Ol Longwe Taun Bilong Bolivia i Harim Gutnius

MIPELA 20 manmeri i bung long nambis na redi long go lukim ol ples i stap antap long wara. Mipela i stap long as bilong ol maunten Andes we wara Beni i ron i kam long ol traipela ples daun bilong Amazon. Em i wanpela naispela ples tru.

Tasol mipela i no turis, nogat. Sampela bilong mipela i bilong dispela hap yet, na sampela i bilong ol taun i stap longwe na ol i kam sindaun hia long Rurrenabaque, em naispela liklik taun i gat ol diwai i putim plaua, ol haus kunai, na ol rot we ol wan wan motobaik tasol i save raun long en. Bilong wanem mipela i raun long dispela hap?

Samting i kamap long dispela hap i kamap tu long planti narapela hap bilong Bolivia. Ol Witnes Bilong Jehova bilong ol biktaun na ol narapela kantri ol i bringim gutnius bilong Kingdom Bilong God i go long ol liklik taun.​—Matyu 24:14.

Bolivia i stap long namel bilong Saut Amerika. Em i gat bikpela hap graun, olsem dabolim graun bilong kantri Frans, tasol namba bilong ol manmeri long Bolivia i 10 pesen tasol bilong namba bilong ol manmeri long Frans. Planti man bilong Bolivia i save sindaun long ol biktaun na ol liklik taun i gat ol main na i stap long ol ples maunten i antap tru, o long hap bilong wokim fam long ol ples daun. Tasol long ol ples hat ol taun i stap longwe longwe, na namel long ol i gat ol traipela bikbus.

Namel long 1950 na 1960 samting, ol misineri i gat strongpela bel, olsem Betty Jackson, Elsie Meynberg, Pamela Moseley, na Charlotte Tomaschafsky, ol i go pas long mekim wok autim tok long planti taun i stap longwe. Ol i skulim ol manmeri i gat gutpela bel long tok i tru bilong Baibel na ol i helpim wok bilong kirapim ol liklik kongrigesen. Namel long 1980 na 1990 samting, namba bilong ol Witnes Bilong Jehova i go bikpela tru, em planti ol i stap long ol biktaun. Long nau i gat ol kongrigesen long olgeta hap bilong ol biktaun. Yu inap painim ol long ol hap i gat planti bisnis samting we ol man i wok long ol ofis i stap long ol traipela haus i go antap tru, na ol i sindaun long ol gutpela gutpela haus, na ol i save baim kaikai long ol supamaket. Tasol i gat ol kongrigesen i stap tu long ol ples arere long ol biktaun we ol manmeri i sindaun long ol haus kunai samting, na ol i save baim kaikai long maket, na ol i save werim ol klos bilong ples i gat kala kala. Tasol ol i ken mekim wanem bilong helpim planti manmeri moa bilong ol longwe ples long kisim save long Jehova?

Lusim Gutpela Sindaun Long Biktaun

Insait long twenti yia i go pinis, planti lain bilong Bolivia i lusim ol liklik taun i gat ol main na ol ples long hap bilong bus na ol i kam sindaun long ol biktaun. I narapela kain long lukim ol man i lusim ol biktaun na i go sindaun long ol liklik ples. Planti liklik ples i gat wanpela telefon tasol na ol i gat pawa inap long sampela aua tasol long olgeta de. Ol Witnes i sindaun long ol dispela liklik taun ol i save lukim ol wanbilip long ol bikpela kibung tasol i kamap wanpela taim long olgeta yia, na bilong go long ol dispela kibung ol i mas tromoi bikpela mani, na bagarap inap painim ol long rot, na ol i lusim bikpela strong. Ol skul i olsem komiuniti skul tasol. Orait wanem samting i save kirapim planti Witnes Bilong Jehova long lusim ol biktaun na go sindaun long ol liklik ples?

