Tok i Tru i Karim Kaikai Long Ol Man Yu Skulim Ol?

TAIM yangpela man Eric i tokaut olsem em i no laik i stap moa olsem wanpela Witnes Bilong Jehova, bel bilong papamama i bagarap stret. Ol i no bin luksave olsem tingting bilong em i senis. Taim Eric i mangi yet, em i bin insait long famili stadi, na em i save go long ol miting Kristen, na autim tok wantaim kongrigesen. I olsem em i stap insait long tok i tru. Tasol nau em i lusim pinis papamama na tupela i save, tok i tru bilong Baibel i no bin stap long bel bilong em. Tupela i kirap nogut na i bel hevi tru long dispela samting i kamap.

Sampela moa ol i bin kisim wankain bel hevi taim wanpela Baibel sumatin bilong ol i lusim stadi. Long kain taim olsem, ating ol i askim ol yet: ‘Olsem wanem na mi no bin luksave olsem em bai mekim olsem?’ Orait yumi laik save, taim dispela samting i no kamap yet, yumi inap skelim olsem tok i tru i karim kaikai long bel bilong ol man yumi skulim ol o nogat? Na olsem wanem yumi ken save olsem tok i tru i wok insait long bel bilong yumi yet na ol man yumi skulim ol? Long tok piksa bilong em long man i tromoi pikinini kaikai long gaden, Jisas i helpim yumi long kisim bekim bilong ol dispela askim.

Tok i Tru i Mas Go Daun Long Bel

Jisas i tok: “Ol pikinini wit ol i makim tok bilong God. Tasol ol dispela pikinini wit i pundaun long gutpela graun, ol i olsem ol man i harim tok na ol i holimpas. Bel bilong ol em i stretpela na i gutpela, na ol i save stap strong na ol i karim kaikai i stap.” (Luk 8:​11, 15) Olsem na tok i tru bilong Kingdom i mas i go daun long bel bilong ol sumatin bilong yumi pastaim bambai em i ken karim kaikai. Jisas i tokim yumi olsem, taim tok i tru bilong God i go daun long gutpela bel, kwiktaim dispela tok i tru i kirap mekim wok insait long bel na i karim kaikai, olsem gutpela pikinini kaikai ol i planim long gutpela graun. Orait yumi mas wok long painim wanem samting long sumatin?

Yumi mas tingim ol pasin i stap long bel bilong em, na i no long skin tasol. Maski man i stadi na mekim ol samting bilong lotu, sampela taim dispela i no save kamapim klia ol tingting i stap long bel bilong em. (Jeremaia 17:​9, 10; Matyu 15:​7-9) Yumi mas lukluk i go insait tru long bel. Yumi mas lukim sampela senis i kamap long ol laik bilong em, na ol tingting bilong bel i save kirapim em, na ol samting i bikpela samting tru long em. Em i mas wok long kisim nupela pasin i stret wantaim laik bilong God. (Efesus 4:​20-24) Olsem: Taim ol Tesalonaika i harim gutnius, kwiktaim ol i kisim dispela tok olsem tok bilong God. Tasol taim ol i wok long sanap strong na karim hevi, na ol i stap gut long God, na ol i laikim tumas God na ol narapela man, Pol i luksave olsem tok i tru “i wok strong long bel bilong [ol].”​—⁠1 Tesalonaika 2:​13, 14; 3:⁠6.

Tru, ol tingting i stap long bel bilong sumatin, bihain bai i kamap ples klia long ol pasin em i mekim, olsem pasin bilong Eric i makim. (Mak 7:​21, 22; Jems 1:​14, 15) Tasol sori tru, taim sampela pasin kranki i kamap ples klia, yumi no gat rot nau long helpim em. Olsem na yumi mas wok strong long luksave long sampela pasin kranki bilong em taim ol i no kamap strong yet long em na pundaunim em long ol samting bilong spirit. Yumi mas i gat rot bilong lukluk i go insait long bel bilong em. Yumi ken mekim olsem wanem?

