Ol Ensel—Ol i Save Mekim Wanem Long Yumi?

PROFET Daniel i stori long samting olsem driman we em i bin lukim lain ensel bilong God, na em i tok: “I gat planti tausen manmeri [ol ensel] i mekim wok bilong dispela Man, na planti milion manmeri [ol ensel] i sanap klostu long em.” (Daniel 7:10) Dispela ves i helpim yumi long save long as na God i wokim ol ensel. Ol i mas mekim wok bilong em na ol i mas sanap redi long bihainim ol tok em i givim long ol.

Sampela taim God i save givim wok long ol ensel bilong mekim sampela samting long ol man. Bai yumi stori long olsem wanem God i save mekim wok long ol ensel bilong strongim na lukautim lain bilong em, na bilong bringim tok i go long ol man, na bilong givim strafe long ol man nogut.

Ol Ensel i Strongim na Lukautim Ol Man

Kirap long taim ol ensel i bin lukim God i wokim graun na namba wan man na meri, ol i gat bikpela tingting long ol man bilong graun. Taim Jisas Krais i no kam daun yet long graun, em i mekim olsem em yet i olsem gutpela tingting na save, na em i tok: “Mi bin amamas long lukim dispela graun na ol manmeri i stap long en.” (Sindaun 8:31) Na Baibel i tok “ol ensel tu i laikim tumas long kisim save” long ol samting bilong Krais na ol samting bai kamap bihain olsem God i bin kamapim long ol profet bilong em.​—1 Pita 1:​11, 12.

Bihain ol ensel i lukim olsem planti manmeri bilong graun i no mekim wok bilong gutpela Man Bilong Wokim ol. Ating ol gutpela ensel ol i bel hevi stret long dispela samting! Tasol sapos wanpela sinman i tanim bel na i kam bek long Jehova, “amamas i save kamap namel long ol ensel.” (Luk 15:10) Ol ensel i save tingim tru ol man i mekim wok bilong God, na planti taim Jehova i givim wok long ol ensel long strongim na lukautim ol gutpela wokman bilong em long graun. (Hibru 1:14) Yumi ken stori long sampela samting ol ensel i bin mekim.

Tupela ensel i bin kisim stretpela man Lot wantaim ol pikinini meri bilong em i go lusim dispela tupela taun nogut, Sodom na Gomora, na ol i abrusim bagarap.a (Stat 19:​1, 15-26) Sampela handet yia bihain ol man i tromoi profet Daniel i go daun long hul bilong ol laion, tasol em i no kisim bagarap. Olsem wanem na em i no bagarap? Em i tokaut olsem: “God i bin salim ensel bilong en i kam na i pasim maus bilong ol laion na ol i no bagarapim mi.” (Daniel 6:22) Taim Jisas i kirap mekim wok bilong em long autim tok, ol ensel i helpim em. (Mak 1:13) Na klostu long taim Jisas i dai, wanpela ensel i kamap long em na “i strongim em.” (Luk 22:43) Yumi ken ting dispela helpim Jisas i bin kisim long ensel i bin mekim gut tru bel bilong em long dispela taim nogut i bin painim em! Na taim aposel Pita i kalabus, wanpela ensel i kam na helpim em long lusim kalabus.​—Aposel 12:​6-11.

Orait yumi laik save, ol ensel i save lukautim yumi long nau? Sapos yumi lotuim Jehova long pasin olsem Baibel i makim, yumi ken bilip olsem ol strongpela ensel bilong em bai lukautim yumi. Baibel i tok promis olsem: “Ensel bilong Bikpela i save stap klostu long ol manmeri i aninit long Bikpela, na em i save helpim ol bai ol i no kisim bagarap.”​—Song 34:7.

Tasol yumi mas save, nambawan bikpela wok bilong ol ensel, em bilong mekim wok bilong God, na i no bilong ol man. (Song 103:​20, 21) Ol i save bihainim tok bilong God, ol i no bihainim tok o singaut bilong ol man. Olsem na taim yumi laik kisim sampela helpim, yumi mas singaut long God Jehova​—i no ol ensel. (Matyu 26:53) Tru, yumi no save lukim ol ensel, olsem na yumi no inap save wanem taim God i save mekim wok long ol bilong helpim ol man. Tasol yumi save tru olsem God Jehova i save ‘helpim na strongim ol manmeri i save aninit long em wanpela tasol.’ (2 Stori 16:9; Song 91:11) Na Baibel i tok: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi.”​—1 Jon 5:14.

Na Baibel i tok tu olsem yumi mas beten na lotu long God wanpela tasol. (Kisim Bek 20:​3-5; Song 5:​1, 2; Matyu 6:9) Ol ensel i stap gut long God ol i laik kirapim yumi long mekim olsem. Taim aposel Jon i laik lotuim wanpela ensel, dispela ensel i krosim em na i tok: “Yu no ken mekim olsem! . . . Yu mas lotu long God wanpela tasol.”​—KTH 19:10.

