Winim Taim Bilong “Bikpela Hevi Tru” o Bagarap?
“Olsem na ol dispela lain man ol bai i go kisim pe nogut, bai ol i lus olgeta. Tasol ol stretpela man bai i kisim laip i stap oltaim.”—Matyu 25:46, New World Translation.
1, 2. Sampela manmeri ting olsem wanem? Bilong wanem dispela tingting i nogut na yumi mas abrusim?
SAMPELA manmeri i ting God bai kisim bek olgeta manmeri, olsem na ol i no laikim tru dispela tingting olsem sampela manmeri bai bagarap na lus olgeta. Wanpela man bilong raitim tok bilong lotu long namba tri senseri, em Origen, em i kirap long tingting olsem bihain bai God i kisim bek olgeta manmeri. Sampela manmeri long nau tu ol i tok ol i Kristen ol i ting olgeta manmeri i dai pinis bihain bai ol i kirap bek. Ol i ting olgeta manmeri i bagarap long taim bilong “bikpela hevi tru“ ol tu bai kirap bek.—Matyu 24:21, 22, NT.
2 Ol manmeri i kisim dispela kain tingting ol i kisim tingting i wankain liklik olsem bilong ol misin bilong Krisendom, em ol i tok skin bilong OLGETA manmeri i dai pinis bai kirap bek na pas gen wantaim tewel bilong ol long heven o long “hel.” Tasol Baibel i no tok olsem. Na Baibel i no tok OLGETA manmeri i dai pinis, olgeta man nogut tu, bai ol i kirap bek na i stap laip gen. Nogat.
Sampela Manmeri i Dai Pinis Ol i No Ken Kirap Bek
3. Jisas i tok wanem na yumi save, sampela manmeri ol i no ken kirap bek?
3 Sampela tok Jisas i mekim i makim olsem sampela manmeri i no ken kirap bek. Em i bekim tok long wanpela askim ol Sadyusi i givim long em bilong trikim em. Ol Sadyusi i save tok, ol man i dai pinis ol i no inap kirap bek. Jisas i bekim tok long ol na em i tok long ol manmen “ol inap kirap bek na stap laip long taim bihain.” (Luk 20:35, NT) Olsem na yumi save, i gat sampela manmeri ol i no inap kirap bek na stap laip long nupela taim bihain God i tok promis long kamapim.
4. Wanem ol samting bai givim bek ol daiman i stap long en, olsem Rev elesen sapta 20 i tok? Tasol wanem samting i no ken givim bek ol daiman i stap long en?
4 Revelesen sapta 20 i stori long “ol arapela daiman” ol i no bilong kirap bek long “namba wan taim,” na dispela sapta i tok, “solwara” na “Hel” i givim bek ol daiman i stap long en. Tasol Baibel i no tok, “bikpela hul i gat paia” em “namba tu dai” o Gehenna i givim bek ol daiman i stap long en. Nogat. (Long Nupela Testamen [tok pisin] o tanim kranki dispela tok Gehenna na raitim olsem “hel,” olsem long Luk 12:5.) Dispela tok “solwara” i makim bilong olgeta manmeri i lus long na ol man i no bin kisim bek skin bilong ol bilong planim long graun. Na olsem tasol dispela tok “Hel” i makim i no matmat bilong wanpela man nogat; em i makim matmat bilong manmeri i dai na ol i planim ol long graun. Long Nupela Testamen (tok Pisin) Ol i tanim wanpela tok Grik (ha’des) olsem “Hel” o “ples bilong ol daiman. Dispela Tok Grik i wankain olsem tok Hibru “Sheol” long Olpela Testamen. Jisas i tok: “Bipo mi dai pinis, tasol yu lukim mi, mi stap laip oltaim oltaim. Na mi holim ki bilong dai na bilong ples bilong ol daiman [ha’des o matmat].” (Revelesen 1:18, NT) Taim Jisas i stap king inap 1,000 yia em bai mekim wok long ol dispela “ki” na ol mammeri “ol inap kirap bek na stap laip long nupela taim bihain” bai ol i lusim matmat.