Luis i tok: “Mi gat rot long kisim gutpela wok long biktaun La Paz, tasol oltaim papamama i bin skulim mi olsem wok bilong kamapim ol disaipel em i nambawan gutpela wok bilong mekim. Olsem na mi mekim sotpela kos long wok konstraksen. Wanpela taim mi raun long Rurrenabaque, na mi lukim ol man i gat laik tru long harim tok bilong gutnius. Taim mi lukim olsem i no gat planti brata long dispela hap, mi ting mi mas i kam helpim ol. Nau mi save mekim 12-pela Baibel stadi wantaim ol man. Mi stadi wantaim wanpela yangpela man na meri bilong em, ol i gat 4-pela pikinini. Pastaim em i save dring planti na pilai laki, tasol em i lusim pinis ol dispela samting na em i kirap tokim ol pren bilong em long ol tok bilong Jehova em i lainim. Oltaim em i save redim stadi bilong em. Sampela taim em i mas i stap 3-pela o 4-pela de long bikbus na katim ol diwai, na em i bel hevi long dispela, long wanem, em i no laik lusim ol wok Kristen bilong em. Taim mi lukim ol long ol miting Kristen, mi amamas long mi bin lusim gutpela sindaun na kam i stap long dispela hap.”

Juana em i wanpela mama wanpis. Em i tok: “Bipo mi wanpela hausmeri long La Paz. Taim pikinini man bilong mi i liklik yet, mi kirap autim tok fultaim long dispela taun. Wanpela taim mi go raun long Rurrenabaque, na mi lukim olsem mi inap mekim bikpela wok moa sapos mi kam sindaun long dispela hap. Olsem na mipela i kam, na mi kisim wok olsem hausmeri. Pastaim hatpela san na planti natnat samting i givim hatwok tru long mi. Tasol mipela i stap 7-pela yia pinis long dispela hap, na mi save mekim planti Baibel stadi long olgeta wik, na planti sumatin i pilim tru ol tok ol i lainim na ol i save kam long ol miting.” Juana wantaim pikinini bilong em i insait long dispela lain i kalap long dingi bilong go antap long wara. Sapos yu laik yu ken kam wantaim mipela.

Go Antap Long Wara

Moto i krai bikpela taim dingi i ron i go long hap we wara i no op tumas namel long ol maunten. Ol kalangar i flai antap na ol i lukim mipela na i singaut strong. Wara i kam long ol maunten na i gat graun long en na tait bilong wara i strong, tasol man bilong holim stia em i gat save long stiaim gut dingi. I no belo yet na mipela i kamap long wanpela liklik ples. Long dispela ples mipela i bungim wanpela wasman bilong Kongrigesen Rurrenabaque, na em i soim mipela long hap mipela i ken autim tok long en.

Ol asples i kisim mipela i go sindaun aninit long wanpela diwai o insait long haus morota. I no longtaim na mipela i bungim tupela yangpela marit ol i wok long memeim stik suga long wanpela masin. Wara bilong suga i ran i go insait long wanpela dis kapa. Bihain ol bai boilim dispela wara i go inap long em i kamap olsem hani, na ol i karim i go long taun bilong salim. Tupela i singautim mipela i go insait long haus na ol i givim planti askim long mipela long tok bilong Baibel.

Orait nau mipela i kalap gen long bot na go antap moa long wara na autim tok long ol ples. Planti ol i amamas long harim tok bilong Baibel long ol sik na dai bai pinis. (Aisaia 25:8; 33:24) Long dispela hap i no gat planti dokta samting, olsem na long planti famili i gat wanpela pikinini i bin i dai. Ol man i save mekim wok gaden o kisim pis, sindaun bilong ol i gat hatwok tru long en. Olsem na planti ol i tingim tru tok promis bilong God long Song 72 olsem wanpela gavman bai mekim na ol man i no stap rabis moa. Tasol yu ting ol manmeri i laikim tok bilong Baibel na i sindaun long ol dispela longwe ples ol bai taitim bun bilong i go long ol miting Kristen? Eric na Vicky i tingim dispela askim, em tupela i save autim tok fultaim long Santa Rosa i stap insait moa yet long hap bilong Amazon.

Ol Man i Laik Harim Ol Bai Kam o Nogat?

