Askim
Pita i stap long kalabus na taim ol disaipel i harim olsem em i stap ausait long dua, bilong wanem ol i tok: “Ating yu lukim ensel bilong en tasol”?—Aposel 12:15.
Ating ol disaipel i tingting kranki olsem wanpela ensel bilong bringim tok olsem mausman bilong Pita em i sanap ausait long dua. Yumi ken skelim ol tok i stap klostu long dispela ves.
Herot i bin kalabusim Pita, na paslain long dispela, Herot i bin kilim i dai Jems. Olsem na i gat as na ol disaipel i ting Herot bai kilim i dai Pita tu. Ol i bin pasim tupela sen long han bilong Pita, na i gat 4-pela lain soldia i senis senis na was long em, em 4-pela lain wan wan i gat 4-pela soldia long en. Orait long wanpela nait i gat wanpela mirakel i kamap na wanpela ensel i kam lusim ol sen long han bilong Pita na bringim em i go ausait. Taim tingting bilong Pita i klia na em i save long samting i bin kamap, em i tok: “Nau mi save tru, Bikpela i bin salim ensel bilong en i kam, na em i kisim mi bek long han bilong Herot.”—Aposel 12:1-11.
Kwiktaim Pita i go long haus bilong Maria, mama bilong Jon Mak, we sampela disaipel i bung long en. Pita i paitim dua bilong banis na wanpela wokmeri nem bilong em Roda i kam ausait. Taim em i harim nek bilong Pita, kwiktaim em i ran i go tokim ol narapela, na em i no opim dua long Pita. Pastaim ol disaipel i no bilip olsem Pita i sanap ausait long haus. Ol i tingting kranki na i tok: “Ating yu lukim ensel bilong en tasol.”—Aposel 12:12-15.
Olsem wanem? Ol disaipel i ting Herot i kilim Pita i dai pinis na nau spirit bilong em i kam sanap long dua? Yumi no inap ting olsem, long wanem, ol disaipel bilong Jisas i save pinis long tok i tru bilong Baibel i tok, ol man i dai pinis “ol i no inap save long wanpela samting.” (Saveman 9:5, 10) Orait ol disaipel i gat wanem tingting na ol i tok wokmeri i “lukim ensel bilong en tasol”?
Ol disaipel bilong Jisas i save, kirap long bipo yet ol ensel i bin helpim lain bilong God. Jekop i bin toktok long ensel olsem: “Yu bin kamap long mi olsem ensel na kisim bek mi long taim mi laik bagarap.” (Stat 48:16) Na long wanpela liklik pikinini i stap wantaim ol, Jisas i tokim ol disaipel: “Nogut yupela i ting wanpela namel long ol dispela liklik pikinini em i olsem samting nating. Nogat. Mi tokim yupela, long heven ol ensel bilong ol, oltaim ol i save stap long pes bilong Papa bilong mi em i stap long heven.”—Matyu 18:10.
Baibel Young’s Literal Translation of the Holy Bible, i tanim dispela tok agʹge·los (“ensel”) olsem “man bilong bringim tok.” I luk olsem sampela Juda i bin bilip olsem olgeta wan wan wokman bilong God i gat wanpela ensel bilong em yet—olsem “wasangelo.” Tru, dispela tingting i no stap long Baibel, tasol yumi ken ting, taim ol disaipel i tok, “Yu lukim ensel bilong en tasol,” ol i ting wanpela ensel bilong bringim tok olsem mausman bilong Pita, em i kam sanap long dua.