5. Gehenna i makim wanem samting?
5 Tasol Baibel i no tok Krais i holim ki bilong Gehenna Nogat. Krais i stori long Gehenna na em i tok: “Yupela i no ken pret long ol man i save kilim i dai bodi, tasol i no inap kilim tewel [laip] bilong yupela. Nogat. Yupela i mas pret long dispela [Jehova] em inap bagarapim tewel [laip] wantaim bodi long [Gehenna]” Matyu 10:28, NT) Wanpela professa i stori long dispela tok bilong Baibel Matyu 10:28 na em i tok: ‘Tok Grik (psy.khe’) ol i tanim olsem “tewel” long dispela ves ol i mas tanim olsem “laip … W. G. Kümmel tu … i tok, na i gat as bilong tok bilong em, olsem: Matyu 10:28 i no bilong makim yumi gat tewel na tewel i no inap i dai; nogat; em bilong makim God tasol inap pinisim laip long graun na long heven tu.’ (Immortality of the Soul or Resurrection of the Dead? bilong Profesa Oscar Cullmann) Yes, Gehenna i makim man i dai na i pinis olgeta, em i no inap kirap bek. Wanpela buk i stori long ol tok bilong Baibel na i kamapim insait bilong dispela tok Gehenna. Dispela buk (The New Bible Commentary, Second Edition pes 786) i tok, Gehenna “i makim ‘namba tu dai.’”—Revelesen 21:8, NT.
6. Kamapim sampela tok bilong Baibel i soim yumi, sampela manmeri i go long Gehenna taim De Bilong Kot bilong 1,000 yia i no kirap yet na ol i no ken kirap bek.
6 Baibel i tok klia, sampela manmeri ‘i go long Gehenna’ taim De Bilong Kot bilong 1,000 yia i no kirap yet. Jisas i tokim ol saveman bilong lo na ol Farisi, em ol i no tanim bel, olsem: Ol yet wantaim ol man bilong ol narapela lain i kamap disaipel bilong ol, ol i ‘man bilong i go long Gehenna.’ (Matyu 23:15, 33-35; lukim tu Jon 9:39-41; 15:22-24.) Sapos wanpela disaipel bilong ol Farisi ‘i winim ol moa yet long pasin nogut’ na em i kamap ‘man bilong i go long Gehenna,’ orait olsem wanem long Judas Iskariot em i pasim tok wantaim ol Farisi long kamapim Pikinini Bilong God long ol? Em i kamap moa yet olsem ‘man bilong i go long Gehenna,’ a? Jisas i mskim olsem, long wanem em i kolim Judas olsem “man bilong lus.” (Jon 17:12, NT) Na ol man i bikhet na lusim bilip na ol i no tanim bel, taim ol i dai ol i no i go long Sheol o Hades; ol i go long Gehenna. (Hibru 6:4-8; 2 Pita 2:1) Na i wankain tu long ol Kristen i dediket pinis, tasol long laik bilong ol yet ol i wokabaut long pasin bilong sin o ol i “surik.” (Hibru 10:26-31, 38, 39, NT) Em sampela manmeri ol i mekim dispela kain sin i no inap tekewe “nau” o “long taim bihain tu.” (Matyu 12:31, 32, NT; lukim tu 1 Jon 5:16.) Olsem na ol i no ken kirap bek.
Jehova i No Save Senisim Tok Kot Bilong Em
7. I gat wanem samting na yumi ken save, nau long dispela taim Jehova i skelim sampela manmeri long kot na kolim strafe bilong ol na em i no ken senisim tok bilong em?
7 Jisas i tok, man i “mekim tok nogut long Holi Spirit,” God i no ken tekewe dispela sin bilong em “nau” o “long taim bihain tu.” Olsem na yumi save, “nau” long dispela taim, Jehova i skelim sampela manmeri long kot na tokaut long strafe bilong ol na em i no ken senisim tok bilong em. Sin bilong dispela kain man “bai i stap long em oltaim oltaim.” (Mak 3:28, 29, NT) Olsem na i no gat wok long God i kirapim bek ol dispela man, a?
