Helpim i Kam Long Ol Ensel Bilong God

SAMPELA man i tok ol i bilip tasol long ol samting ol inap lukim. Tasol dispela em longlong tingting. I gat planti samting i stap tru em yumi no bin lukim long ai. Yu inap kolim wanpela?—

Olsem wanem long win yumi save pulim? Yumi inap pilim?— Apim han bilong yu, na bloim win long en. Yu pilim wanpela samting?— Yes, tasol yu no inap lukim win, a?—

Yumi stori pinis long ol spirit, em yumi no inap lukim ol. Yumi kisim save olsem sampela ol i gutpela na sampela ol i nogut. Kolim nem bilong sampela gutpela spirit em yumi no inap lukim ol.— Yes, God Jehova, Jisas, na ol gutpela ensel. Yu ting i gat ol ensel nogut tu?— Baibel i tok i gat. Tokim mi long ol samting yu bin kisim save long en long ol spirit nogut.—

Wanpela samting yumi save long en i olsem: Ol gutpela ensel na ol ensel nogut ol i gat bikpela strong, winim yumi. Bikpela Tisa i save long planti samting bilong ol ensel. Em i save, long wanem, em tu i bin stap olsem wanpela ensel paslain long em i kamap olsem bebi long graun. Em i bin stap wantaim ol arapela ensel long heven. Em i save long planti milion ensel. Yu ting olgeta dispela ensel i gat nem?—

Orait, yumi bin kisim save olsem God i bin givim nem long ol sta. Olsem na yumi ken bilip olsem olgeta ensel tu i gat nem. Na yumi save olsem ol inap toktok wantaim, long wanem, Baibel i tok long ‘tok ples bilong ol ensel.’ (1 Korin 13:1) Yu ting ol ensel i save toktok long wanem ol samting? Yu ting ol i toktok long yumi ol man bilong graun?—

Yumi save olsem ol ensel bilong Satan, em ol spirit nogut, ol i laik kirapim yumi long sakim tok bilong Jehova. Olsem na ating ol i save toktok long olsem wanem ol i ken mekim dispela samting. Ol i laik bai yumi mekim pasin olsem ol na bai Jehova i no ken laikim yumi tu. Tasol olsem wanem long ol gutpela ensel bilong God? Yu ting ol tu i save toktok long yumi?— Yes, ol i save mekim. Ol i laik helpim yumi. Mi laik stori long yu long olsem wanem sampela ensel bilong God i bin helpim ol man i laikim Jehova na mekim wok bilong em.

Olsem: Wanpela man nem bilong em Daniel, em i bin stap long Babilon. Planti man long dispela ples ol i no laikim Jehova. Ol i kamapim wanpela lo i tok ol man i beten long God Jehova ol i mas kisim strafe. Tasol Daniel i beten yet long Jehova. Yu save long samting ol i mekim long Daniel?—

Yes, ol man nogut i wokim rot na bai ol i tromoi Daniel i go daun long hul bilong ol laion. Daniel i stap wanpis wantaim ol laion i hangre nogut tru. Yu save long wanem samting i bin kamap?— Daniel i tok: “God i bin salim ensel bilong en i kam na i pasim maus bilong ol laion.” Daniel i no kisim bagarap liklik! Ol ensel inap mekim ol gutpela samting tru bilong helpim ol man i mekim wok bilong Jehova.—Daniel 6:​18-22.

Na i gat stori bilong Pita tu taim em i stap long kalabus. Ating yu inap tingim olsem Pita em i pren bilong Bikpela Tisa, Jisas Krais. Sampela man i no amamas taim Pita i tokim ol olsem Jisas em i Pikinini Bilong God. Olsem na ol i putim Pita long kalabus. Ol soldia i was long Pita na bai em i no ken ranawe. Yu ting i gat man inap helpim em?—

Pita i slip namel long tupela gad, na ol i pasim sen long tupela han bilong em. Tasol Baibel i tok: ‘Wantu ensel bilong Bikpela i kamap, na lait i kamap insait long haus kalabus. Ensel i putim han long sait bilong Pita na i kirapim em, na tok, “Yu kirap kwik!” ’

Long dispela taim stret, ol sen long han bilong Pita i lus na pundaun! Na ensel i tokim em: ‘Putim klos bilong yu, pasim su, na bihainim mi.’ Ol gad i no inap pasim ol, long wanem, ensel i helpim Pita. Ol i kamap long wanpela ain geit, na narapela kain samting i kamap. Geit i op nating! Ensel i helpim Pita long lusim kalabus na bai em i ken wok yet long autim tok.—Aposel 12:​3-11.

Yu ting ol ensel bilong God inap helpim yumi tu?— Yes, ol inap. Yu ting dispela i makim olsem ol i no inap larim wanpela bagarap i painim yumi?— Nogat, ol ensel i no save mekim olsem sapos yumi mekim longlong pasin. Tasol maski yumi no mekim longlong pasin, bagarap inap painim yumi. Ol ensel i no bin kisim tok long banisim yumi na bai bagarap i no ken painim yumi, nogat. Tasol God i bin givim ol wanpela narakain gutpela wok bilong mekim.

Baibel i stori long wanpela ensel i tokim ol man long olgeta hap long lotuim God. (KTH 14:​6, 7) Olsem wanem ensel i tokim ol? Yu ting em i stap long heven na singaut na bai olgeta man i ken harim tok bilong em?— Nogat. Ol disaipel bilong Jisas long graun ol i tokim ol arapela long God, na ol ensel i stiaim ol long dispela wok. Ol ensel i stiaim gut wok na bai ol man i gat laik tru long kisim save long God, ol i gat rot bilong harim dispela tok. Yumi tu inap insait long dispela wok bilong autim tok, na ol ensel bai helpim yumi.

Tasol olsem wanem sapos ol man i no laikim God, ol i givim hevi long yumi? Olsem wanem sapos ol i putim yumi long kalabus? Yu ting ol ensel inap helpim yumi long lusim kalabus?— Ol inap mekim. Tasol dispela i no samting ol i save mekim long olgeta taim.

Wanpela disaipel bilong Jisas, em Pol, em i bin stap long kalabus. Em i raun long sip long taim bilong bikpela win na ren. Tasol ol ensel i no helpim em kwik long i go fri, long wanem, i gat ol arapela man i mas harim tok bilong God. Wanpela ensel i tok: “Pol, yu no ken pret. Yu mas i go sanap long pes bilong Sisar.” Yes, ol i mas bringim Pol i go long nambawan king bilong graun, em Sisar, na bai Pol inap autim tok long em. Oltaim ol ensel i save Pol i stap we, na ol i helpim em. Ol bai helpim yumi tu sapos yumi mekim tru wok bilong God.—Aposel 27:​23-25.

I gat narapela bikpela wok ol ensel bai mekim, na klostu nau bai ol i mekim dispela samting. Taim bilong God long bagarapim ol man nogut i klostu tru. Olgeta man husat i no lotuim trupela God, ol bai kisim bagarap. Ol man husat i tok ol i no bilip long ol ensel, long wanem, ol i no inap lukim ol, ol bai luksave olsem tingting bilong ol i kranki tru.—2 Tesalonaika 1:​6-8.

Dispela bai makim wanem samting long yumi?— Sapos yumi stap long sait bilong ol ensel bilong God, ol bai helpim yumi. Tasol olsem wanem? Yumi stap long sait bilong ol?— Yumi stap long sait bilong ol sapos yumi mekim wok bilong Jehova. Na sapos yumi mekim wok bilong Jehova, yumi bai tokim ol narapela tu long mekim wok bilong em.