Ol Lain Asples Bilong Meksiko i Harim Gutnius

LONG Novemba 10, 2002, wanpela grup bilong lain Mixe, em wanpela lain asples bilong Meksiko i bung long San Miguel, Quetzaltepec. Em wanpela naispela taun long hap saut bilong Oaxaca. Dispela grup i go long wanpela kibung distrik bilong ol Witnes Bilong Jehova. Wanpela bikpela samting long program long moning em drama bilong Baibel.

Ol man i harim tok ol i kirap nogut taim ol i harim ol namba wan tok bilong drama bilong Baibel. Olgeta i paitim han strong na aiwara i pulap long ai bilong planti bilong ol. Ol i mekim drama long tok ples Mixe! Taim drama i pinis, planti i kamapim bel bilong ol olsem ol i amamas long dispela gutpela blesing em ol i no ting bai kamap. Wanpela meri i tok: “Em namba wan taim mi kliagut long tok bilong drama. Na mi pilim tru long bel.” Narapela meri tu i tok: “Maski sapos mi dai, mi bai amamas, long wanem, Jehova i bin larim mi harim drama long tok ples bilong mi yet.”

Samting i kamap long dispela moning em hap bilong wanpela bikpela wok ol Witnes Bilong Jehova i bin mekim bilong autim tok bilong Kingdom long ol asples bilong Meksiko.​—⁠Matyu 24:14; 28:​19, 20.

Jehova i Save Harim Ol Beten

I gat 6,000,000 asples long Meksiko​—⁠ol inap kamap wanpela kantri, i gat 62 narapela narapela tok ples long en. Winim 100,000 manmeri i save mekim 15 bilong ol dispela tok ples. Na winim 1,000,000 i no save long tok Spen, em bikpela tok ples bilong Meksiko. Na ol lain i save mekim tok Spen, planti bilong ol inap kliagut moa long tok i tru bilong Baibel long tok ples bilong ol yet. (Aposel 2:6; 22:⁠2) Inap planti yia sampela i bin stadi long Baibel na go long olgeta miting Kristen, tasol ol i no kliagut long ol tok ol i harim. Olsem na planti bilong ol i save beten long ol i ken harim tok i tru long tok ples bilong ol yet.

Bilong stretim dispela samting, long 1999 brens ofis bilong ol Witnes Bilong Jehova long Meksiko i stretim rot bilong mekim ol miting long ol tok ples bilong ol asples. Na ol i kamapim ol grup bilong tanim tok tu. Long 2000, ol i mekim drama long kibung distrik long tok ples Maya na bihain long sampela narapela tok ples.

Narapela wok ol i mas mekim, em long tanim tok bilong ol buk bilong stadi long Baibel bilong ol Witnes Bilong Jehova. Pastaim ol i tanim buklet Stap Amamas Oltaim Long Graun! long tok ples Huave, Maya, Mazatec, Totonac, Tzeltal na Tzotzil. Ol i tanim sampela moa buk samting, na ol i tanim tu Wok Kingdom long tok ples Maya. Ol i wokim tu ol kaset bilong sampela buk samting. Bilong skulim ol asples long rit na rait long tok ples bilong ol yet, ol i senisim sampela tok insait long buklet Wok Strong Long Lain Long Rit na Rait na bai i stret long ol. Long nau ol i wokim ol buk na nius bilong Baibel long 15 tok ples bilong ol asples, na bihain ol bai wokim sampela buk moa.

“Wok Strong”

Dispela wok bilong tanim tok i hatwok. Wanpela as na i olsem em, i no gat planti buk samting long ol tok ples bilong ol asples bilong Meksiko. Na planti tok ples i no gat dikseneri. Na tu insait long sampela tok ples, i gat planti liklik tok ples. Olsem: Insait long tok ples Zapotec, i gat 5-pela liklik tok ples. Ol dispela tok ples i narapela narapela, olsem na ol Zapotec bilong narapela narapela hap i no inap toktok wantaim.