8. (a) Olsem wanem yumi ken bihainim tingting wankain olsem bilong Jehova? (b) Bilong wanem yumi ken bilip tru long wok kot bilong Jas Jehova na Krais Jisas? Yumi ken stori long wanem sainting na bai yumi save, taim Jehova i mekim kot na kolim pinis strafe bilong man, em i no ken senisim tok bilong em?
8 Yumi ol man bilong autim tok bilong God bilong yumi, Jehova, na yumi save mekim long stretpela pasin; yumi no save raun na mekim pretim ol man. Yumi no save tokim ol, ‘Yu bai bagarap!’ Nogat. Yumi gat tingting wankain olsem bilong Jehova. Baibel i tok, Jehova “i no laikim wanpela man bai i lus. Em i laikim olgeta man i tanim bel.” Olsem na em i “wet yet.” (2 Pita 3:9, NT) Tasol yumi mas was gut, nogut yumi bel sori tumas na yumi kirap toknogutim pasin Jehova i mekim. Jehova em i stretpela Jas olgeta. (Diuteronomi 32:4) Na Krais Jisas tu em i mekim stretpela wok kot. (Jon 5:30) Taim ol i kisim wanpela man i go kot long ai bilong ol jas bilong dispela graun, sapos em i kot long ol liklik kot pastaim na bihsin em i kot long sprim-kot ol man i pilim olsem em i kisim stretpela kot, na em i no ken apil moa, long wanem sprim-kot em i nambawan bikpela kot. Na i olsem tasol long Jehova. Jehova em i nambawan bikpela jas na em i save mekim stretpela kot. Olsem na taim em i tokaut pinis long strafe bilong wanpela man, em i no ken senisim dispela tok bilong em.—Sam 119:75.
9. Matyu 10:28 i tok wanem na yumi ken save, taim Jehova i kolim pinis strafe bilong man em i no ken senisim dispela tok bilong em?
9 Tru Jehova i no les kwik long ol man; em i “wet yet,” long wanem em “i laikim olgeta man i tanim bel.” Tasol em i save sampela manmeri ol i no ken tanim bel. Olsem na Jisas i toksave long yumi na em i tok, yumi mas pret long dispela Man “em insp bagarapim tewel [laip] wantaim bodi long [Gehenna].” Wanpela buk (New International Dictionary of New Testament Theology) i stori long dispela ves na i tok: “Matyu 10:28 i no lainim yumi olsem tewel inap i stsp oltaim. Nogat. Em i lainim yumi olsem: Taim God i skelim pinis man i no tanim bel na kolim strafe bilong em, God i no ken senisim dispela tok bilong em.”
10. Jisas i tok wanem long “planti manmeri”? Em i tok wanem long ol “wanpela wanpela manmeri”? Wanem insait bilong dispela tok Grik apoleia?
10 Taim Jisas i autim tok antap long maunten, em i tok: “Yupela mas i go insait long liklik dua. Rot i go long ples lus [tok Grik, apoleia ] , em i bikpela na i op tumas. Na planti manmeri i bihainim dispela rot. Tasol dua i go long laip, em i liklik, na rot i go long laip em i gat hatwok. Na wanpela wanpela manmeri tasol i save painim dispela.” (Matyu 7:13, 14, NT) Ol buk i kamapim insait bilong ol tok Grik, ol i tok insait dispela tok apoleia i olsem “pinis” o “bagarap inap long olgeta taim” bihain.(Arndt & Gingrich) Na wanpela i tok, insait bilong dispela tok i makim man i pinis olgeta, i no bodi bilong tasol i pinis. (Theological Dictionary of the New Testament) Taim bilong “bikpela hevi tru” i laik painim ol manmeri bilong dispela taim nau na Baibel i tok klia, i gat tupela rot tasol. Ol manmeri i mas tingting: Ol i laik bihainim rot bilong –laip”. o rot bilong “lus.”—Matyu 24:21, 22, NT.
