Mekim Gutpela Wok Long Olgeta De

“SOIM mipela long pasin bilong kaunim ol de bilong mipela bambai mipela inap bihainim gutpela tingting.” (Song 90:​12, NW ) Moses, man bilong raitim hap bilong Baibel, i bin mekim dispela beten long pasin daun. Em i beten long wanem samting stret? Olsem wanem? Yumi mas beten olsem tu?

Long ves 10, Moses i stori olsem yumi man i save stap laip inap sotpela taim tasol. Long narapela taim, em i raitim tok bilong Jop, husat i bin tok: “Mipela ol manmeri i save stap sotpela taim tasol long graun, na stat long taim mama i karim mipela, ol kain kain trabel i save kamap long mipela.” (Jop 14:1) Dispela i kamapim klia olsem Moses i pilim tru olsem yumi sinman i no inap i stap longpela taim. Long dispela as tasol, em i tingim laip bilong em long olgeta wan wan de em i gutpela samting tru. Long dispela beten Moses i kamapim laik bilong em long yusim ol de em i stap laip bilong mekim ol samting bilong amamasim Man Bilong Wokim em. Ating yumi tu i laik mekim ol gutpela samting long olgeta wan wan de long laip bilong yumi, a? Bai yumi mekim olsem sapos yumi laik bai God i orait long yumi long nau.

I gat narapela samting i bin kirapim Moses na Jop, em wanpela samting i mas kirapim yumi tu. Dispela tupela man i tingim gutpela samting ol bai kisim long bihain​​—laip hia long graun wantaim gutpela sindaun. (Jop 14:​14, 15; Hibru 11:26) Taim yumi kisim pinis dispela gutpela sindaun, indai i no inap pinisim ol gutpela wok yumi mekim. Man Bilong Wokim yumi bai kamapim nupela taim we ol man i stap gut long em bai stap oltaim long Paradais long graun. (Aisaia 65:​21-​24; KTH 21:​3, 4) Dispela samting inap painim yu tu sapos yu ‘kaunim ol de bilong yu bambai yu inap bihainim gutpela tingting.’