Amamas Long Tingim Tingim Ol Samting Long Bel
SAMPELA man inap ting pasin bilong tingim tingim ol samting long bel i bikpela wok tumas. Ol inap ting em i hatwok na bilong mekim olsem ol i mas tingting strong long wanpela samting. Na tu, bel bilong ol inap kotim ol taim ol i no mekim dispela samting, na moa yet taim ol i ritim long Baibel olsem dispela em i wanpela bikpela samting yumi mas mekim. (Filipai 4:8) Tasol yumi inap amamas long lusim haptaim bilong tingim tingim long bel ol samting yumi bin lainim long Jehova, olsem ol gutpela pasin bilong em, ol bikpela samting em i bin mekim, ol lo bilong em, na gutpela samting em i tingting pinis long mekim. Bilong wanem i olsem?
God Jehova em i Nambawan Bikpela King bilong heven na graun na em i wok strong long kamapim ol samting em i tingting pinis long mekim. (Jon 5:17) Tasol maski i olsem, em i skelim ol tingting i stap long bel bilong wan wan man i lotuim em. Spirit bilong God i kirapim man bilong raitim song, Devit, long tok olsem: “Bikpela, yu skelim pinis bel bilong mi, na yu save tru long mi. Yu save long olgeta samting mi save mekim. Yu stap longwe, tasol yu save long olgeta tingting bilong mi.”—Song 139:1, 2.
Ating pastaim sampela inap kisim tingting kranki long dispela tok bilong man bilong raitim song. Ol inap ting, ‘Maski God i “stap longwe,” em i luksave long olgeta tingting nogut bilong mi.’ Em i gutpela long yumi save olsem em i lukim ol tingting nogut bilong yumi. Dispela inap helpim yumi long sakim ol tingting nogut, na taim yumi gat ol kain tingting olsem, yumi autim long God na bilip olsem em bai fogivim yumi, long wanem, yumi bilip long ofa bilong Jisas bilong baim bek ol man. (1 Jon 1:8, 9; 2:1, 2) Tasol yumi mas tingim tu olsem Jehova i gat gutpela tingting taim em i skelim ol wokman bilong em. Taim yumi tingting long em na tenkyu long em, em i save lukim dispela.
Ating yu laik save, “Tru tru Jehova i save lukim olgeta gutpela tingting bilong planti milion wokman bilong em o nogat?” Yes, em i save lukim. Jisas i kamapim klia olsem Jehova i save tingim tru yumi taim em i tok Jehova i save tingim ol liklik pisin tu, na bihain em i tok: “Yupela i winim planti lain liklik pisin.” (Luk 12:6, 7) Ol liklik pisin i no inap tingting long Jehova. Olsem na sapos em i tingim ol, em bai tingim yumi moa yet na amamas taim yumi wan wan i tingting long em! Yes, olsem Devit, yumi inap tok: “Bikpela, mi laik bai . . . tingting bilong mi i ken i orait long ai bilong yu. Bikpela, yu ples hait bilong mi na helpim bilong mi.”—Song 19:14.
Tok bilong profet Malakai tu i kamapim klia olsem Jehova i save lukim tingting bilong ol wokman bilong em i stap gut long em. Em i tok profet long taim bilong yumi: “Bihain ol manmeri i save stap aninit long Bikpela na i harim tok bilong en, ol i toktok long ol yet, na Bikpela i harim toktok bilong ol. Na Bikpela i tok, na long heven ol i raitim wanpela buk i gat nem bilong ol manmeri i save stap aninit long Bikpela na i tingting long em oltaim.” (Malakai 3:16) Taim yumi tingim olsem Jehova i lukim yumi taim yumi tingting long em, dispela inap kirapim tru yumi long amamas long tingim tingim ol pasin bilong God long bel. Olsem na i gutpela sapos yumi wanbel wantaim tok bilong man bilong raitim song, em i tok: “Bai mi tingting long olgeta samting yu bin mekim. Yu bin mekim ol strongpela wok, na bai mi tingim dispela tu.”—Song 77:12.