Ol Ensel Inap Helpim Yu Olsem Wanem?

BAIBEL i tok i gat ol ensel i stap. Em i tok ol dispela spirit ol inap planti milion. Wokboi bilong God Jehova, em Daniel, em i driman na lukim ol samting long heven, na em i tok: “I gat planti tausen [ensel] i mekim wok bilong dispela [God], na planti milion [ensel] i sanap klostu long em.”​—⁠Daniel 7:​10.

Dispela tok bilong Daniel i helpim yumi long save olsem i gat planti ensel i stap, na ol dispela ensel i save mekim wok bilong God. Ol i wokboi bilong God. Tok bilong man bilong raitim Song i stret long dispela, olsem: “Yupela olgeta ensel bilong Bikpela, yupela i gat bikpela strong. Yupela i save bihainim tok bilong em, yupela i save putim yau gut long tok bilong en. Orait yupela i mas litimapim nem bilong Bikpela. Yupela ol wokman bilong Bikpela, yupela i stap long heven na i save bihainim laik bilong em, yupela litimapim nem bilong em.”​—⁠Song 103:​20, 21.

Na Baibel i helpim yumi long save olsem taim ol ensel i kisim laip, pastaim ol i no stap man long graun. Jehova i wokim ol ensel long heven paslain tru long taim em i wokim graun. Taim God i ‘wokim na strongim as bilong graun, ol ensel i amamas na singaut.’​—⁠Jop 38:​4-7.

Ol ensel i spirit​—⁠yumi ol man long graun i no inap lukim ol, na ol i gat bikpela strong, na ol i gat save. Long Baibel, ol i tanim tok Hibru mal·ʼakhʹ na tok Grik agʹge·los olsem “ensel.” Dispela tupela tok i stap olsem 400 taim long Baibel. Tupela tok i gat wankain insait, olsem “man bilong bringim tok.”

Ol i Bungim Ol Ensel

Tru tumas, ol ensel i save bringim tok i kam. Ating yu save long stori bilong Baibel long taim ensel Gebriel i kamap long Maria. Em i tokim Maria, maski em i nupela meri, em bai karim wanpela pikinini man na em i mas kolim nem bilong em Jisas. (Luk 1:​26-​33) Na tu, wanpela ensel i bin kamap long sampela wasman bilong sipsip i stap ausait long taun. Em i tok: “Long dispela de . . . wanpela meri i karim pikinini. Na dispela pikinini bai i kisim bek yupela olgeta. Em i Bikpela, na em i man God i makim bilong kisim bek ol manmeri bilong en.” (Luk 2:​8-​11) Wankain olsem dispela, ol ensel i bin bringim tok i kam long Hagar, Abraham, Lot, Jekop, Moses, Gideon, Jisas, na sampela moa em Baibel i stori long ol.​—⁠Stat 16:​7-​12; 18:​1-5, 10; 19:​1-3; 32:​24-​30; Kisim Bek 3:​1, 2; Hetman 6:​11-​22; Luk 22:​39-​43; Hibru 13:⁠2.

Tok ol ensel i bin givim long ol dispela manmeri em i stret wantaim ol samting God i laik mekim bilong kamapim laik bilong em​—⁠i no olsem dispela tok i helpim laik bilong man i bin kisim dispela tok. Ol ensel i stap olsem maus bilong God, na ol i bin kamap long man long pasin i stret wantaim laik bilong God na long taim God yet i bin makim. Ol man i no bin singaut long ol i kam, nogat.

I Stret Yumi Singaut Long Ol Ensel i Kam na Helpim Yumi?

Olsem wanem? Taim yumi gat hevi, i stret long yumi ken singaut long ol ensel? Sapos olsem, ating yumi laik save long nem bilong wanpela ensel em inap tru long helpim yumi. Olsem na sampela buk i gat lista bilong nem bilong planti ensel, wantaim namba na biknem na wok bilong ol. Wanpela buk i gat lista bilong ol “nambawan 10-pela ensel,” em ol “ensel ol man long hap bilong Wes i save gut long ol.” Dispela lista i gat wanpela toksave olsem: Yumi mas pasim ai, isi isi kolim nem bilong ensel planti taim, pulim win strong na mekim isi isi, na “redi bambai yumi inap toktok wantaim ol.”