Na tu, long ol hap we i no gat buk i gat ol lo bilong kolim ol tok ples, ol lain bilong tanim tok i mas kamapim sampela lo. Bilong mekim olsem ol i mas mekim wok painimaut na askim ol man. Olsem na pastaim planti bilong ol lain bilong tanim tok i gat wankain tingting olsem bilong Élida, em i save tanim tok Huave. Em i tok: “Taim ol i singautim mi long i go long brens ofis bilong ol Witnes Bilong Jehova long Meksiko bilong tanim tok, mi amamas, tasol mi tingting planti tu.”

Ol lain bilong tanim tok i mas lain tu long mekim wok long kompiuta, bihainim gut sediul, na tanim tok. Tru tumas, dispela wok em i hatwok. Tasol ol i gat wanem kain tingting long dispela? Gloria em wanpela bilong ol lain i save tanim tok Maya, em i tok: “I hatwok long stori long amamas mipela i kisim long insait long wok bilong tanim ol buk na nius bilong Baibel i go long tok ples Maya, em tok ples bilong mipela.” Wanpela brata i lukautim wanpela lain bilong tanim tok long Dipatmen Bilong Tanim Tok i stori long ol lain i tanim tok, na em i tok: “Dispela laik bilong kisim ol buk na nius bilong Baibel long tok ples bilong ol yet i strong tru, olsem na ol i wok strong long mekim dispela wok maski i gat hatwok.” Olsem wanem? Hatwok bilong ol i lus nating?

“Tenkyu Jehova!”

Jehova i mekim gut long wok bilong autim tok long ol asples. Namba bilong ol man i go long ol miting Kristen na kibung i go bikpela. Olsem, long 2001, inap 223 Witnes i save mekim tok Mixe i bung bilong tingim i dai bilong Jisas. Tasol ol man i kam long dispela bung em 1,674​—⁠dispela namba i winim namba bilong ol Witnes inap 7-pela taim!

Sampela manmeri em ol i kisim tok i tru, nau ol inap kliagut long ol tok ol i lainim, kirap long namba wan taim ol i stadi. Mirna i tingim samting i bin painim em taim ol miting i no kamap yet long tok Maya. Em i tok: “Mi kisim baptais bihain long mi stadi inap 3-pela mun. Mi save olsem mi mas kisim baptais, tasol mi mas tokaut olsem mi no bin kliagut long ol tok i tru bilong Baibel olsem mi mas save long en. Ating as bilong dispela em tok ples bilong mi, em Maya, na mi no save gut tumas long tok Spen. Sampela taim i lus pastaim na bihain mi kliagut long tok i tru.” Long nau, Mirna na man bilong em ol i amamas long insait long lain i tanim tok ples Maya.

Olgeta long ol kongrigesen i amamas tru long kisim ol buk samting long tok ples bilong ol yet. Taim ol i tokaut long buklet Stap Amamas Oltaim Long Graun! em ol i tanim long tok ples Tzotzil, wanpela meri husat i save go long ol miting Kristen i amamas tru na i tok: “Tenkyu, Jehova!” Ol ripot i soim olsem planti sumatin bilong Baibel i kamap strong hariap na ol i kisim baptais, na ol pablisa i lusim wok autim tok ol i kamap strong gen, na planti brata Kristen nau ol i pilim olsem ol inap long mekim ol wok insait long kongrigesen. Sampela man i amamas long kisim ol buk samting bilong Baibel long tok ples bilong ol yet na stadi long en.

Wanpela taim wanpela Witnes i go bilong mekim Baibel stadi wantaim wanpela meri, tasol meri i no stap. Taim man bilong dispela meri i opim dua, dispela sista i tokim em olsem em i laik ritim wanpela tok long buklet long em. Dispela man i tok: “Mi no laikim wanpela samting.” Dispela sista i tok ples Totonac long em na i tokim em olsem dispela buklet i stap long tok ples bilong ol. Taim dispela man i harim olsem em i kisim wanpela sia na em i sindaun. Taim sista i ritim ol tok bilong dispela buklet long em, dispela man i wok long tok olsem, “Em i stret. Yes, em i stret.” Nau dispela man i save go long ol miting Kristen.

