Pastaim Ol i Birua, Bihain Ol i Kamap Pren

SAMPELA yia i go pinis, Santiago na meri bilong em, Lourdes, i go sindaun long naispela taun Huillcapata, Peru, bilong helpim ol manmeri long kisim save long gutpela tok bilong Baibel. Tasol i no longtaim na wanpela pris bilong Cuzco i kam long dispela taun, na em i singautim olgeta manmeri long kam bung. Pris i mekim tok lukaut long ol olsem ol Witnes Bilong Jehova em ol i kam stap long taun na dispela bai bringim bikpela sik na planti ren ais bai pundaun na kilim i dai ol bulmakau na bagarapim ol gaden.

Planti i bilip long dispela tok bilong pris na winim 6-pela mun i no gat wanpela long taun i orait long stadi long Baibel wantaim Santiago na Lourdes. Miguel, namba 2 bilong gavena i ronim Santiago na Lourdes long rot na tromoi ol ston long tupela. Maski i olsem, tupela i bihainim yet pasin Kristen na stap isi wantaim ol narapela.

Bihain, sampela manmeri bilong taun i tok orait long stadi long Baibel. Miguel, em tu i senisim tingting bilong em. Em i kirap stadi wantaim Santiago, lusim pasin bilong dring planti tumas na kamap man bilong stap isi wantaim ol narapela. Nau Miguel, meri bilong em, na tupela bilong ol pikinini meri bilong em i stadi na kisim tok i tru bilong Baibel.

Long nau i gat wanpela strongpela kongrigesen bilong ol Witnes Bilong Jehova long dispela taun. Miguel i amamas, long wanem, klostu olgeta ston em i tromoi long Santiago na Lourdes i no paitim tupela, na em i tenkyu tru long gutpela pasin bilong tupela marit long stap isi.

[Ol Piksa long pes 32]

Gutpela pasin isi bilong Santiago na Lourdes (antap) i mekim na Miguel (han sut) i senisim tingting bilong em