Kisim Save Long Pasin Bilong Jisas

Jisas inap save tru long tingting i stap long bel bilong man. (Matyu 12:25) Tru, yumi no inap mekim olsem. Tasol em i bin soim yumi olsem yumi tu inap save long ol laik, na tingting bilong bel, na ol samting i bikpela samting long man. Ol dokta i save mekim wok long ol kain kain rot bilong glasim bel tru tru bilong man, em i gat wanem kain sik. Na olsem tasol Jisas i bin mekim wok long Buk Bilong God bilong ‘pulim tingting’ bilong man “i kam antap” na kamapim long ples klia “olgeta tingting na laik bilong bel,” maski ol i stap hait yet long ol man.​—⁠Sindaun 20:5; Hibru 4:⁠12.

Olsem: Long wanpela taim Jisas i helpim Pita long save long wanpela pasin kranki bilong em, em bihain dispela pasin i kamap olsem samting bilong pundaunim em. Jisas i save Pita i laikim em tru. I no longtaim i go pinis na Jisas i bin givim “ol ki bilong kingdom” long em. (Matyu 16:​13-19) Tasol Jisas i save tu olsem Satan i putim ai long ol aposel. Bihain ol bikpela hevi na traim bai kamap long ol bilong mekim ol i lusim bilip. Ating Jisas i save pinis olsem sampela samting long bilip bilong ol disaipel i no strong tumas. Olsem na em i no surik long tokim ol long samting ol i mas mekim bilong stretim ol dispela pasin. Yumi ken tingim pasin bilong em long kamapim dispela tok long ol.

Matyu 16:21 i tok: “Long dispela taim Jisas i stat long tokim ol disaipel olsem em i mas . . . karim planti pen” na “bai ol i kilim em i dai.” Taim Jisas i tokim ol long samting bai painim em, ating em i bin kamapim sampela ves bilong Baibel, olsem Song 22:​14-18, o Aisaia 53:​10-12, i makim olsem Mesaia i mas karim planti pen na em i mas i dai. Taim Jisas i ritim o kolim ol tok i stap long Buk Bilong God, em i givim rot long Pita na ol narapela disaipel long kamapim ol tingting i stap long bel bilong ol. Ol bai ting olsem wanem long dispela save olsem bihain ol man bai mekim nogut long ol?

Maski Pita i bin soim olsem em i gat strongpela bel na em i man bilong wok strong, toktok em i mekim long dispela taim i kamapim olsem em i gat sampela tingting i kranki tru. Em i tok: “Bikpela, nogat tru. Dispela samting i no inap kamap long yu.” Dispela tingting bilong Pita i kranki tru, long wanem, olsem Jisas i tok, Pita ‘i no bihainim tingting bilong God. Nogat. Em i bihainim tingting bilong ol man tasol,’ em pasin i kranki tru na bihain em inap kirapim Pita long mekim sampela bikpela rong. Orait Jisas i mekim wanem? Em i krosim Pita na bihain Jisas i tokim Pita na ol narapela disaipel: “Sapos wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en na bihainim mi.” Em i kamapim sampela tingting i stap long Song 49:8 na 62:​12, na long gutpela pasin em i tokim ol, God wanpela tasol inap givim laip i stap oltaim long ol, na ol man yet i no inap givim.​—⁠Matyu 16:​22-28.

Tru, bihain, inap liklik taim tasol, Pita i pret na em i tokaut 3-pela taim olsem em i no save long Jisas. Tasol yumi ken ting dispela tok na ol narapela tok Jisas i bin givim long ol disaipel i bin helpim Pita na kwiktaim em i kisim bek strong bilong em long ol samting bilong spirit. (Jon 21:​15-19) Inap 50 de tasol bihain long dispela, Pita i sanap long ai bilong planti manmeri long Jerusalem na em i tokaut olsem Jisas i kirap bek pinis. Long ol wik na mun na yia bihain, planti taim ol soldia i holim em, na ol i paitim em, na em i stap kalabus, na em i stap gutpela piksa tru long man i stap gut long God na i no pret liklik.​—⁠Aposel 2:​14-36; 4:​18-21; 5:​29-32, 40-42; 12:​3-5.

