Baibel i Tok Wanem?
De Bilong Kot Em Wanem Samting?
Baibel i tok God “i makim pinis wanpela de bilong em bai i kotim ol manmeri.” (Aposel 17:31) Planti man, taim ol i tingim olsem narapela bai skelim ol, ol i no amamas long dispela. Yu tu i pilim olsem?
SAPOS olsem, orait no ken tingting planti. Bel bilong yu i ken i stap isi, long wanem, long rot bilong De Bilong Kot, ol manmeri—na ol lain i dai pinis tu—ol bai kisim ol gutpela blesing. (Matyu 20:28; Jon 3:16) Tasol bilong wanem De Bilong Kot i mas kamap? Wanem samting bai kamap insait long dispela “de”?
De Bilong Kot—Bilong Wanem i Mas Kamap?
Taim God i putim ol manmeri long graun, em i no gat tingting long graun bai stap tasol olsem ples bilong redim ol man long kisim laip long heven samting, nogat. Em i wokim ol man long stap oltaim oltaim long graun. Maski namba wan man na meri i gutpela olgeta long skin na tingting, tupela i bikhet long God. Olsem na ol i lus long kisim laip oltaim long graun na ol i kamapim sin na dai long olgeta tumbuna pikinini bilong ol.—Stat 2:15-17; Rom 5:12.
De Bilong Kot em wanpela haptaim bilong 1,000 yia we ol manmeri bai i gat rot long kisim bek samting Adam na Iv i lus long kisim.a Aposel 17:31, em tok bilong en i stap antap, i tok olsem De Bilong Kot bai mekim sampela samting long ‘ol manmeri long graun.’ Ol manmeri i winim kot ol bai stap laip oltaim long graun na kisim gutpela sindaun. (KTH 21:3, 4) Olsem na De Bilong Kot bai mekim wok bilong kamapim laik bilong God long pastaim tru long ol manmeri na graun.
Jas em God i makim, em Krais Jisas. Baibel i tok Jisas bai “skelim pasin bilong olgeta manmeri i stap laip na ol manmeri i dai pinis tu.” (2 Timoti 4:1) Husat ol dispela “manmeri i stap laip” em Jisas bai skelim pasin bilong ol? Olsem wanem ol man i dai pinis bai kamap laip gen long “graun”?
Jisas i Skelim “Olgeta Manmeri i Stap Laip”
Yumi kamap klostu long pinis bilong dispela pasin bilong nau em Baibel i bin tok profet long en, em taim we God bai pinisim olgeta pasin nogut bilong graun na rausim ol man nogut. Lain i winim dispela bagarap, em dispela lain “i stap laip” em Jisas bai skelim ol.—KTH 7:9-14; 19:11-16.
Long dispela taim bilong kot bilong 1,000 yia, Krais Jisas wantaim 144,000 man na meri em ol i kirap bek na kisim laip long heven, ol bai bosim dispela graun. Ol bai stap king na pris na mekim wok long ofa bilong Jisas bilong helpim ol lain i stap gut long God long kamap gutpela olgeta long skin na tingting.—KTH 5:10; 14:1-4; 20:4-6.
Long taim bilong De Bilong Kot, Satan na ol ensel nogut bai kalabus na bai ol i no inap giamanim moa ol manmeri. (KTH 20:1-3) Tasol long pinis bilong De Bilong Kot, God bai larim Satan i traim olgeta manmeri i stap laip, em bai traim pasin bilong ol long stap gut long God. Ol manmeri i stap gut long God ol bai winim dispela traim Adam na Iv i bin pundaun long en. Kot bai tok ol inap kisim laip oltaim long Paradais i kamap bek pinis long graun. Ol manmeri i bikhet long God, ol bai bagarap na pinis olgeta, na dispela bagarap bai painim tu Satan wantaim ol ensel nogut.—KTH 20:7-9.
Skelim “Ol Manmeri i Dai Pinis”
Baibel i tok olsem long taim bilong De Bilong Kot, ol manmeri i dai pinis ol bai “sanap,” olsem kirap bek. (Matyu 12:41) Jisas i tok: “Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait. Ol manmeri i bin mekim gutpela pasin, ol bai i kirap bek na i stap laip. Na ol manmeri i bin mekim pasin nogut, ol bai i kirap bek na i kamap long kot na kot bai i tok olsem, ol i mas bagarap.” (Jon 5:28, 29) Dispela skripsa i no tok long tewel o spirit bilong man i dai pinis, nogat. Ol man i dai pinis ol i no inap save long wanpela samting—i no gat wanpela hap bilong ol i stap laip yet. (Saveman 9:5; Jon 11:11-14, 23, 24) Jisas bai kirapim bek ol daiman i slip long matmat na ol bai stap laip gen long graun.
Olsem wanem? Kot bai skelim ol long samting ol i bin mekim paslain long ol i dai? Nogat. Baibel i tok “man i dai pinis, em i no pas moa long sin.” (Rom 6:7) Olsem na wankain olsem ol lain i abrusim bagarap taim pasin bilong dispela graun i pinis, ol manmeri husat i kirap bek Jisas bai skelim ol long “pasin” ol i mekim long taim bilong De Bilong Kot. (KTH 20:12, 13) Ol samting ol i mekim taim ol i kirap bek pinis, dispela bai makim olsem ol bai stap laip oltaim oltaim, o ol i mas bagarap. Planti bilong ol husat i kisim bek laip em bai namba wan taim bilong ol long kisim save long God Jehova na ol samting em i laik bai ol i mas mekim bilong i stap laip. Bai ol i gat rot long bihainim ol pasin i stret wantaim laik bilong God na kisim laip oltaim long graun.
I No Gat As Long Pret
Dispela De Bilong Kot em wanpela taim we ol manmeri bai kisim skul i kam long God, na tu, em wanpela taim we ol bai bihainim ol tok ol i lainim na kisim ol blesing i kamap long dispela. Tingim bikpela amamas yu bai kisim taim yu bung gen wantaim famili bilong yu i kirap bek, na yupela i wok long kamap gutpela olgeta!
Long pinis bilong De Bilong Kot, God bai larim Satan i traim pasin bilong ol man long stap gut long God. Tasol i no gat as long pret o tingting planti. Long pinis bilong De Bilong Kot, olgeta manmeri i stap laip ol bai redi tru long sanap strong na winim dispela laspela traim. Olsem na De Bilong Kot em i insait long ol wok God bai mekim bilong kamapim laik bilong em long pinisim olgeta samting nogut em pasin bilong bikhet long God long gaden Iden i bin kamapim.
[Futnot]
a Long Baibel, dispela tok “de” inap makim wanpela haptaim em longpela bilong en i narapela narapela. Lukim Stat 2:4, NW.
YU LAIK SAVE?
● De Bilong Kot em wanem samting?—Aposel 17:31.
● Husat bai sanap long kot?—2 Timoti 4:1.
● De Bilong Kot em hamas yia?—KTH 20:4-6.
[Rait long pes 11]
Tingim amamas yu bai pilim taim yu bung gen wantaim famili bilong yu i kirap bek
[Ol Piksa long pes 10]
Aninit long wok king bilong Krais, ol lain i dai pinis ol bai kirap bek long wanpela paradais long graun