Ol Ensel i Save Bringim Tok Bilong God

Tok Hibru na tok Grik em Baibel i tanim olsem “ensel” i makim “man bilong bringim tok,” na dispela em i narapela rot bilong ol ensel long mekim wok bilong God​—ol i gat wok long bringim tok i go long ol man. Olsem: “God i salim ensel Gebriel i go long wanpela taun bilong Galili, nem bilong en Nasaret.” Bilong wanem God i salim em i go? Bilong toksave long wanpela yangpela meri, nem bilong em Maria, olsem maski em i no bin slip wantaim man, em bai i gat bel na karim pikinini man, na em i mas kolim nem bilong en Jisas. (Luk 1:​26-31) Na God i salim wanpela ensel i go long ol wasman bilong sipsip i stap ausait long taun bilong toksave long ol olsem wanpela meri i karim pikinini, “em i man God i makim bilong kisim bek ol manmeri bilong en.” (Luk 2:​8-11) Na tu, ol ensel i bin bringim tok bilong God i go long Abraham, Moses, Jisas, na sampela man moa em Baibel i stori long ol.​—Stat 18:​1-5, 10; Kisim Bek 3:​1, 2; Luk 22:​39-43.

Olsem wanem ol ensel i save mekim wok bilong bringim tok bilong God long ol man long nau? Orait tingim wanpela wok Jisas i tok profet long lain bilong em bai mekim long taim bilong las de. Em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:​3, 14) Long olgeta yia, ol Witnes Bilong Jehova i save lusim wan bilion aua samting long autim gutnius bilong Kingdom Bilong God long ol man. Tasol ol ensel tu i insait long dispela wok. Yu save long dispela? Aposel Jon i stori long samting olsem driman em i bin kisim, em i tok: “Mi lukim narapela ensel . . . Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun. Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin.” (KTH 14:​6, 7) Dispela skripsa bilong Baibel i kamapim klia nambawan bikpela wok ol ensel i save mekim bilong helpim ol man long nau.

Ol Witnes Bilong Jehova i save lukim ol samting i kamapim klia ol ensel i save stiaim ol taim ol i go long ol haus na autim tok. Planti taim ol i save bungim ol man o meri em nau tasol ol i bin beten long wanpela man i ken helpim ol long kliagut long ol samting God i tingting pinis long mekim. Olsem na wok bilong ol ensel long stiaim ol Witnes, na wok bilong ol Witnes yet long autim tok, dispela i mekim na long olgeta yia planti handet tausen manmeri ol i kisim save long Jehova. Mipela i laik bai dispela wok bilong helpim ol man long abrusim bagarap em ol ensel i stiaim i ken helpim yu tu.

Ol Ensel i Givim Strafe Bilong God Long Ol Man Nogut

Tru, God i no bin givim wok long ol ensel long skelim ol man long kot, tasol ol i no save sanap nating na lukluk tasol, nogat. (Jon 5:22; Hibru 12:​22, 23) Long bipo ol i bin mekim wok bilong givim strafe bilong God long ol man. Olsem: Taim ol Isip bilong bipo i kalabusim ol Israel, God i bin mekim pait long ol long rot bilong ol ensel. (Song 78:49) Na long wanpela nait tasol, “ensel bilong Bikpela” i kilim i dai 185,000 soldia i stap long kem bilong ol birua bilong lain bilong God.​—2 King 19:35.

Long bihain tu, ol ensel bai givim strafe bilong God long ol man nogut. Jisas bai kam “wantaim olgeta strongpela ensel bilong en . . . na em bai i mekim save long ol man i no laik save long God na i no bihainim gutnius.” (2 Tesalonaika 1:​7, 8) Tasol dispela bagarap i no ken painim olgeta man​—em bai painim ol man i no laik harim gutnius, em gutnius ol man i autim long olgeta hap bilong graun na ol ensel i stiaim dispela wok. Ol man i wok long painim God na ol i bihainim ol tok bilong Baibel, ol i no ken kisim bagarap.​—Sefanaia 2:3.

Yumi ken tenkyu tru long ol gutpela ensel, oltaim ol i save mekim ol wok God i tokim ol long mekim! Jehova i save givim wok long ol long helpim na lukautim ol gutpela wokman bilong em long graun. Dispela i mekim gut bel bilong yumi, long wanem, i gat ol spirit nogut i stap na ol i laik bagarapim yumi.

Ol Spirit Nogut​​—Ol i Husat?

Inap 15 handet yia bihain long taim Satan i bin giamanim Iv long Iden, ol ensel bilong God long heven i lukim olsem Satan i pulim pinis olgeta manmeri long graun na ol i lusim God​—wan wan tasol ol i stap gut long God, olsem Abel, Enok, na Noa. (Stat 3:​1-7; Hibru 11:​4, 5, 7) Sampela ensel tu ol i kirap bihainim Satan. Baibel i kolim ol olsem ol spirit i bin sakim tok bilong God “long taim bilong Noa.” (1 Pita 3:​19, 20) Pasin bikhet bilong ol i kamap ples klia olsem wanem?