Winim Dispela Taim o Bagarap
11. (a) Wanem insait bilong dispela tok “de bilong Jehova? (b) Tasol wanem “bikpela de bilong Jehova” i no kamap yet? Wanem samting bai kamap long taim bilong dispela “bikpela de”?
11 “Bikpela de bilong Jehova i klostu.” (Sefananaia 1:14) Nau dispela de i klostu. Tru bipo ‘de bilong Jehova’ i bin painim sampela man na Jehova i bin givim strafe long ol man nogut na litimapim nem holi bilong em. Kain taim olsem i painim ol manmeri bilong Jerusalem ol i no stap gut long Jehova, na ol Babilon, na ol Isip. (Aisaia 2:1,6-17; 13:1-6; Jeremaia 46:1-10) Tasol nambawan bikpela “de bilong Jehova long graun no kamap yet. Em “de” bilong bilong bekim pe nogut long krisendom, na long ol narapela lotu giaman Seten i bin kamapim, na bilong pinisim olgeta samting nogut Seten i bin kamapim long dispela graun. Dispela “de” em i taim bilong “kros; em i taim bilong hevi na pret; em i taim bilong klaut i pairap na ol samting i bagarap.” Dispela tok profet i tok moa olsem: “Bai mi bringim hevi long ol man, … ol i bin mekim rong long Jehova. … Silva na gol bilong ol i no inap helpim ol long taim bilong kros bilong Jehova; paia bilong belhat bilong em bai kukim olgeta hap graun, long wanem em bai i mekim wanpela samting nogut bilong pinisim olgeta man i stap long graun.’ … taim belhat bilong Jehova i no painim yet yupela, taim de bilong kros bilong Jehova i no painim yet yupela, yupela i mas painim Jehova, em yupela olgeta man bilong graun i gat pasin daun na i bihainim tok bilong Em. Bihainim stretpela pasin na pasin daun. Olsem na taim Jehova i kamapim kros bilong em, ating bai em i haitim yupela na yupela i no ken bagarap.”—Sefanaia 1:15-2:3.
12. Tok profet bilong Sefanaia i makim tasol ol samting i painim lain Juda o olsem wanem?
12 Planti saveman bilong ol misin bilong Krisendom ol i save skelim tok bilong Baibel ol tu i save, dispela tok profet i no makim tasol ol samting i painim lain Juda. Nogat. Em i makim “bikpela strafe em bai painim olgeta manmeri bilong graun.” (Keil-Delitzsch) Em i makim “pinis bilong taim bilong sin” (Ecumenical Bible, tok Frans), em “taim bilong strafe i mas painim olgeta pasin nogut na kros bilong God bai painim olgeta manmeri ol i no save long God na ol i no bihainim gutnius bilong Bikpela bilong yumi, Krais Jisas.”—New Bible Commentary, Second Edition.
13. (a) “De bilong Bikpela” bai kamap long wanem taim, olsem Pol i tok? (b) “Man bilong sakim lo” i makim wanem lain? Wanem strafe bai painim dispela “man”?
13 Aposel Pol i stori long “De bilong Bikpela” wantaim taim bilong “Bikpela bilong yumi Jisas Krais em bambai i karn bek gen.” (2 Tesalonaika 2:1, 2, NT) Pol i stori long “planti man bai ol i bikhet na givim baksait long God,” na bihain “man bilong sakim lo” bai i kamap, em ol pris pasto bilong ol misin bilong Krisendom ol i lusim bilip Kristen tru. Na Pol i tok: “Long dispela taim dispela man bilong sakim lo bai i kamap ples klia. Na Bikpela Jisas bai i kilim em i dai long win bilong maus bilong em yet. Bikpela bai i kamap ples klia wantaim bikpela lait bilong en. Na long dispela lait bai em i bagarapim tru dispela man bilong sakim lo.” (2 Tesalonaika 2:3, 8, NT) Long kirap bilong taim bilong “bikpela hevi tru” ol dispela pris pasto i bikhet na lusim bilip ol bai “i dai” na ‘bagarap tru.’ (Revelesen 17:1-5, 16, 17) Ol i kolim dispela lain tu olsem “man em i bilong bagarap long [Gehenna].”“ Ol bai “bagarap” (apoleia) olgeta long Gehenna. Ol bai pinis olgeta na i no ken kirap bek olsem ol bikpela man bilong lotu long taim bilong Jisas.—1 Tesalonaika 2:3, NT; Matyu 23:33.
