Samting Pasin Daun Bilong Jehova i Mekim Long Yumi
DEVIT em i wanpela man i save long hevi. Em i kisim nogut long han bilong King Sol, em tambu papa bilong em i gat pasin jeles. Tripela taim Sol i traim long kilim Devit long spia na inap planti yia em i wok long painim em bilong kilim em, dispela i mekim na Devit i mas ranawe. (1 Samuel 18:11; 19:10; 26:20) Tasol Jehova i stap wantaim Devit. Jehova i kisim bek em long han bilong Sol na long han bilong ol narapela birua. Olsem na yumi pilim tru dispela singsing bilong Devit: “Bikpela em i strongpela banis bilong mi. Em i olsem ston i haitim mi, na em i save kisim bek mi long han bilong ol birua. Bikpela, yu bin kisim bek mi long han bilong ol birua. Yu givim mi hap plang bilong yu na mi hait i stap baksait long en. Yu bin helpim mi [“mekim pasin daun,” NW ] na mi gat biknem long ai bilong ol manmeri.” (2 Samuel 22:2, 36) Devit i kisim biknem long Israel. Olsem wanem na pasin daun bilong Jehova i insait long dispela?
Taim Baibel i tok long Jehova i mekim pasin daun, dispela i no makim olsem i gat sampela samting Jehova i no inap mekim o em i daun long ol narapela. Nogat. Dispela gutpela pasin i kamapim olsem em i gat bikpela sori long ol manmeri husat i wok strong long mekim pasin em i laikim, olsem na em i marimari long ol. Song 113:6, 7, i tok: “[God] i save lukluk i kam daun na lukim heven na graun wantaim. Em i save helpim ol rabisman na ol i no i stap nogut moa. Ol i stap gut tasol.” Dispela tok em i “lukluk i kam daun,” i makim olsem “em i lindaun bilong lukim” o “em i mekim pasin daun bilong lukim.” (Today’s English Version; Young’s Literal Translation of the Holy Bible) Olsem na long heven Jehova i bin “lindaun,” o “em i mekim pasin daun,” bilong em i ken helpim Devit, em man i gat sin tasol em i gat pasin daun na i laik mekim wok bilong God. Olsem na Devit i tok: “Bikpela, yu stap antap tru na yu nambawan, tasol yu save tingting long ol manmeri i no bikhet.” (Song 138:6) Pasin bilong Jehova long i no les kwik long Devit, na marimari na sori long em, i mas strongim olgeta husat i laik mekim laik bilong God.
Maski Jehova em i Nambawan King na em i stap antap winim olgeta samting long heven na graun, em i laik helpim yumi wan wan. Dispela i strongim yumi long bilip olsem em bai helpim yumi long taim nogut. I no gat as long yumi pret olsem em bai lusim tingting long yumi. Ol manmeri bilong Israel long bipo, ol i bin tok long Jehova olsem: “Taim ol birua i winim yumi, em i tingting yet long yumi. Oltaim oltaim em i save laikim yumi moa yet.”—Song 136:23.
Olsem Devit, yumi ol wokboi bilong Jehova long nau yumi inap kisim hevi. Ating ol lain i no save long God i tok bilas long yumi, o yumi karim hevi bilong sik samting, o yumi bel hevi long wanpela long famili i dai. Wanem wanem hevi i bungim yumi, sapos bel bilong yumi i gutpela, yumi ken go long Jehova long rot bilong beten, na askim em long marimari long yumi. Jehova bai “lindaun” bilong lukim yumi na harim ol beten bilong yumi. Man bilong raitim song i tok: “Bikpela i save lukautim ol stretpela manmeri, na em i save harim beten bilong ol.” (Song 34:15) Tru tumas, yumi pilim tru dispela gutpela pasin daun bilong Jehova, a?
[Ol Piksa long pes 30]
Olsem em i bin harim beten bilong Devit, Jehova i amamas long harim ol beten bilong yumi long nau