Askim

Long Matyu 5:​22, Jisas i tok lukaut long wanem 3-pela samting?

Long Bikpela Tok Long Maunten, Jisas i bin givim tok lukaut long ol disaipel bilong em: “Mi tokim yupela olsem, man i kros nogut long brata bilong en, em i mas kamap long kot. Na man i tok nogut long brata bilong en, em i mas kamap long namba wan kaunsil. Na man i tokim narapela man olsem, ‘Yu longlong man tru,’ em i mas i go long paia bilong hel [“Gehena,” NW].”​—Matyu 5:22.

Jisas i kolim ol tok ol Juda i save long en​—kot, namba wan kaunsil, na paia bilong Gehena​—bilong kamapim olsem man bai kisim strafe i stret long rong em i bin mekim.

Namba wan samting, Jisas i tok olsem man i kros i stap yet long brata bilong em, em i mas kamap long “kot.” Ol Juda i save wokim ol dispela kot insait long ol taun i gat 120 samting man i stap. (Matyu 10:17; Mak 13:9) Ol jas i bin sindaun long kain kot olsem, ol i gat namba long makim strafe bilong man i mekim rong, na tu, strafe bilong man i kilim man i dai. (Lo 16:18; 19:12; 21:​1, 2) Olsem na tok Jisas i mekim i soim olsem sapos wanpela man i kros i stap yet long brata bilong em, dispela man i mekim bikpela rong.

Namba tu samting, Jisas i tok taim man i “tok nogut long brata bilong en, em i mas kamap long namba wan kaunsil.” Tok Grik rha·kaʹ ol i tanim olsem “tok nogut,” mining bilong en i olsem “no gat save.” Buk The New Thayer’s Greek-English Lexicon of the New Testament i tok, em “wanpela tok ol Juda long taim bilong Krais ol i save yusim taim ol i toknogutim narapela.” Olsem na Jisas i mekim tok lukaut olsem pasin bilong toknogutim narapela man, dispela i no liklik samting. I olsem Jisas i tok man i mekim kain tok olsem, em i no ken kamap long kot bilong taun, nogat, em bai kamap long kot bilong namba wan kaunsil​—em lain bilong harim kot long Jerusalem. Insait long dispela lain, i gat hetpris, na 70 hetman na ol saveman bilong lo.​—Mak 15:1.

Na namba tri samting, Jisas i tok sapos wanpela man i kolim arapela man olsem, “Yu longlong man tru,” dispela man i mas i go long paia bilong Gehena. Dispela tok “Gehena” i kam long tok Hibru geh hin·nomʹ, mining bilong en “ples daun bilong Hinom,” na dispela ples i stap long hap wes na saut bilong Jerusalem bilong bipo. Long taim bilong Jisas, dispela ples i kamap ples bilong kukim ol pipia, na tu, bodi bilong ol man nogut i dai pinis em ol manmeri i ting i no stret ol i planim ol kain man olsem long matmat. Olsem na dispela tok “Gehena” i makim samting i bagarap na i pinis olgeta.

So dispela tok “longlong man tru” i makim wanem samting? Dispela tok i kain olsem wanpela tok Hibru i makim “bikhet.” Dispela tok i makim olsem man i no gat gutpela pasin, em i wanpela apostet na i bikhet long God. Olsem na taim wanpela man i kolim brata bilong em, “yu longlong man tru,” i olsem em i tok, brata bilong em i mas kisim strafe bilong man i bikhet long God, em strafe bilong bagarap na pinis olgeta. Long ai bilong God, man i mekim kain tok olsem, em yet inap kisim dispela strongpela strafe​—em bagarap na pinis olgeta.​—Lo 19:​17-19.

Olsem na Jisas i kamapim wanpela bikpela stiatok em lain bilong em i mas bihainim​—Lo Bilong Moses i no bin kamapim kain stiatok olsem. Tru, ol man i save olsem sapos man i kilim i dai narapela man, em i mas “kamap long kot,” tasol Jisas i no stori tasol long ol samting man i mekim, nogat, em i tok tu long samting man i pilim long bel. Em i skulim lain bilong em long abrusim pasin bilong bel nogut na kros i stap yet long ol brata bilong ol.​—Matyu 5:​21, 22.