Long Yucatán, man bilong wanpela Witnes i birua long tok i tru na sampela taim em i save paitim meri taim em i kam bek long haus bihain long ol miting. Taim ol i kirap mekim ol miting long tok ples Maya, sista i singautim man bilong em long i go long miting. Em i go na em i laikim ol tok i kamap long miting. Nau em i save go long olgeta miting, na em i stadi na em i no save paitim meri bilong em moa.

Wanpela man i save mekim tok ples Totonac i tokim tupela Witnes olsem em i no save beten, long wanem, pris bilong lotu Katolik i tokim em olsem God i save harim beten ol man i mekim long tok Spen tasol. Na em i mas baim pris bilong beten long ol lain Totonac. Ol Witnes i tokim em olsem God i save harim beten ol man i mekim long olgeta tok ples, na ol i givim em wanpela buklet long tok ples Totonac, na em i amamas tru long kisim dispela buklet.​—⁠2 Stori 6:​32, 33; Song 65:⁠2.

“Kualtsin Tajtoua”

Planti pablisa bilong Kingdom ol i amamas long ol dispela gutpela samting i kamap, olsem na ol i laik lainim wanpela tok ples bilong ol asples o ol i laik lainim gut moa wanpela tok ples ol i save pinis long en. Em samting wanpela wasman sekit i mekim, em i lukautim 5-pela kongrigesen i save mekim tok ples Nahuatl long hap not bilong Puebla. Em i tok: “Ol pikinini em ol i save slip long taim bilong ol miting, nau ol i no slip na ol i save putim gut yau taim mi mekim tok long tok ples Nahuatl. Long pinis bilong wanpela miting, wanpela mangi i gat 4-pela krismas i kam long mi na i tok: ‘Kualstin tajtoua’ (yu mekim gut tok). Dispela i mekim na mi pilim olsem hatwok bilong mi i no lus nating.”

Yes, dispela teritori bilong ol asples long Meksiko i “redi pinis,” na dispela i strongim tru ol lain i autim tok long ol dispela hap. (Jon 4:35) Roberto, em i bin helpim wok bilong kamapim dispela lain bilong tanim tok, em i tok: “Mipela i no inap lusim tingting taim mipela i lukim aiwara i kam daun long pes bilong ol brata na sista bilong mipela taim ol i harim tok i tru long tok ples bilong ol yet na ol i kliagut long en. Taim mi tingim dispela mi laik krai.” Tru tumas, taim ol i helpim ol dispela manmeri i gat gutpela bel long bilipim tok bilong Kingdom, dispela i mekim bel bilong Jehova i amamas tu.​—⁠Sindaun 27:⁠11.

[Blok long pes 10, 11]

Bungim Sampela Lain Bilong Tanim Tok

● “Papamama bilong mi i bin skulim mi long tok i tru taim mi liklik yet. Tasol sori tru, taim mi gat 11 krismas, papa bilong mi i lusim kongrigesen Kristen. Tupela yia bihain, mama bilong mi i lusim mipela ol pikinini. Mi namba wan bilong faipela pikinini, olsem na mi kisim wok bilong mama long lukautim ol liklik bratasusa bilong mi, maski mi stap yet long skul.

“Ol brata na sista bilong mipela long spirit i helpim mipela, tasol i stap bilong mipela i hatwok. Sampela taim mi save tingting: ‘Bilong wanem dispela samting i painim mi? Mi yangpela tumas!’ Jehova i helpim mi na long dispela rot tasol mi karim dispela hevi. Bihain long mi pinis long haiskul, mi kirap mekim wok autim tok fultaim, na dispela i helpim mi tru. Taim ol i bungim ol lain bilong tanim tok Nahuatl, ol i singautim mi long insait long dispela grup.

