Ol Ensel​—Ol Samting Ol i Mekim Long Yumi Man

“Bihain long dispela, mi lukim narapela ensel i lusim heven na i kam daun. Em i gat bikpela strong tru . . . Em i singaut strong tru olsem, ‘Bikpela taun Babilon em i bagarap pinis! Em i bagarap pinis!’ ”​—KTH 18:​1, 2.

1, 2. Wanem samting i soim olsem Jehova i save yusim ol ensel bilong mekim ol bikpela wok bilong kamapim laik bilong em?

TAIM lapun aposel Jon i kalabus long ailan Patmos, em i bin lukim ol tok profet i olsem driman. Long rot bilong “Holi Spirit” em i stap long “de bilong Bikpela” na em i lukim sampela bikpela samting i kamap. Dispela de i kirap taim Jisas Krais i kamap king long 1914 na i go inap long Taim Bilong Wan Tausen Yia Bilong Krais i Stap King i pinis.​—KTH 1:10.

² God Jehova i no bin givim dispela tok stret long Jon, nogat. Em i gat wanpela rot em i bihainim. Kamapim Tok Hait 1:1 i tok: “Bipo dispela tok em i stap hait, na Jisas Krais i bin kamapim ples klia. God i soim dispela tok long Jisas, bilong em i ken soim ol wokman bilong en long ol samting i mas kamap kwiktaim. Na Jisas i salim ensel bilong en i kam givim dispela tok long mi Jon, wokman bilong en, bai mi ken tokim ol arapela wokman bilong Jisas.” Jehova i bin yusim wanpela ensel long rot bilong Jisas, bilong autim tok long Jon long ol gutpela samting bai kamap long “de bilong Bikpela.” Na tu, Jon i “lukim narapela ensel i lusim heven na i kam daun. Em i gat bikpela strong tru.” Wanem wok bilong dispela ensel? “Em i singaut strong tru olsem, ‘Bikpela taun Babilon em i bagarap pinis! Em i bagarap pinis!’ ” (KTH 18:​1, 2) Dispela strongpela ensel i kisim gutpela wok long tokaut olsem Bikpela taun Babilon, em olgeta lotu giaman, i bagarap pinis. Olsem na yumi no gat tupela tingting, Jehova i save yusim ol ensel long mekim ol bikpela wok bilong kamapim laik bilong em. Paslain long yumi stori long wok ol ensel i save mekim bilong kamapim laik bilong God na ol samting ol i mekim long yumi, yumi laik save long olsem wanem ol ensel i bin kamap.

Ol Ensel i Kamap Olsem Wanem?

3. Planti manmeri i gat wanem tingting kranki long ol ensel?

³ Planti milion manmeri i bilip tru olsem ol ensel i stap. Tasol planti man i gat tingting kranki long ol na long olsem wanem ol i bin kamap. Olsem: Sampela manmeri bilong lotu i ting taim wanpela wanblut i dai, God i singautim em i go long heven na em i kamap wanpela ensel. Yu ting dispela i stret wantaim tok Baibel i mekim long olsem wanem ol ensel i bin kamap, na i stap bilong ol, na long as na God i wokim ol?

4. Baibel i tok ol ensel i bin kamap olsem wanem?

⁴ Ensel i gat bikpela pawa na namba winim ol arapela ensel, em nambawan ensel Maikel. (Jut 9) Dispela ensel em Jisas Krais tasol. (1 Tesalonaika 4:16) Long bipo bipo yet, taim Jehova i tingting pinis long kirap wokim ol samting, namba wan samting em i wokim em dispela ensel. (KTH 3:14) Bihain, long rot bilong dispela fesbon Pikinini, Jehova i wokim olgeta arapela ensel. (Kolosi 1:​15-​17) Taim Jehova i givim askim long Jop, em i kolim ol dispela ensel olsem ol pikinini man bilong em, em i tok: “Taim mi wokim na strongim as bilong dispela graun, yu stap we? Sapos yu save gut long ol dispela samting, yu mas tokim mi. . . . Na husat i bin putim bikpela ston bilong wokim graun antap long en? Long taim dispela wok i kirap, ol sta i bin lukim na ol i amamas na singim song, na ol ensel [“pikinini man bilong God,” NW] i amamas na singaut.” (Jop 38:​4, 6, 7) Em i klia tru olsem God i bin wokim ol ensel na em i wokim ol paslain tru long ol manmeri bilong graun.

