“Was i Stap”
LONG bipo, ol wasman bilong dua i save sanap long dua bilong ol banis bilong taun na ol haus lotu, na sampela taim ol i sanap long ai bilong haus bilong ol man. Ol i mas pasim ol dua bilong banis long nait, tasol ol i mas was tu long ol samting. Em i wanpela bikpela wok, long wanem, taim ol i lukim ol birua ol i mas givim tok lukaut long ol man bilong taun na bai ol i ken abrusim bagarap.
Jisas Krais i save long wok bilong ol wasman bilong banis, ol i kolim tu olsem wasman bilong dua. Wanpela taim em i tok ol disaipel bilong em i olsem wasman bilong dua na em i strongim ol long was i stap na tingim dispela taim em pasin na lo ol Juda i stap aninit long en bai pinis. “Yupela lukaut. Yupela i mas was i stap, long wanem, yupela i no save wanem taim dispela ol samting bai i kamap. Em i olsem wanpela man i lusim haus bilong en na i go wokabaut long narapela hap. . . . Na em i tokim man i save was long dua long em i mas was gut. Olsem na yupela i mas was gut. Yupela i no save wanem taim papa bilong haus bai i kam.”—Mak 13:33-35.
Olsem tasol, winim 125 yia nau, dispela nius Wastaua i bin kamapim tok bilong Jisas bilong strongim yumi long “was i stap.” Bai yumi was i stap olsem wanem? Olsem pes 2 bilong dispela nius i tok, “Dispela nius i skelim ol samting i kamap long graun, em ol i truim tok profet bilong Baibel, na i tokim olgeta lain long Kingdom Bilong God na mekim gut bel bilong ol. Dispela Kingdom liklik taim bai pinisim ol man i mekim nogut long ol narapela man, na em bai mekim graun i kamap gutpela ples paradais.” Ol i save prinim winim 26,000,000 Wastaua long 150 tok ples na ol i save tilim long olgeta hap bilong graun—i no gat narapela nius bilong lotu ol i save tilim planti tru olsem dispela nius Wastaua. Long rot bilong Wastaua, ol Witnes Bilong Jehova, olsem ol wasman bilong dua long bipo, ol i wok long tokim ol man long olgeta hap long “was i stap” long ol samting bilong spirit, long wanem, klostu nau Bikman, Jisas Krais, bai kam gen na bagarapim dispela pasin bilong nau yumi stap long en.—Mak 13:26, 37.