Yu Save Toktok Gut Wantaim Famili Bilong Yu?

NIUS Polityka bilong Polan i tok: “Pasin bilong yumi long toktok gut wantaim famili bilong yumi i wok long i go slek tru.” Long Amerika, ol marit i save lusim 6-pela minit tasol long wan wan de long toktok gut wantaim ol poroman marit bilong ol. Sampela saveman i ting olsem as na 50 pesen bilong ol marit i katim marit o ol i lusim poroman marit bilong ol em dispela hevi bilong toktok gut wantaim.

Tasol olsem wanem long pasin bilong toktok wantaim namel long ol papamama na ol pikinini? Nius i tok: Planti taim, “i no olsem ol i toktok wantaim, nogat, em i kamap taim bilong papamama long sutim ol askim long ol pikinini, olsem: Olsem wanem long skul? Olsem wanem long ol pren bilong yu?” Nius i mekim askim olsem: “Olsem wanem ol pikinini bilong yumi bai kisim save long pasin bilong pilim tru tingting bilong narapela na pas gut wantaim ol?”

Ol gutpela pasin bilong toktok i no save kamap nating, olsem na yumi ken mekim wanem bilong kamap gutpela moa? Disaipel Kristen Jems i givim yumi gutpela tok: “Yupela olgeta i mas putim yau kwik long harim tok, tasol yupela i no ken hariap long mekim toktok, na yupela i no ken kros kwik.” (Jems 1:​19) Yes, bilong yumi i ken kamapim tok i strongim narapela, yumi mas putim gut yau na no ken katim tok hariap o yumi wokim tingting hariap. Abrusim pasin bilong sutim tok nating, long wanem, em inap pasim pasin bilong toktok gut wantaim. Na tu, Jisas i no sutim ol strongpela askim long ol man, nogat, em i bin yusim ol gutpela askim bilong pulim tingting i stap long bel bilong ol man i harim tok bilong em na long strongim pasin laikim namel long ol.​​—⁠Sindaun 20:5; Matyu 16:​13-​17; 17:​24-​27.

Bihainim ol gutpela stiatok i stap long Baibel, na go pas long toktok na stori gut wantaim ol lain yu laikim tru. Dispela bai kamapim gutpela pasin pren we yu bai tingim inap planti yia​​—⁠o long laip olgeta bilong yu.