5. Jehova i save bungim ol ensel olsem wanem?

⁵ Namba Wan Korin 14:33 i tok: “God i save mekim stret olgeta wok bilong en. Em i no save mekim ol samting i paul nabaut.” Olsem na Jehova i bungim ol pikinini spirit bilong em long 3-pela lain, olsem: (1) ol serafim, em ol i mekim wok klostu long sia king bilong God, tokaut long pasin holi bilong em, na helpim ol manmeri bilong God long i stap klin long lotu; (2) ol serap, em ol i save litimapim biknem bilong Jehova; na (3) ol arapela ensel em ol i save mekim laik bilong em. (Song 103:20; Aisaia 6:​1-3, NW; Esekiel 10:​3-5, NW) Dispela bikpela lain ensel i save mekim wanem long ol manmeri bilong graun?​—KTH 5:11.

Ol Ensel i Mekim Wanem Wok?

6. Jehova i givim wanem wok long ol serap long gaden Iden?

⁶ Namba wan taim Baibel i stori long ol ensel em long Stat 3:​24, em i tok: “God i rausim pinis man na meri, na em i makim ol strongpela ensel [serap] bilong sanap na was i stap long hap sankamap bilong gaden Iden. Na tu em i putim wanpela bainat i gat paia i lait long en na i save tanim tanim long olgeta hap. Oltaim ol dispela ensel wantaim dispela bainat i save was i stap, nogut wanpela man i go klostu long dispela diwai bilong givim laip.” Ol serap i stap na Adam na Iv i no gat rot long go insait gen long gaden Iden. Dispela samting i kamap bihain liklik long taim God i wokim man. Bihain long dispela ol ensel i bin mekim wanem?

7. Mining bilong tok “ensel” long tok Hibru na tok Grik i helpim yumi long save long wanem wanpela wok ol ensel i save mekim?

⁷ Baibel i stori long ol ensel inap olsem 400 taim samting. Tok Hibru na tok Grik ol i tanim olsem “ensel,” insait bilong en i olsem “man bilong bringim tok.” Olsem na God i bin yusim ol ensel bilong givim tok long ol man. Olsem yumi stori pinis long paragraf 1 na 2, Jehova i bin yusim wanpela ensel bilong givim tok long aposel Jon.

8, 9. (a) Wanpela ensel i bin kamap long Manoa na meri bilong em, na dispela i bin mekim wanem long ol? (b) Ol papamama inap kisim wanem skul long stori bilong Manoa i bungim ensel bilong God?

⁸ Narapela wok bilong ol ensel em bilong helpim na strongim ol wokboi bilong God hia long graun. Olsem: Taim ol Hetman i bosim Israel, Manoa na meri bilong em i gat laik tru long kamapim pikinini. Jehova i salim ensel i go tokim meri bilong Manoa olsem em bai karim wanpela pikinini man. Baibel i tok: “Bai yu gat bel na bai yu karim wanpela pikinini man. Na yu no ken katim gras bilong en. Taim em i stap yet long bel bilong yu, God bai i makim em olsem wokman bilong em yet. Na taim yu karim em pinis, em i no ken dring wain na ol bia na em i no ken kaikai samting God i tambuim ol man long kaikai. Na bai em i stat long kisim bek ol Israel long han bilong ol Filistia.”​—Hetman 13:​1-5.

⁹ Bihain meri bilong Manoa i karim wanpela pikinini man, nem bilong em Samson, na bihain Samson i kisim biknem long ol samting em i mekim. (Hetman 13:24) Paslain long mama i karim Samson, Manoa i askim God long salim dispela ensel i kam gen long ol bilong skulim ol long ol samting ol i mas mekim long dispela pikinini. Manoa i kamapim askim olsem: “Bai dispela pikinini i mekim wanem kain pasin na bai em i bihainim wanem ol lo?” Ensel bilong Jehova i kolim gen ol tok em i bin givim pastaim long meri bilong Manoa. (Hetman 13:​6-​14) Yumi ken bilip olsem dispela i bin strongim tru bel bilong Manoa! Ol ensel i no save kamap long ol man long nau olsem ol i bin mekim long bipo, tasol ol papamama inap bihainim pasin bilong Manoa na wok long kisim tingting bilong Jehova long pasin bilong skulim ol pikinini.​—Efesus 6:4.

10, 11. (a) Ami bilong Siria i bin mekim wanem long Elisa na wokman bilong em? (b) Taim yumi skelim ol dispela samting i bin kamap, olsem wanem dispela inap helpim yumi?

¹⁰ Long taim bilong Elisa, bikpela samting tru i kamap bilong soim olsem ol ensel i stap bilong helpim ol man. Elisa i stap long Dotan, wanpela taun bilong Israel. Wanpela de long moning tru, wokman bilong Elisa i lukluk i go ausait, na em i lukim ol hos na karis bilong pait i raunim taun. King bilong Siria i bin salim wanpela strongpela ami bilong kisim Elisa. Yu ting wokman bilong Elisa i mekim wanem? Em i pret nogut tru na em i singaut: “Bikman, ol Siria i banisim yumi pinis. Nau bai yumi mekim wanem?” Long tingting bilong em ol bai kisim bagarap. Tasol Elisa i tokim em: “Maski pret. I tru ol i gat planti soldia, tasol yumi gat bikpela lain moa bilong helpim yumi.” Wanem mining bilong tok Elisa i mekim?​—2 King 6:​11-​16.