14. Bilong wanem planti narapela ol bai “lus”? Olsem na i gat wanem tupela rot ol manmeri i mas tingim?
14 Tasol olsem wanem long olgeta manmeri ol i bin bihainim ol dispela pris pasto na “olgeta giaman bilong pasin nogut” bilong ol? Aposel Pol í tok, ol bai “lus”. “Sapos ol dispela man i laik harim tok tru, orait bai God i kisim bek ol. Tasol ol i no laik. Olsem na bai God i salim samting bilong giamanim ol, na bai ol i bilipim tok giaman. Olsem na olgeta man i no bin bilipim tok tru, na ol i bin amamas long mekim pasin nogut tasol, bai ol i kisim pe nogut long kot bilong God.” (2 Tesalonaika 2:10-12, NT) Long nau pasin nogut, pasin pamuk samting, pasin giaman i pulap long graun. Bikpela lain manmeri ol i “amamas long mekim pasin nogut tasol.” Ol i no “bilipim tok tru” bambai God i kisim bek ol. (Lukim tu Esikiel 9:4-7.) Olsem na “bai ol i kisim pe nogut long kot bilong God.” Long taim bilong “bikpela hevi tru” i gat tupela rot tasol, em rot bilong laip na rot bilong bagarap.
Ranawe i Go long Kingdom Bambai Yu No Ken Bagarap
15. Tok piksa bilong “sipsip” na “meme” i tok wanem long pe olgeta lain man inap kisim?
15 Yes, “bikpela de bilong Jehova i klostu pinis. Em i kam klostu, na em i kam hariap.” (Sefanaia 1:14) Yumi stap long taim bilong kot. “olgeta lain manmeri” i bung long ai bilong Krais Jisas na em i tilim ol i stap tupela lain, olsem “ol sipsip” na “ol meme.” Baibel i kolim pe bilong ol olsem: “Ol sipsip” bai kisim “laip i stap oltaim oltaim,” na “ol meme” bai kisim “pe nogut,” bai ol i lus olgeta.—Matyu 25:31-33, 46, NT.
16, 17. (a) 2 Tesalonaika 1:6-9 i tok wanem na yumi ken save, ol manmeri strafe bilong Jehova i painim ol long taim bilong “bikpela hevi tru” ol bai lus olgeta? (b) Ol manmeri i givim hevi long lain bilong God ol bai bagarap na husat moa? Bilong wanem ol bai bagarap?
16 Taim Jehova i skelim pinis man na kolim pinis strafe bilong em, Jehova i no ken senisim tok bilong em, olsem Pol i tok: “God bai i mekim stretpela pasin olsem: Bai em i bekim hevi long ol man i save givim hevi long yupela. Na em i laik tekewe dispela hevi nau yupela i karim, na givim malolo long yupela wantaim mipela. Bai em i mekim olsem long taim Bikpela Jisas wantaim olgeta strongpela ensel bilong en i lusim heven na i kamap ples klia [apokalypsis] wantaim bikpela paia. Long dispela taim bai em i bekim pe nogut long ol man i no save long God na i no bihainim gutnius bilong Bikpela bilong yumi Jisas. Ol dispela man bai ol i kisim pe nogut olsem: Bai ol i stap longwe long pes bilong Bikpela, na long lait bilong bikpela strong bilong em, na bai ol i lus olgeta.”—2 Tesalonaika 1:6-9, NT.
