“Pepol Traiengol i Makim Wanem Samting?”
WANPELA wokman bilong gavman long Seoul, Ripablik Bilong Korea, i raitim pas na i tok: “Sampela de i go pinis, mi kisim wanpela Wastaua long wanpela Witnes Bilong Jehova. Taim mi ritim, mi kisim save long pasin birua ol Natsi na lain Komiunis i bin mekim long ol Witnes Bilong Jehova. Tasol mi gat wanpela askim. Piksa long karamap bilong nius i soim pepol traiengol i stap long han kais bilong saket ol Witnes Bilong Jehova i werim. Pepol traiengol i makim wanem samting?”
Taim gavman Natsi i bosim Jemani, ol Witnes Bilong Jehova i no laik tok “Heil Hitler,” na ol i no insait long wok politik na ami. Olsem na ol Natsi i mekim nogut tru long ol na putim 12,000 Witnes long ol kalabus na ol banis kalabus inap sampela mun o yia. Inap 2,000 ol i dai, em planti handet i dai long han bilong ol Natsi.
Pepol traiengol i stap long klos bilong ol i makim wanem samting? Buk Anatomy of the SS State i tok: “Insait long ol banis kalabus [bilong ol Natsi], ol kalabusman i pasim wanpela mak long klos bilong ol bilong makim ol i wanem kain kalabusman. Ol Natsi i bin bihainim dispela pasin paslain long taim bilong woa. Ol i save samapim wanpela traiengol long klos bilong ol kalabusman. Kala bilong traiengol i makim i gat wanem as na ol i kalabus. Olsem: Retpela kala, em bilong man i kalabus long ol samting bilong politik. Pepol, em bilong ol Witnes Bilong Jehova; blakpela, em bilong ol bikhetman, grinpela, em bilong ol raskol; pink, em bilong ol gei lain; na blupela, em bilong ol man bilong narapela kantri. Ol kalabusman bilong lain Juda i pasim yelopela sta, ol i samapim tupela traiengol wantaim na i luk olsem wanpela sta, bilong makim Sta Bilong Devit.”
Long buk Holocaust Politics, Profesa John K. Roth i tok: “Sapos ol man long nau i tingim pasin bilong ol dispela man i bin pasim pepol traiengol, ating dispela inap mekim na kain hevi olsem i no ken kamap gen. Pepol traiengol inap kirapim ol man long tingim gutpela pasin ol man i mas mekim long ol narapela.” Ol Witnes Bilong Jehova i bin wokim wanpela gutpela vidio Jehovah’s Witnesses Stand Firm Against Nazi Assault. Yu ken askim wanpela Witnes long soim dispela vidio long yu.