Tasol Baibel i no kamapim nem bilong planti ensel; em i kamapim nem bilong tupela ensel tasol bilong ol gutpela ensel bilong God, em Maikel na Gebriel. (Daniel 12:1; Luk 1:​26) Ating Baibel i kamapim nem bilong tupela bilong makim olsem olgeta wan wan ensel ol i narapela narapela na ol i gat nem bilong ol yet; ol i no wanpela strong nating tasol.

Na tingim dispela samting: Sampela ensel i no laik kamapim nem bilong ol long ol man. Taim Jekop i askim wanpela ensel long tokim em long nem bilong em, em i no mekim. (Stat 32:29) Taim wanpela ensel i bungim Josua na Josua i askim em long tokim em long em i husat, em i tok tasol olsem em i “kepten bilong ami bilong Bikpela.” (Josua 5:​14) Taim papamama bilong Samson i tokim wanpela ensel long kolim nem bilong em, em i tok: “Bilong wanem yutupela i laik save long nem bilong mi? Nem bilong mi i gutpela moa na i narakain tru.” (Hetman 13:​17, 18) Baibel i no kamapim lista bilong nem bilong ol ensel, nogat; nogut yumi strong tumas long givim biknem long ol na yumi lotuim ol. Na tu, Baibel i no tokim yumi long singaut long ol ensel.

Singaut Long God

Baibel i tokim yumi long olgeta samting bilong ples bilong ol spirit em yumi mas save long en. Aposel Pol i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru . . . Dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.” (2 Timoti 3:​16, 17) Sapos God i gat laik long yumi mas save long nem bilong planti ensel, orait em bai kamapim nem bilong ol long Baibel, a? Na sapos God i laik skulim yumi long pasin bilong toktok wantaim ol ensel long rot bilong beten, em bai kamapim dispela samting tu long Baibel, a?

Tasol Krais Jisas i no skulim yumi olsem. Em i tok: “Taim yu laik mekim prea, yu mas i go insait long rum bilong yu na pasim dua na beten long Papa bilong yu i stap long ples hait. . . . Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi.’ ” (Matyu 6:⁠6, 9) Tok bilong Baibel long dispela samting i olsem: Yumi no ken singaut long ol ensel o beten long ol; yumi mas beten long Man bilong wokim ol ensel, em God yet. Nem bilong em i no stap hait, na i no gat wok long wanpela man bilong lukim piksa samting, olsem driman, long kamapim dispela nem. Maski planti man i bin mekim wok bilong haitim nem bilong God, dispela nem i stap long Baibel, winim 7,000 taim. Olsem: Man bilong raitim Song i tok long Papa long heven olsem: “Yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.”​—⁠Song 83:​18, NW.

Tru, Jehova i gat planti wok, tasol em i save putim yau taim yumi beten long em long pasin i stret. Baibel i tok: “Oltaim Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.”​—⁠2 Stori 16:⁠9.

Ol Ensel na Ol Stretpela Pasin

Tru, planti taim ol buk na televisen samting i stori long ol ensel i mekim wok bilong skelim ol man. Tasol ol ensel i no save mekim kain wok olsem. Ol i no bin kisim wok bilong skelim ol man. Jehova em i ‘Jas bilong olgeta manmeri,’ na “olgeta wok bilong harim kot, em i givim pinis long Pikinini,” Krais Jisas. (Hibru 12:23; Jon 5:​22) Tasol yumi no ken ting ol pasin yumi bihainim i no bikpela samting long ol ensel, nogat. Jisas i tok: “Amamas i save kamap namel long ol ensel bilong God taim wanpela man bilong mekim sin em i tanim bel.”​—⁠Luk 15:⁠10.

