Yu Inap Helpim Marit Bilong Yu?

Papamama bilong haus i luksave olsem haus bilong ol i bagarap, tasol ol i tingting long stretim haus.

OLSEM WANEM? Yu laik mekim wankain pasin long marit bilong yu? Sapos olsem, yu inap mekim wanem? Traim mekim olsem.

1 Pasim tok long bel.

Wanbel wantaim poroman bilong yu olsem yutupela bai wok wantaim bilong kamapim gen bel isi insait long marit bilong yupela. Raitim long pepa ol samting yupela i laik mekim. Taim yutupela wantaim i tingting strong long stretim marit, dispela bai kamap olsem wanpela wok yutupela bai mekim wantaim.​​—⁠Saveman 4:​9, 10.

2 Luksave long hevi.

Wanem samting i mekim na marit bilong yupela i gat hevi? Long wanpela sentens, raitim wanem samting yu ting i no stret o wanem samting yu laik bai i mas senis. (Efesus 4:​22-​24) Yu ken save olsem, hevi yu yet i tingim bai i narapela kain long hevi poroman bilong yu i tingim.

3 Putim mak.

Yu laik bai marit bilong yu i stap olsem wanem bihain long 6-pela mun? Yu laik bai wanem samting i kamap gutpela moa? Raitim long pepa ol mak yu laik winim. Taim yu save stret long samting yu laik bai kamap long marit bilong yu, em bai isi moa long kamapim.​​—⁠1 Korin 9:​26.

4 Bihainim ol tok bilong Baibel.

Taim yu save pinis long hevi bilong yu na yu save long wanem samting yu laik mekim bilong stretim, skelim Baibel long kisim sampela gutpela tingting. Ol stiatok bilong en i no save senis senis, na ol i save helpim tru ol man. (Aisaia 48:17; 2 Timoti 3:17) Olsem: Baibel i kirapim yu na poroman bilong yu long lusim rong. Tru tumas, Baibel i tok, em i gutpela samting tru sapos yu ‘no tingim rong narapela i mekim long yu.’​—⁠Sindaun 19:11; Efesus 4:⁠32.

Maski pastaim yu ting hatwok bilong yu i no karim kaikai, no ken givap! Buk The Case for Marriage i stori long ol gutpela samting i kamap long wanpela wok painimaut, buk i tok: “Mipela i kirap nogut long samting mipela i painimaut, olsem: Long ol marit i no amamas, tasol ol i no katim marit maski ol i gat hevi, inap 86 pesen bilong ol i kisim save olsem inap 5-pela yia bihain marit bilong ol i kamap gutpela moa.” Sampela marit em ol i tok ol i bin bel hevi tru, marit bilong ol i kamap gutpela gen.

Ating wankain samting inap kamap long yu. Ol lain i kamapim dispela nius, ol Witnes Bilong Jehova, ol i kisim save olsem Baibel i kamapim ol gutpela stiatok bilong helpim ol marit. Olsem, planti marit i kamap gutpela moa taim narapela i mekim gutpela pasin sori long narapela na redi long lusim rong bilong narapela. Ol meri i kisim save pinis long ol gutpela samting i kamap taim ol i mekim pasin isi, na ol man i bin luksave olsem taim ol i mekim gut bel bilong ol meri, ol i stap gut.​—⁠1 Pita 3:4; Kolosi 3:⁠19.

Ol dispela stiatok bilong Baibel i save kamapim gutpela samting, long wanem, Man i bin kamapim Baibel, em God Jehova, em i As bilong marit. Yu ken askim ol Witnes Bilong Jehova long kisim sampela save moa long olsem wanem Baibel inap helpim marit bilong yu.a

[Futnot]