17 Ol man “i givim hevi” long lain bilong God ol bai “lus olgeta,” na ol man “i no save long God” na ol man “i no bihainim gutnius” ol tu bai “lus olgeta.” Olsem wanem na ol man “i no save long God” ol i ‘no gat rot bilong haitim rong bilong ol’ na God bai bekim pe nogut long ol? Pol i stori long as bilong dispela samting long pas em i raitin long ol Rom. (Rom 1:18-20; 2:5-16) Dispela ensel Revelesen sapta 14 i stori long em, em i “flai i go namel long skai,” em i tokim “ol manmeri i stap long graun,” “taim i kamap pinis bilong God i skelim ol man long kot. Olsem na yupela i mas pret long em na litimapim nem bilong em.” Olgeta manmeri i mas “ lotu long God, em i bin wokim heven na graun na solwara.” Ol manmeri i no lotu long God, na olgeta manmeri i bilip long “wel abus” politik bilong Seten ol bai bagarap taim dispela “wel abus” i bagarap long “tang ston bilong krungutim wain,” em belhat bilong God.—Revelesen 14:6, 7, 9, 10, 14-20, NT; 19:11-21.
18. (a) Ol manmeri i laik winim dispela taim bilong bagarap, nau ol i mas mekim wanem? (b) Husat ol bai winim taim bilong bikpela hevi tru,” olsem Baibel i tok? Na bihain bai wanem gutpela samting i painim ol?
18 Olgeta manmeri i laik bai God i “haitim” ol long de bilong kros bilong Em, ol i mas “bihainim stretpela pasin na pasin daun,” na ol i mas ‘bihainim tok bilong Jehova.’ Ol i no ken toknogutim dispela tok. (Sefanaia 2:2, 3) Olgeta manmeri i laik bai dispela Jas Jehova i makim em i ken tingim ol i olsem “sipsip” na bai ol i no ken bagarap long taim bilong “bikpela hevi tru,” nau ol i mas mekim ol samting bilong makim ol i “stretpela man.” Ol i mas mekim ol wok bilong helpim lain “brata” bilong Krais ol i olsem “wokboi i gat gutpela tingting, na i save lukaut gut long wok bilong en.” (Matyu 25:33, 40, 46, NT; 24:45-47, NT) Ol “brata” bilong Krais, olsem “ol manmeri [God] i makim ol pinis” wantaim bikpela lain “sipsip” ol i save ‘lotu long God’ long olgeta taim, ol tasol inap winim taim bilong “bikpela hevi tru.” Long san na long nait, dispela ‘bikpela lain’ ol i singaut strong olsem: “God bilong yumi em i sindaun long sia king, na Pikinini Sipsip, tupela i kisim bek yumi, na nau yumi stap gut!” Ol dispela disaipel bilong Krais, ol i baptais pinis, ol i bilong “olgeta lain manmeri.” Pikinini Sipsip Krais Jisas i bringim ol i go long “hul i gat wara i kamap, na bai ol i kisim wara i gat laip,” em dispela wara i no ken pinis. “Na bai God i mekim drai wara bilong ai bilong ol, na bai ol i no krai moa.”—Matyu 24:21, 22, NT; 25:34; 28:19, 20, NT; Revelesen 7:9-17, NT.
OL ASKIM BILONG RIVYU
□ Ol misin bilong Krisendom i tok wanem long ol manmeri i dai pinis bai ol i kirap bek? Tasol dispela tok i stret wantaim tok bilong Baibel?
□ Wanem sampela tok bilong Baibel i soim yumi sampela manmeri i dai pinis ol i no ken kirap bek?
□ “Gehenna” i makim wanem samting?
□ I gat wanem samting na yumi ken save, nau long dispela taim Jehova i skelim sampela manmeri long kot na kolim strafe bilong ol na em i no ken senisim tok bilong em?
□ Wanem samting bai kamap long taim bilong “de bilong Bikpela”? Ol manmeri i bagarap long dispela taim ol inap kirap bek long bihain?
□ Nau yumi mas mekim wanem bambai yumi no ken bagarap? Olsem na i gat wanem wok yumi mas mekim hariap long nau?
[Piksa long pes 23]
Judas, “man bilong lus,” em i no ken kirap bek