Eric na Vicky i bin lusim California, Amerika, na kam long Bolivia inap 12-pela yia i go pinis. Wanpela wasman bilong raun i laik bai tupela i go sindaun long Santa Rosa. Vicky i tok: “I gat tupela telefon tasol long taun, na i no gat Intenet. I gat planti animal na pisin samting bilong bus. Mipela save lukim ol pukpuk, ostris, na ol bikpela snek taim mipela i raun long motobaik na i go autim tok long ol ples. Tasol mipela i amamas moa long lukim ol manmeri bilong dispela hap. Mipela i save stadi long Baibel wantaim famili Vaca, em tupela yangpela marit i gat 4-pela liklik pikinini. Ol i save sindaun longwe long taun inap 26 kilomita. Pastaim papa bilong ol em i man bilong dring spak, tasol nau em i senisim pasin bilong em. Long olgeta wik em i save bringim famili olgeta wantaim liklik susa bilong em i kam long Haus Kingdom. Meri na bebi bilong em i kalap wantaim em long bikpela baiskol. Pikinini man i gat 9-pela krismas i save kisim liklik susa long narapela baiskol, na narapela pikinini i gat 8-pela krismas em yet i raun long narapela baiskol. Ol i save lusim 3-pela aua bilong kamap long Haus Kingdom.” Dispela famili i laikim tru Jehova na ol i wok strong tru long bung wantaim kongrigesen.

Insait long 18 mun tasol, 3-pela long Santa Rosa i winim mak bilong kisim baptais, na inap olsem 25 i save kam bung long nupela Haus Kingdom long Santa Rosa. Planti manmeri i laik stadi long Baibel, tasol planti bilong ol i gat ol bikpela hevi ol i mas winim bambai ol i ken mekim wok bilong Jehova.

Hatwok Bilong Stretim Marit

Marina na Osni em tupela misineri marit i mekim wok long wanpela longwe taun klostu long boda bilong Bolivia na Brasil, na tupela i tok planti manmeri bilong dispela hap i no save tingim marit i pasim man na meri wantaim inap long taim ol i dai. Ol i save lusim poroman na kisim narapela, na mekim olsem i go. Osni i tok: “Dispela pasin i save pasim ol long kamap strong long ol samting bilong spirit. Taim ol manmeri i laik kamap Kristen tru, i gat hatwok tru long stretim dispela samting na ol i mas tromoi bikpela mani. Sampela i mas stretim ol samting wantaim ol poroman bilong ol long bipo, na nau ol inap marit stret long lo bilong gavman. Tasol pasin bilong stretim marit long gavman em i wanpela lo bilong Baibel, olsem na sampela i bin wok strong tru long painim mani bilong stretim marit.”​—Rom 13:​1, 2; Hibru 13:4.

Marina i kamapim stori bilong Norberto, olsem: “Em i bin sindaun wantaim planti meri na bihain em i sindaun wantaim wanpela meri i gat bisnis long wokim bret. Meri i yangpela long em inap 35 krismas na em i gat wanpela pikinini man em Norberto i adoptim. Taim pikinini i wok long go bikpela, Norberto i laik i stap olsem gutpela piksa em i ken bihainim. Olsem na taim wanpela Witnes i kam long dispela haus bret na em i tok long stadi wantaim ol long Baibel, no gat pe, Norberto i tok orait long dispela, maski em i no inap rit na em i winim pinis 70 krismas. Taim Norberto wantaim poroman bilong em i kisim save long ol samting Jehova i laik bai ol i mas mekim, ol i stretim marit na bihain tupela i kisim baptais. Pikinini man i kamap gutpela yangpela man Kristen, olsem waspapa i laik bai em i mekim. Norberto i lain long rit, na em i save mekim sampela tok long ol miting bilong kongrigesen. Maski em i lapun na em i no gat strong, em i givim bel long autim gutnius.”

Kisim Strong Long Spirit Bilong Jehova

Jisas i bin tokim ol disaipel bilong em: “Bihain Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi long . . . olgeta hap bilong graun.” (Aposel 1:8) Taim yumi lukim spirit bilong God i kirapim ol man na meri Kristen long lusim ples bilong ol na i go sindaun long ol longwe hap, dispela i strongim tru bel bilong yumi! Long 2004, inap 30 strongpela Kristen long Bolivia i orait long go long ol longwe hap bilong kantri na autim tok inap sampela mun olsem painia salim. Ol i pilim tru gutpela pasin bilong 180 manmeri bilong ol narapela kantri husat i bin kam long Bolivia bilong mekim wok painia, o wasman sekit, o wok volantia long Betel, o wok misineri. I gat 17,000 pablisa i save autim tok bilong Kingdom long Bolivia na ol i mekim 22,000 Baibel stadi wantaim ol man.