Long taim bilong Noa sampela ensel, em yumi no save ol i hamas, ol i bikhet na lusim ples bilong ol insait long famili bilong God long heven na ol i kam daun long graun na kisim skin bilong man. Bilong wanem ol i mekim olsem? Ol i kisim laik bilong mekim maritpasin wantaim ol meri. Dispela i mekim na ol i kamapim ol pikinini em ol i kamap traipela man bilong pait na bagarapim man, ol i kolim Nefilim. Na tu, “pasin bilong ol manmeri long olgeta hap i nogut tru. Ol manmeri i tingting tasol long ol samting nogut.” Tasol God Jehova i no larim dispela pasin nogut bilong ol man i stap olsem, nogat. Em i salim Bikpela Tait i kam na i pinisim olgeta man nogut wantaim ol dispela traipela man ol i kolim Nefilim. Ol manmeri i stap gut long God olsem wokman bilong em, ol tasol i abrusim bagarap.​—Stat 6:​1-7, 17; 7:23.

Ol dispela ensel i bikhet, ol i abrusim bagarap long taim bilong Bikpela Tait. Ol i lusim skin bilong man na ol i kamap spirit gen na i go bek long heven. Kirap long dispela taim Baibel i kolim ol olsem ol spirit nogut. Ol i kamap lain bilong Satan, em Baibel i kolim em olsem “hetman bilong ol spirit nogut.” (Matyu 12:​24-27) Wankain olsem hetman bilong ol, ol spirit nogut i gat bikpela laik tru long ol man bilong graun i mas lotuim ol.

Ol spirit nogut ol inap mekim nogut long ol man, tasol i no olsem yumi mas pret long ol, nogat. Ol i gat hap strong tasol. Taim ol bikhetlain ensel i go bek long heven, God i no larim ol i go insait gen long lain ensel i stap gut long em. Em i pasim ol i stap na ol i no inap kisim sampela save o tingting i kam long God​—ol inap tingting tasol long samting nogut bai painim ol long bihain. Ol i stap olsem kalabus long tudak. (2 Pita 2:4) Jehova i pasim ol long “ol sen i save stap oltaim oltaim,” na ol i no inap kisim gutpela tok bilong em. Na ol i no inap moa long kisim skin bilong man.​—Jut 6.

Yu Mas Mekim Wanem?

Yu ting ol spirit nogut inap stiaim yet ol man bilong graun? Ol inap. Ol i save mekim long rot bilong ol kain kain “trik na giaman,” olsem hetman bilong ol, Satan, i save mekim. (Efesus 6:​11, 12) Tasol sapos yumi bihainim ol tok bilong God long Baibel, yumi inap sanap strong na sakim ol spirit nogut. Na tu, ol man i laikim tru God, ol strongpela ensel i save lukautim ol.

Em i bikpela samting tru long yu mas kisim save long ol samting God i laik bai yu mekim, olsem i stap long Baibel, na yu kirap bihainim ol tok yu lainim! Yu inap kisim sampela save moa long ol tok bilong Baibel sapos yu painim ol Witnes Bilong Jehova i stap long hap bilong yu o yu raitim pas i go long ol lain i wokim dispela nius. Ol Witnes Bilong Jehova bai amamas long stadi wantaim yu long Baibel, no gat pe, na ol bai mekim long taim i stret long yu.

[Futnot]

[Blok long pes 6]

OL ENSEL​—GOD I STRETIM WOK BILONG OL OLSEM WANEM?

Jehova i stretim wok bilong ol traipela lain ensel bilong em olsem:

Ensel i gat bikpela strong na namba i winim ol arapela ensel, em nambawan ensel, Maikel, olsem Jisas Krais. (1 Tesalonaika 4:​16, NW; Jut 9) Ol ensel ol i kolim serafim, na serap, na ol narapela ensel, ol i save stap aninit long em.

Ol serafim i gat bikpela namba tru insait long lain ensel bilong God. Ol i save mekim wok klostu long sia king bilong God. Sampela wok bilong ol, em ol i save tokaut long pasin holi bilong God na helpim ol manmeri bilong em i stap klin long lotu.​—Aisaia 6:​1-3, 6, 7.

Ol serap i stap klostu long sia king bilong God na ol i save litimapim biknem bilong Jehova.​—Song 80:1; 99:1; Esekiel 10:​1, 2.

Sampela ensel ol i stap olsem mausman bilong Jehova, na ol i mekim laik bilong em.

[Piksa long pes 4]

Tupela ensel i bringim Lot wantaim tupela pikinini meri bilong em i go long ples bilong abrusim bagarap

[Piksa long pes 5]

Taim aposel Jon i laik lotuim wanpela ensel, ensel i tokim em: “Yu no ken mekim olsem!”

[Piksa long pes 6]

Ol ensel i save givim strafe bilong God long ol man nogut

[Piksa long pes 7]

Yu kisim gutpela helpim long rot bilong wok bilong autim gutnius em ol ensel i bosim?