Yu Ting i Gat Wanpela Taim we Yumi Inap i Stap Bel Isi Tru?
OL PIKININI i amamas na i pilai wantaim gutpela papamama bilong ol—ol manmeri i save amamas long lukim kain samting olsem, a? Ol pikinini i save pilim olsem ol i stap gut taim ol i stap wantaim papamama bilong ol. Tasol long planti pikinini, ol i no gat kain amamas olsem. Sampela pikinini ol i save wari long olgeta de long ol bai painim ples slip long nait o nogat. Yu ting wanpela taim bai kamap we ol dispela pikinini i no gat haus na ol narapela manmeri i pret i ken i stap bel isi?
Maski i luk olsem i no gat wanpela gutpela samting bai kamap bihain, Tok Bilong God i helpim yumi long bilip olsem gutpela samting bai kamap bihain. Profet Aisaia i tok olsem i gat wanpela taim bai i kamap na olgeta manmeri bai i stap gut tru. Em i tok: “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol manmeri bilong mi na sindaun long ol haus bilong ol na kisim ol gaden wain bilong ol na wokim wain na dring.”—Aisaia 65:21, 22.
Tasol i gat as na man i ken bilip olsem dispela samting bai kamap? I no long olgeta taim dispela tok bilip na wet long gutpela samting bai kamap i makim olsem tru tru samting yumi wetim bai kamap. Nogat. Olsem: Long Brasil, i gat wanpela tok olsem “bilip na wetim gutpela samting i kamap em laspela samting bilong man i save dai.” Dispela tok i makim olsem planti manmeri i bilip na wet long gutpela samting bai kamap maski i no gat as tru bilong dispela samting ol i wetim. Tasol samting God i tokim yumi long bilip na wetim i gat as tru bilong em. Aposel Pol i tok: “Ol man i bilip long [God], ol bai i no inap kisim sem.” (Rom 10:11) Truim bilong ol tok profet bilong Baibel i kamap pinis i ken strongim bilip bilong yumi olsem olgeta narapela tok promis God Jehova i bin mekim ol tu bai kamap tru. Taim ol dispela tok promis i kamap, ol samting i mekim na ol pikinini i stap nabaut long ol strit bai i kamap olsem samting bilong bipo tasol.
Long nau tu, ol gutpela tok i stap long Baibel i ken helpim ol man i no gat gutpela samting bilong wetim i kamap bihain, na ol i ken mekim i stap bilong ol i kamap gutpela na painim bel isi tru. Olsem wanem ol inap mekim olsem? Ol Witnes Bilong Jehova long hap bilong yu i amamas long helpim yu long kisim bekim bilong dispela askim.