Yumi kisim wanem save long dispela? Yu inap save long samting Jisas i bin mekim bilong pulim i kam antap na kamapim long ples klia ol tingting i stap long bel bilong Pita? Pastaim Jisas i makim sampela ves bilong Baibel bambai Pita i ken putim tingting i go long dispela pasin kranki em i mas stretim. Bihain long en, em i givim rot long Pita long kamapim tingting i stap long bel bilong em. Orait las tru, Jisas i kamapim sampela tok moa bilong Baibel bilong helpim Pita long stretim tingting na bel bilong em. Tru, ating yu tingting olsem dispela kain pasin bilong skulim man i hatwok tumas long yu, tasol yumi ken tingim tupela stori i soim yumi long olsem wanem pasin bilong redi gut na wetim Jehova em inap helpim yumi olgeta long bihainim pasin bilong Jisas long skulim ol man.

Pulim Tingting Long Bel i Kam Antap

Taim wanpela papa i kisim save olsem tupela pikinini man bilong em long gret 1 na 2 i bin kisim loli long tebol bilong tisa, em i tokim tupela long sindaun na em i givim sampela tok long ol long dispela samting. Papa i no ting dispela em liklik samting ol pikinini i save mekim, nogat. Papa i tok: “Mi wok strong long pulim tingting i stap long bel bilong tupela i kam antap na bai mi ken save wanem samting i bin kirapim ol long mekim dispela samting nogut.”

Papa i askim tupela pikinini long traim tingim bek samting i bin painim Akan, olsem Josua sapta 7 i stori long en. Kwiktaim tupela i pilim tru dispela samting na ol i tokaut long rong bilong ol. Bel bilong tupela i gat tok long dispela. Olsem na papa i tokim tupela long ritim Efesus 4:​28, i tok: “Ol stilman i no ken stil moa. Nogat. Nau ol i mas wok . . . na ol bai i kisim planti samting, inap long ol i ken helpim ol man i sot long ol samting.” Papa i tokim tupela pikinini olsem ol i mas baim sampela loli na givim long tisa olsem bekim bilong samting ol i bin kisim, na long dispela rot ol bai pilim tru ol tok bilong Baibel em i givim long tupela.

Papa i tok: “Taim mipela i save pinis long ol tingting nogut i stap long bel bilong tupela, mipela i toktok gut wantaim tupela na bai mipela i ken rausim ol dispela tingting na putim ol gutpela na stretpela tingting long bel bilong ol.” Papamama i bihainim pasin bilong Jisas taim ol i skulim tupela pikinini, olsem na sampela yia bihain gutpela samting i kamap long dispela wok bilong ol. Tupela pikinini man wantaim i kisim pas i singautim ol i go wok long Betel, long hetkota i stap long Brooklyn, na nau, inap 25 yia bihain, wanpela i wok yet long dispela hap.

Yumi ken tingim pasin narapela Kristen i bin mekim bilong helpim Baibel sumatin bilong em. Baibel sumatin bilong em i save go long ol miting na mekim wok bilong autim tok, na em i tokaut pinis olsem em i laik kisim baptais. Tasol i luk olsem em i bilip tumas long strong bilong em yet na em i no tingim Jehova i mas givim strong long em. Witnes i tok: ‘Em i meri singel na em i lain pinis long mekim ol wok long save na strong bilong em yet. Mi tingting planti long em, nogut em i kisim sik long dispela o em i pundaun long ol samting bilong spirit.’

Olsem na Witnes i kirap toktok wantaim meri hia long tok bilong Matyu 6:​33, na em i wok long kirapim meri long putim Kingdom i go pas long ol narapela samting, na wetim Jehova i helpim em long ol hevi samting bilong em. Witnes i askim stret meri: “Ating pasin bilong i stap wanpis i mekim na sampela taim yu hatwok long wetim ol narapela, na Jehova tu long helpim yu, a?” Meri i tokaut olsem nau em i no save beten tumas. Orait nau Witnes i wok long kirapim em long bihainim tok bilong Song 55:22 na putim olgeta hevi bilong em long han bilong Jehova, long wanem, olsem 1 Pita 5:7 i tok, ‘God i save wari long yu.’ Bel bilong meri i pilim tru dispela tok. Witnes i tok, “I no planti taim mi bin lukim em i krai, tasol nau em i krai.”

