luk 1:​26; Jut 9) Baibel i kolim nem bilong dispela tupela ensel, olsem na yumi save, olgeta wan wan ensel ol i narapela narapela na ol i gat nem bilong ol yet; ol i no wanpela strong nating tasol. Tasol ol narapela ensel ol i no laik kamapim nem bilong ol. Olsem: Taim Jekop i askim wanpela ensel i kam lukim em long kamapim nem bilong em, ensel i no mekim. (Stat 32:29; Hetman 13:​17, 18) Baibel i no kamapim lista long nem bilong ol ensel bambai ol man i no ken tingting tumas long ol.

Wanpela wok bilong ol ensel em long bringim tok bilong God i go long ol man. Tok Hibru na tok Grik bilong bipo ol i tanim olsem “ensel,” insait bilong en i olsem “man bilong bringim tok.” Tasol ol ensel i no stap olsem namelman bilong bringim beten bilong ol man i go long sia king bilong God Antap Tru. God i makim pinis olsem ol man i mas beten long em long nem bilong Pikinini bilong em, Jisas Krais. Jisas i tok: “Sapos yupela i beten long Papa long nem bilong mi na askim em long givim wanpela samting long yupela, em bai i givim long yupela.”​—⁠Jon 15:16; 1 Timoti 2:⁠5.

God Jehova i gat planti wok, tasol em i save putim yau taim yumi beten long em long pasin i stret. Baibel i tok: “Wanem ol manmeri i save bel tru na i singaut long em, em i save stap klostu long ol.”​—⁠Song 145:⁠18.