Tasol ol ensel i no save stap nating. Long bipo, ol i mekim wok bilong givim strafe long ol lain olsem kot bilong God i bin makim. Olsem: God i bin mekim wok long ol ensel bilong givim strafe long ol Isip bilong bipo. Song 78:49 i tok, “em i kros moa moa yet long ol na i mekim save tru long ol. Na em i salim ol ensel i go bagarapim ol na ol i gat bikpela hevi.” Na Baibel i tok, long wanpela nait tasol, wanpela ensel i kilim i dai 185,000 soldia bilong Asiria.​—⁠2 King 19:⁠35.

Bihain, ol ensel bai bagarapim ol man em pasin bilong ol long sakim ol stretpela lo bilong God em inap bagarapim i stap bilong ol narapela man. Jisas bai kam “wantaim olgeta strongpela ensel bilong en . . . long bikpela paia tru na em bai i mekim save long ol man i no laik save long God na i no bihainim gutnius bilong Jisas.”​—⁠2 Tesalonaika 1:​7, 8.

Olsem na Baibel i kamapim klia olsem ol ensel bilong God ol i stap gut long em, oltaim ol i save bihainim laik bilong em​—⁠ol i mekim ol samting em i tokim ol long mekim, na ol i stap gut long ol stretpela lo bilong em. Tru tumas, sapos yumi laik bai ol ensel i ken helpim yumi, yumi mas kisim save long laik bilong God na wok strong long bihainim.

Ol Wasangelo

Olsem wanem? Ol ensel i save tingim ol man na lukautim ol? Aposel Pol i tok: “Ol ensel ol i spirit, na ol i save mekim wok bilong God. God i save salim ol i go bilong helpim ol man em i laik kisim bek ol.” (Hibru 1:⁠14) Tru tumas, ol i helpim ol man.

Tripela Hibru, em Satrak, Mesak, na Abetnego, ol i no laik brukim skru long wanpela piksa gol, em Nebukatnesar, king bilong Babilon i bin sanapim, olsem na ol man i tromoi ol i go long wanpela bikpela paia. Tasol dispela paia i no kukim ol dispela gutpela wokboi bilong God. Taim king i lukluk i go long paia, em i lukim “4-pela man,” na em i tok “namba 4 man i luk olsem wanpela god.” (Daniel 3:​25) Sampela yia bihain long dispela, ol i tromoi Daniel i go daun long hul bilong ol laion, long wanem, em i save stap gut long God. Em tu i no kisim bagarap, na em i tok: “God i bin salim ensel bilong en i kam na i pasim maus bilong ol laion na ol i no bagarapim mi.”​​—⁠Daniel 6:⁠22.

Bihain long yia 33 C.E., taim kongrigesen Kristen i kamap pinis, ol ensel i kamap gen long ol man na ol i helpim ol aposel long lusim kalabus. (Aposel 5:​17-​24; 12:​6-​12) Na taim bikpela si i laik bagarapim Pol, wanpela ensel i kam tokim em, em bai kamap gut long Rom.​—⁠Aposel 27:​13-​24.

Ol wokboi bilong God Jehova long nau ol i bilip strong olsem, ol lain ensel bilong God ol i stap tru na ol inap lukautim ol, wankain olsem ol i bin lukautim Elisa na wokboi bilong em. (2 King 6:​15-​17) Tru tumas, “ensel bilong Bikpela i save stap klostu long ol manmeri i aninit long Bikpela, na em i save helpim ol bai ol i no kisim bagarap.”​​—⁠Song 34:7; 91:⁠11.

Ol Tok Ol Ensel i Bringim i Kam

Ol ensel i save tingim ol man i mekim wok bilong God Jehova, na tu, ol i mekim wok na bai ol man i gat rot long kisim save long God na long ol samting em i laik mekim. Aposel Jon i tok: “Mi lukim narapela ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun. Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin. Em i singaut strong olsem, ‘. . . Yupela i mas lotu long God.’ ”​—⁠KTH 14:​6, 7.

Olsem wanem? Yu laik save long dispela “gutnius bilong i stap oltaim oltaim”? Sapos olsem, orait askim ol Witnes Bilong Jehova. Ol bai amamas long helpim yu.

[Ol Piksa long pes 7]

Wanpela ensel i flai i go namel long skai em i wok long autim gutnius bilong i stap oltaim oltaim. Olsem wanem? Yu laik kisim save long dispela gutnius?