Ol dispela bratasista i pilim olsem spirit bilong Jehova i stiaim ol, na dispela i givim bikpela amamas long ol. Yumi ken tingim Robert na Kathy, ol i orait long kam long Camiri bilong mekim wok misineri. Camiri em wanpela ples i stap klostu long wanpela wara na ol grinpela gras i karamapim ol liklik maunten, na em i stap longwe long ol narapela taun. Robert i tok: “I luk olsem mipela i kam long gutpela taim stret. Insait long tupela yia, inap 40 manmeri samting i bin kamap pablisa bilong autim gutnius.”

Spakman Bilong Pilai Laki i Harim Tok

Planti man i kirap nogut long ol lain bilong stadi long Baibel i senisim pasin bilong ol. Olsem: Inap 4-pela yia i go pinis, wanpela spakman nem bilong em Ariel em i bin dring planti na em i slip i stap long bet. Em i man bilong pilai laki na ol man i laikim em, tasol oltaim em i tingting planti long ol dinau bilong em i wok long go bikpela, na em i gat hevi long marit, na em i no lukautim gut ol pikinini meri bilong em. Em i tingting i stap na wanpela Witnes Bilong Jehova i kam long haus. Ariel i putim gut yau taim brata i kamapim gut ol tok bilong Baibel. Orait Ariel i go bek long bet na ritim ol tok i stori long famili i stap amamas, na Paradais, na mekim wok bilong God. Bihain em i orait long stadi long Baibel.

Taim ol misineri i kam kamap long Camiri, meri bilong Ariel, em Arminda, em tu i stadi​—tasol em i no givim bel tumas long en. Em i tok: “Mi redi long traim olgeta samting bilong stopim em long dring. Tasol mi no ting dispela inap helpim em. Em i no inap senis.” Tasol Baibel stadi i kirapim tru tingting bilong Arminda. Insait long wanpela yia em i kisim baptais, na em i wok long autim tok long famili bilong em. I no longtaim na sampela wanblut i dediketim laip bilong ol long Jehova.

Ariel i hatwok tru long lusim dring na smok na pilai laki. Tasol wanpela taim em i singautim olgeta poroman bilong em i kam long Memorial bilong tingim dai bilong Jisas. Em i tingting olsem: “Ol man husat i no kam, bai mi no poroman moa wantaim ol. Ol man i kam, bai mi stadi wantaim ol long Baibel.” Em nau, long dispela rot em i kirapim 3-pela Baibel stadi. Na taim Ariel i no kam yet insait long kongrigesen, em i stadi wantaim wanpela wanblut i wok long kamap strong na em i kisim baptais long wankain de olsem Ariel. Arminda i tok: “I olsem dispela Ariel bilong pastaim i no stap moa.”

Robert i tok: “I gat 24 bilong dispela famili i save kam oltaim long ol miting. Tenpela i baptais pinis, na 8-pela moa ol i pablisa i no baptais. Sampela i lukim pasin bilong ol dispela man i senis na ol tu i kirap stadi long Baibel na ol i kam long ol miting. Pastaim i gat 100 i save kam long miting, na nau i gat 190 i save kam. Mitupela Kathy i mekim 30 Baibel stadi, na olgeta i save kam long ol miting. Mipela i amamas long i stap long dispela hap.”

Dispela wok i kamap long ol longwe taun bilong Bolivia em i liklik hap bilong wanpela bikpela wok i kamap long olgeta hap bilong graun​—em wok bilong bungim ol man olsem Kamapim Tok Hait sapta 7, i tok profet long en. Em i toktok long wok bilong bungim ol man long “de bilong Bikpela,” em ol bai abrusim bagarap long taim bilong bikpela hevi tru. (KTH 1:10; 7:​9-14) Long nau i gat planti milion manmeri bilong olgeta lain ol i stap wanbel long lotuim dispela wanpela God tru. Dispela i kamapim klia olsem klostu nau ol tok promis bilong God bai kamap tru!

[Piksa long pes 9]

Betty Jackson

[Piksa long pes 9]

Elsie Meynberg

[Piksa long pes 9]

Pamela Moseley

[Piksa long pes 9]

Charlotte Tomaschafsky, long han sut

[Piksa long pes 10]

Long olgeta wik famili Vaca i save raun long baiskol inap 3-pela aua bilong kamap long Haus Kingdom

[Piksa long pes 10]

Eric na Vicky i kam wok long hap i sot long ol man bilong autim tok bilong Kingdom

[Piksa long pes 11]

Ol lain bilong ples klostu long wara Beni i putim gut yau long gutnius

[Piksa long pes 12]

Robert na Kathy i mekim wok misineri long Camiri