¹¹ Elisa i save olsem bikpela lain ensel i stap bilong helpim em. Tasol wokman bilong em i no lukim wanpela samting. Olsem na “Elisa i beten olsem, ‘Bikpela, yu ken opim ai bilong dispela man bai em i ken lukim dispela lain mi tok long en.’ Orait na Bikpela i opim ai bilong dispela wokman na wokman i lukim ol hos na karis i inapim dispela maunten Elisa i stap long en. Ol dispela hos na karis i wankain olsem paia stret.” (2 King 6:17) Nau wokman inap lukim bikpela lain ensel. Sapos yumi gat gutpela save long ol samting bilong spirit, yumi tu inap luksave long ol ensel, em ol i stap aninit long Jehova na Krais, na ol i helpim na lukautim ol manmeri bilong Jehova.

Helpim Ol Ensel i Givim Long Taim Bilong Krais

12. Maria i kisim wanem helpim long rot bilong ensel Gebriel?

¹² Tingim helpim em Maria, wanpela meri Juda husat i no bin slip wantaim man, i bin kisim taim em i harim dispela tok: “Yu bai kisim bel na karim wanpela pikinini man. Na yu mas kolim nem bilong en Jisas.” God i bin salim ensel Gebriel long givim dispela tok long Maria, na paslain liklik em i tokim Maria: “Maria, yu no ken pret. God em i belgut tru long yu.” (Luk 1:​26, 27, 30, 31) Yumi save dispela tok olsem God i belgut tru long em i bin strongim em tru!

13. Olsem wanem ol ensel i bin helpim Jisas?

¹³ Narapela taim ol ensel i bin helpim wanpela man em long taim Jisas i sakim pinis 3-pela traim bilong Satan long ples i no gat man. Baibel i tok taim ol traim i pinis, “Satan i lusim em. Na ol ensel i kam na i helpim Jisas.” (Matyu 4:​1-​11) Kain samting olsem i bin kamap long nait paslain long Jisas i dai. Jisas i pilim bel hevi stret, na em i brukim skru na mekim prea olsem: “ ‘Papa, sapos yu laik, yu ken rausim dispela kap long mi. Tasol yu no ken bihainim laik bilong mi. Nogat. Yu mas bihainim laik bilong yu tasol.’ Na wanpela ensel bilong heven i kam long em na i strongim em.” (Luk 22:​42, 43) Tasol olsem wanem ol ensel i save helpim yumi long nau?

Helpim Ol Ensel i Givim Long Nau

14. Ol Witnes Bilong Jehova i bin karim wanem ol hevi long taim bilong yumi? Wanem samting i bin kamap long dispela?

¹⁴ Taim yumi tingim wok bilong ol Witnes Bilong Jehova long autim tok long nau, yumi inap luksave olsem ol ensel i helpim dispela wok, a? Olsem: Ol manmeri bilong Jehova i bin sanap strong na winim ol hevi gavman Natsi i putim long ol long Jemani na long Westen Yurop paslain long Wol Woa 2 na long taim bilong woa (1939-​45). Ol gavman Fasis em lotu Katolik i bosim, i stap long Itali, Spen, na Potugal, na ol Witnes i mas karim hevi longpela taim moa long ol dispela kantri. Na inap planti yia gavman bilong Soviet Yunion na ol kantri em i bosim, ol i bin mekim nogut long ol Witnes. Long sampela kantri bilong Afrika tu ol Witnes i bin sanap strong na karim hevi taim ol man i mekim nogut long ol.a Long nau long kantri Jojia, ol man i bin mekim nogut tru long ol wokboi bilong Jehova. Satan i bin mekim olgeta samting em inap long mekim bilong pasim wok bilong ol Witnes Bilong Jehova. Tasol olsem wanpela lain, ol i winim ol dispela hevi na ol i kamap bikpela moa. Wanpela as bilong dispela em ol ensel i bin lukautim ol.​—Song 34:7; Daniel 3:28; 6:22.

15, 16. Ol Witnes Bilong Jehova i kisim wanem helpim long ol ensel long wok autim tok bilong ol long olgeta hap?