“Papa bilong mi i kam bek long kongrigesen, na ol liklik brata na susa bilong mi ol i mekim wok bilong Jehova. Mi stap gut long Jehova na gutpela samting i kamap. Em i blesim tru famili bilong mi.”​—⁠Alicia.

● “Wanpela wanklas Witnes i mekim wanpela tok i stori long ol man i bin kamap olsem wanem. Mi no bin stap long klas long dispela taim na mi tingting planti olsem nogut mi no inap bekim ol askim i kamap long tes, olsem na mi askim em long stori long mi long tok em i mekim. Mi bin tingting planti long wanem as ol man i save dai. Taim dispela wanklas Witnes i givim mi buk Creationa na em i askim mi long stadi long Baibel, mi orait long mekim olsem. Mi pilim tru ol samting Man Bilong Wokim yumi i tingting pinis long mekim na pasin bilong em long laikim yumi.

“Taim mi pinis long skul, mi gat rot long kamap tisa bilong tok Spen na tok Tzotzil. Tasol dispela i makim olsem mi mas i go i stap long wanpela longwe hap, na mi mas skul long ol wiken, na mi no inap go long ol miting Kristen. Tasol mi no mekim olsem​—⁠mi mekim wok olsem man bilong wokim ol haus brik. Papa bilong mi i no wanpela Witnes na em i no laikim samting mi makim long mekim. Bihain, taim mi mekim wok painia, ol i kamapim wanpela lain bilong tanim tok bilong ol buk bilong Baibel long tok ples Tzotzil. Bel bilong mi kirapim mi long insait long dispela wok.

“Mi lukim olsem taim ol brata na sista i gat ol buk samting long tok ples bilong ol yet, ol i pilim olsem mipela i amamas long ol na tingim ol. Dispela i mekim gut bel bilong mi. Mi amamas tru long mekim dispela wok.”​—⁠Humberto.

● “Taim mi gat 6-pela krismas, mama i lusim mipela. Long taim mi yangpela yet, papa bilong mi i kirap stadi wantaim ol Witnes Bilong Jehova. Wanpela taim wanpela sista i tokim mi olsem em i laik stadi wantaim mi na em i kamapim sampela gutpela tok bilong ol yangpela. Mi no gat mama, olsem na mi pilim olsem dispela stadi i bilong helpim mi. Mi kisim baptais taim mi gat 15 krismas.

“Long 1999 sampela lain nogut i kilim papa bilong mi i dai bilong kisim graun bilong em. Bel bilong mi i bagarap stret. Mi kisim bikpela bel hevi na mi pilim olsem mi no inap i stap laip moa. Tasol mi beten long Jehova long givim strong long mi. Wasman sekit na meri bilong em i strongim mi. I no longtaim bihain mi kamap painia oltaim.

“Wanpela taim mi lukim sampela manmeri ol i wokabaut inap 6-pela aua bilong i kam na harim wanpela tok i gat 20 minit long tok ples Totonac, maski olgeta narapela tok i kamap long miting em long tok Spen, na ol i no kliagut long en. Olsem na mi amamas tru olsem ol i singautim mi long go helpim wok bilong tanim ol buk samting bilong Baibel long tok ples Totonac.

“Mi save tokim papa bilong mi olsem mi gat laik long wok long brens ofis bilong ol Witnes Bilong Jehova. Em i save tokim mi olsem, em bai i hatwok long wanpela yangpela meri i gat kain krismas olsem bilong mi long wok long Betel. Em bai amamas stret taim em i kirap bek na kisim save olsem mi bin mekim wok long Betel, na mi tanim tok bilong ol buk samting bilong Baibel long tok ples bilong mipela!”​—⁠Edith.

[Futnot]

[Piksa long pes 9]

Ol lain i save tanim tok Tzotzil i wok long skelim wanpela tok i hatwok long tanim