Larim Tok i Tru i Wok Yet Long Bel Bilong Yu

Taim yumi lukim ol Baibel sumatin bilong yumi i bihainim tok i tru bilong Baibel, yumi save kisim bikpela amamas. Tasol yumi yet i mas i stap olsem gutpela piksa bambai wok bilong yumi long helpim ol i ken karim kaikai. (Jut 22, 23) Yumi olgeta i mas “wok strong long mekim ol samting bambai God i ken kisim bek [yumi], na mekim long pasin bilong pret na guria.” (Filipai 2:​12, NW ) Oltaim yumi mas larim lait bilong tok bilong Baibel i lait long bel bilong yumi yet na bai em i ken painim ol tingting na laik samting em yumi mas stretim.​—⁠2 Pita 1:⁠19.

Olsem wanem? Long nau yu slek liklik long mekim ol wok Kristen? Sapos olsem, orait wanem samting i mekim? Ating wanpela as i olsem: Nogut yu ting yu inap mekim long strong bilong yu yet. Olsem wanem yu ken save yu bin mekim olsem o nogat? Ritim Hagai 1:​2-11 na tingim pasin Jehova i bin mekim long toktok gut wantaim ol Juda ol i kam bek pinis long ples. Orait nau askim yu yet: ‘Mi save tingting tumas long bungim mani na kisim ol samting bilong skin na bai mi gat gutpela sindaun? Mi bilip tru olsem Jehova bai lukautim famili bilong mi sapos mi putim ol samting bilong spirit i stap nambawan? O mi ting mi mas lukautim mi yet pastaim?’ Sapos yu lukim olsem yu gat wok long stretim tingting o bel bilong yu, orait yu mas mekim olsem. Ol tok bilong Baibel olsem i stap long Matyu 6:​25-33, Luk 12:​13-21, na 1 Timoti 6:​6-12, em bai givim stretpela tingting long yumi long ol samting bilong skin yumi mas kisim na ol samting yumi holim pinis, na bai Jehova i ken wok yet long mekim gut long yumi.​—⁠Malakai 3:⁠10.

Dispela kain pasin bilong glasim gut bel bilong yumi yet em inap mekim na yumi tingting gut. Tru, sapos wanpela i kamapim sampela pasin kranki bilong yumi, ating bai yumi bel hevi stret na i hatwok long tokaut olsem yumi gat ol dispela pasin. Tasol taim yu kirap na helpim pikinini bilong yu, o Baibel sumatin bilong yu, o yu yet​—⁠maski em samting i hatwok long kamapim​—⁠ating yu kirap pinis long mekim ol samting bilong lukautim laip bilong em o laip bilong yu yet.​—⁠Galesia 6:⁠1.

Tasol olsem wanem sapos yu ting hatwok bilong yu i no kamapim gutpela samting? Yu no ken les hariap. Taim yumi laik stretim ol tingting kranki bilong bel i gat sin long en, yumi mas mekim pasin isi tru na tingting gut, na lusim bikpela haptaim, na sampela taim bai yumi tingting planti. Tasol gutpela samting inap kamap long en.

Yangpela man Eric em yumi stori pinis long em, bihain em i kisim bek gutpela tingting na em i kirap gen long “bihainim tok tru.” (2 Jon 4) Em i tok: “Taim mi kisim tingting pinis long gutpela samting mi bin tromoi, mi tanim bel na kam bek long Jehova.” Papamama i helpim Eric na nau em i mekim gen wok bilong Jehova. Bipo em i save bel nogut taim papamama i wok long kirapim em long glasim gut bel bilong em, tasol nau em i tenkyu tru long papamama i bin mekim olsem. Em i tok: “Papamama bilong mi i gutpela tru. Ol i no bin lusim pasin bilong laikim mi tru.”

Taim yumi sutim lait bilong Tok Bilong God i go long bel bilong ol man yumi skulim ol, yumi mekim gutpela-pasin-sori. (Song 141:​5, NW ) Wok yet long glasim bel bilong ol pikinini na Baibel sumatin bilong yu bilong painim sampela mak bilong nupela pasin Kristen i wok long kru na kamap long bel bilong ol. Yu mas “autim stret tok tru bilong God” na bai tok i tru i ken wok yet insait long bel bilong ol narapela na long bel bilong yu yet.​—⁠2 Timoti 2:⁠15.

[Piksa long pes 29]

Tok bilong Jisas i kamapim klia wanpela tingting kranki long bel bilong Pita

[Piksa long pes 31]

Mekim wok long Baibel bilong pulim ol tingting bilong bel i kam antap