Laibiria—Wok Bilong Kingdom i Go Bikpela Maski i Gat Woa

BIKPELA pait nogut tru i bin stap long Laibiria winim 10-pela yia. Namel long yia 2003, ol bikhetman i kam insait na kisim biktaun, Monrovia. Planti Witnes Bilong Jehova i mas ranawe lusim ol haus bilong ol, sampela taim ol i mekim tupela o tripela taim. Planti taim ol man i kam long haus bilong ol na stilim ol samting.

Sori tru, taim ol i pait long biktaun, ol i kilim i dai planti tausen manmeri. Namel long ol em tupela Witnes, wanpela brata na wanpela sista. Olsem wanem ol brata inap karim dispela hevi i gat hatwok, na olsem wanem ol i kisim helpim?

Samting Bilong Helpim Ol

Long dispela taim bilong pait, brens ofis bilong ol Witnes Bilong Jehova long Laibiria i stretim rot bilong helpim ol man em ol i mas kisim helpim. Ol i salim kaikai, ol samting bilong haus, na marasin samting long ol. Long dispela taim ol bikhetman i bosim hap nambis em sip i save sua long en, na kaikai i sot. Brens ofis i bin luksave long hevi i wok long kamap na ol i bin redim ol samting bilong tu tausen Witnes em ol i ranawe i go stap long ol Haus Kingdom i stap long taun. Ol brata i skelim gut ol kaikai bambai ol i gat kaikai i go inap long taim ol i opim gen dispela hap nambis bilong sip. Brens ofis bilong Beljam na Siera Leon i salim ol marasin long rot bilong balus, na brens bilong Briten na Frans i salim ol klos samting long rot bilong sip.

Maski bikpela hevi tru i painim ol brata, ol i holimpas wanpela tingting tasol na stap amamas. Tok bilong wanpela em i bin ranawe long haus bilong em inap tripela taim i kamapim tingting bilong planti bilong ol. Em i tok: “Dispela em ol hevi yumi save autim tok long en; yumi stap long taim bilong las de.”

Ol Man i Harim Gutnius

Maski ol hevi i stap, wok autim tok ol Witnes Bilong Jehova i mekim i kamapim gutpela samting. Long Janueri 2003, namba bilong ol pablisa bilong Kingdom em inap olsem 3,879, na long Februeri ol i mekim 15,227 Baibel stadi.

Ol man i redi long harim gutnius. Olsem dispela stori i kam long wanpela ples long hap saut-is bilong kantri. Wanpela kongrigesen i pasim tok long mekim Memorial bilong tingim indai bilong Krais long bikpela ples Bewahn​—⁠sapos ol i wokabaut long hap ol save bung long en na go long Bewahn, em 5-pela aua. Paslain long ol brata i go long ples bilong singautim ol man long Memorial, ol i givim wanpela pepa bilong singautim man i kam long Memorial long bikman bilong Bewahn. Taim em i kisim dispela pepa, em i kisim Baibel, go long ol man bilong ples na ritim skripsa i stap long pepa, na em i kirapim ol long go long bung bilong Memorial. Taim ol pablisa i kamap, ol kisim save olsem wanpela i mekim pinis dispela wok bilong singautim ol man! Dispela bikman, ol pikinini bilong em na tupela meri bilong em, ol i kam long Memorial. Inap 27 manmeri i kam long bung bilong Memorial. Kirap long dispela taim dispela bikman i lusim Lotu Metodis na kirap stadi wantaim ol Witnes, na em i givim graun bilong wokim Haus Kingdom.

Tingting i Senis

Gutpela pasin bilong ol brata i bin senisim tingting bilong sampela man i birua long tok i tru. Tingim samting i painim Opoku. Wanpela painia salim i bungim em long taim em i autim tok na givim em wanpela Wastaua. Opoku i laikim wanpela stori insait long nius tasol em i no gat mani. Painia i stori olsem ol nius i no gat pe long en, em i lusim nius long Opoku na stretim rot bilong go bek. Taim em i go bek, Opoku i askim painia: “Yu save long mi? Planti lain bilong yupela long taun Harper i save long mi. Bipo mi save rausim ol pikinini bilong yupela long skul!” Em i tok em i stap het-tisa bilong wanpela haiskul long taun, na em i bin mekim nogut long ol pikinini Witnes, long wanem, ol i no salut long fleg.

Tasol tripela gutpela samting long pasin laikim bilong Kristen em ol Witnes Bilong Jehova i kamapim, i kirapim Opoku long stretim tingting bilong em. Namba wan, em i lukim ol Witnes i lukautim gut wanpela brata spirit bilong ol i bin sik nogut tru. Ol i stretim tu rot bilong brata i go long narapela kantri bilong kisim marasin. Opoku i ting dispela brata i sik em i wanpela “bikman” bilong ol Witnes tasol em i kisim save olsem brata ya em i wanpela man nating tasol. Namba tu, long 1990 samting, Opoku i bin stap refiuji long Kot Diwa. Wanpela taim nek bilong em i drai long wara na em i go bilong baim wara long wanpela yangpela man. Opoku i gat pepa mani tasol na yangpela man i no gat senis, olsem na em i givim nating wara long Opoku na em i no baim. Taim yangpela man i givim wara long Opoku, em i askim Opoku: “Yu ting bai i gat wanpela taim we ol man olsem yu na mi bai givim nating samting long narapela na em i no ken baim?” Opoku i ting, ating yangpela man em i Witnes Bilong Jehova, na bihain yangpela man i tok em wanpela Witnes. Pasin bilong brata long givim samting na gutpela pasin bilong em i kirapim tru Opoku. Laspela samting, painia salim i laik givim nating nius long em, dispela i strongim em olsem tingting bilong em long ol Witnes i no stret na em mas senisim tingting. Em i wok long kamap strong long spirit na nau em i wanpela pablisa i no baptais.

Tasol maski ol bikpela hevi i wok yet long painim ol brata long Laibiria, ol i bilip long God na wok yet long autim gutnius bilong gutaim bai kamap taim Kingdom Bilong God i bosim graun long stretpela pasin. Jehova bai no inap lusim tingting long hatwok na gutpela wok ol i mekim long litimapim nem bilong em. ​​—⁠Hibru 6:​10.

[Ol Mep long pes 30]

(Bilong save ol dispela rait i stap we long pes, lukim buk o magasin)

MONROVIA

[Ol Piksa long pes 31]

Long taim bilong hevi, lain bilong Jehova i givim ol samting bilong spirit na bilong skin long ol man i sot