¹⁵ Ol Witnes Bilong Jehova i pilim tru wok bilong ol long autim gutnius bilong Kingdom Bilong God long olgeta hap na kamapim ol disaipel long rot bilong skulim ol man i gat laik long tok i tru bilong Baibel. (Matyu 28:​19, 20) Tasol ol i save ol i no inap mekim dispela wok sapos ol i no kisim helpim long ol ensel. Olsem na tok i stap long Kamapim Tok Hait 14:​6, 7 i save strongim ol. Skripsa i tok: “Mi [aposel Jon] lukim narapela ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun. Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin. Em i singaut strong olsem, ‘Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em. Yupela i mas lotu long God, em i bin wokim heven na graun na solwara na olgeta hul wara.’ ”

¹⁶ Dispela tok i kamapim klia olsem ol ensel i save helpim na stiaim dispela bikpela wok bilong ol Witnes Bilong Jehova long autim tok long olgeta hap. Jehova i wok long yusim ol ensel bilong stiaim ol manmeri i gat gutpela bel i kam long ol Witnes bilong em. Na tu, ol ensel i bin stiaim ol Witnes i go long ol man i laikim tok i tru. Dispela i helpim yumi long save long as na planti taim wanpela Witnes Bilong Jehova i save bungim wanpela man long taim stret hevi i painim em na em i mas kisim sampela gutpela tok bilong Baibel bilong helpim em. Dispela samting i save kamap planti taim tru na yumi no ken ting em i kamap nating.

Bikpela Wok Ol Bai Mekim Klostu Nau

17. Wanem samting i painim ami bilong Asiria taim wanpela ensel tasol i pait long ol?

¹⁷ Ol ensel i save bringim tok i kam na ol i save strongim tru ol manmeri i lotuim Jehova, na ol i gat narapela wok tu. Long bipo, ol i bin givim strafe bilong God long sampela man. Olsem: Long 732 B.C.E., wanpela bikpela lain soldia bilong Asiria i laik bagarapim Jerusalem. Jehova i mekim wanem? Em i tok: “Mi bai mekim olsem [olsem lukautim Jerusalem], long wanem, mi tingim biknem bilong mi na tok promis bipo mi bin mekim long wokman bilong mi, Devit.” Baibel i stori long samting i bin kamap, em i tok: “Orait long dispela nait yet, wanpela ensel bilong Bikpela i go long kem bilong ol Asiria na i kilim i dai 185,000 soldia. Na long moningtaim tru Senakerip i kirap na i lukim bodi bilong ol dispela lain soldia.” (2 King 19:​34, 35) Ol ami bilong ol man i samting nating taim yumi skelim wantaim strong bilong wanpela ensel tasol!

18, 19. Klostu nau ol ensel bai mekim wanem bikpela wok, na dispela bai mekim wanem long ol manmeri?

¹⁸ I no longtaim na God bai mekim wok long ol ensel bilong bagarapim ol man nogut. Klostu nau, Jisas “wantaim olgeta strongpela ensel bilong en i lusim heven na i kamap ples klia. Em bai i kam long bikpela paia tru.” Wok bilong ol em bilong “mekim save long ol man i no laik save long God na i no bihainim gutnius bilong Jisas, Bikpela bilong yumi.” (2 Tesalonaika 1:​7, 8) Dispela bai mekim bikpela samting tru long ol manmeri! Ol manmeri husat i no laik harim gutnius bilong Kingdom Bilong God, em ol Witnes i autim long nau long olgeta hap, ol bai kisim bagarap. Ol man i wok long painim Jehova, stretpela pasin, na pasin daun, ol tasol “i no inap bagarap” “taim Bikpela i belhat na bekim pe nogut long ol manmeri.”​—Sefanaia 2:3.

¹⁹ Yumi amamas olsem Jehova i save yusim ol strongpela ensel bilong helpim na strongim ol man i save lotuim em. Yumi save long wok ol ensel i save mekim bilong kamapim laik bilong God na dispela i mekim gut bel bilong yumi, long wanem, i gat sampela ensel i bin bikhet long Jehova na Satan i save bosim ol. Stadi i kamap bihain long dispela bai stori long ol samting ol Kristen tru i ken mekim bilong lukautim ol yet long Satan na ol ensel nogut bilong em.

[Futnot]

Yu Lainim Wanem Samting?

• Ol ensel i bin kamap olsem wanem?

• Long taim bilong ol man i bin raitim Baibel, ol ensel i bin mekim wanem wok?

• Kamapim Tok Hait 14:​6, 7 i stori long wanem wok ol ensel i save mekim long nau?

• Klostu nau ol ensel bai mekim wanem bikpela wok?

[Piksa long pes 22]

Wanpela ensel i bin strongim Manoa na meri bilong em

[Piksa long pes 23]

“I tru ol i gat planti soldia, tasol yumi gat bikpela lain moa bilong helpim yumi”