Yu Ting i Gat Planti Save Tumas Bilong Kisim?

Tupela marit i mekim wok misineri ol i sindaun long nambis long hap bilong Wes Afrika na tupela i lukluk long mun antap. Man i tokim meri bilong em: “Yumi ol man i gat hamas save long mun, na yumi mas kisim hamas save moa long en?”

Meri bilong em i tok: “Sapos yumi inap lukluk long graun bilong yumi i drip i go olsem mun i mekim​—ol man bilong graun i kisim hamas save pinis, na ol i mas kisim hamas save moa? Na tingim: Graun i wok long raunim san, na san na graun na olgeta arapela planet i raunim san olgeta wantaim i wokabaut. Olsem na ating bai yumi no ken i stap moa long dispela hap stret em graun i stap long en nau. Yumi save long hap nau yumi stap long en, long wanem, i gat san na ol sta yumi save pinis long ol, na yumi save graun i stap longwe olsem wanem long ol. Yumi gat planti save moa long sampela samting, tasol i olsem yumi no save yumi stap we tru.”

OL DISPELA tingting bilong tupela marit i kamapim sampela bikpela tok tru. I olsem i gat planti samting moa yumi mas lain long en. Tru, long olgeta de yumi save lain long sampela nupela samting. Tasol maski yumi kisim hamas save, i olsem yumi no inap lain long olgeta samting yumi laik save long en.

Tru, yumi inap kisim ol nupela save, na tu, long nau yumi inap bungim planti save moa em yumi kisim pinis. Olgeta save ol man i kisim pinis, ol inap bungim wantaim long rot bilong ol nupela kompiuta ol i bin wokim. Long nau ol kompiuta inap bungim planti planti save moa, olsem na ol i mas putim ol nupela nem long ol dispela nupela hap bilong kompiuta. Samting ol i kolim CD-ROM, em inap bungim planti save, inap olsem 680 megabait. Na DVD inap bungim planti save moa moa yet, winim CD-ROM inap 7-pela taim. Na ol i wok long wokim sampela DVD ol inap bungim planti save moa, winim dispela.

Ol lain bilong nau i gat planti rot moa yet long salim ol kain kain save i go long ol man. Ol nupela masin i save wok hariap tru long wokim olkain nius na buk samting. Na yumi ken kisim ol kain kain save long rot bilong Intenet, na i olsem i no gat pinis bilong ol save yumi inap kisim. Long dispela rot na long ol narapela rot tu, planti man moa ol inap kisim hariap tru ol kain kain save, na yumi no inap putim ol dispela save long het bilong yumi na holim strong long tingting. Tru tumas, ol save yumi ol man inap kisim i kamap planti moa yet, i olsem traipela solwara yumi stap long en na yumi mas lain long subim wara na bai yumi no ken dring wara i go na wara i pulap olgeta long bel na yumi bagarap​—yumi inap subim wara i go na stap gut. Ol dispela save ol man inap kisim ol i planti tumas olsem dispela bikpela solwara yumi stori long en, olsem na yumi mas was gut na skelim wanem kain save yumi bai kisim.

Na i gat narapela as na yumi mas skelim gut wanem kain save yumi bai kisim. Sampela save i no gat wok bilong en. Na i gat sampela save i no gutpela long kisim, na i no gutpela yumi save long ol dispela samting. Yumi no ken lusim tingting: Sampela save i gutpela na sampela save i nogut​—sampela inap helpim yumi na sampela i no inap helpim yumi. Na tu, planti tok yumi inap kisim long Intenet na buk samting, planti man i ting ol i stret, tasol nogat. Planti tok bilong ol saveman i gat namba, bihain ol man i lukim olsem dispela tok i giaman tasol. Yumi ken tingim kuskus bilong taun Efesus long bipo tru, em i gat nem olsem man i gat planti save. Em i bin tok: “Wanem man i no save olsem Efesus em i taun bilong lukautim haus lotu bilong bikpela god meri Artemis, na bilong lukautim dispela ston tambu i bin pundaun long heven?” (Aposel 19:​35, 36) I luk olsem olgeta man i save long dispela samting​—na planti ol i ting dispela tok i stret tru​—tasol dispela tok long ston tambu i bin pundaun long heven, em i no tru. Olsem na i gat as tru na Baibel i givim tok lukaut long ol Kristen olsem ol i mas was gut long olkain tok ol man i kolim olsem “gutpela save” tasol em “i pait long tingting bilong God.”​—1 Timoti 6:20.

Na i gat narapela as na yumi mas skelim gut wanem kain save yumi bai kisim: Dispela laip nau yumi stap long en, em i bilong sotpela taim tasol. Maski yu gat hamas krismas, ating i gat planti samting yu laik kisim save long en, tasol yu save pinis olsem bai yu no i stap longtaim tumas inap long yu ken lain long ol dispela samting.

Olsem wanem? Bihain dispela hevi bai senis? I gat sampela kain save yumi inap kisim na em bai helpim yumi long i stap longtaim tru, o i stap oltaim oltaim? Ating dispela kain save i stap pinis? Sapos olsem, inap olgeta man i ken kisim dispela save? Bihain i gat taim bai kamap na olgeta save yumi inap kisim em tok tru tasol? Tupela misineri em yumi stori pinis long ol, ol i painim pinis gutpela bekim bilong ol dispela askim, na yu tu inap. Plis ritim stori i kamap bihain long dispela, em bai soim yu long rot bilong kisim save i go inap oltaim oltaim.