Baibel i Tok Wanem Long Marit?

Bekim bilong Baibel

Bihain long God i wokim namba wan man na meri, em i bringim meri i go long man na tupela i marit. God i kamapim marit olsem spesel samting i pasim man na meri wantaim, na insait long dispela famili, tupela na ol pikinini ol bai kamapim bihain i ken stap gut wantaim.—Stat 1:27, 28; 2:18.

God i laik bai ol marit i stap amamas. (Provep 5:18) Long Baibel, em i putim ol lo bilong marit, na tu, ol stiatok bilong helpim ol marit long stap gut.

Long dispela atikol

• God i putim wanem ol lo bilong marit?

• Olsem wanem long pasin bilong seperet na divos?

• Olsem wanem? Ol marit i mas rejistaim marit bilong ol bambai God i ken orait long en?

• Baibel i kolim wanem ol wok bilong ol man marit na ol meri marit?

• Yu ting God i laik bai ol marit long nau i mas kamapim ol pikinini?

• Olsem wanem Baibel inap helpim marit bilong mi?

• Ol ves bilong Baibel i stori long marit

God i putim wanem ol lo bilong marit?

Kirap long namba wan taim, God i kamapim marit bambai wanpela man na wanpela meri i ken pas wantaim na kamap wanpela bodi. (Stat 2:24) God i no orait long pasin bilong maritim planti meri, man i maritim man o meri i maritim meri, o man na meri i sindaun nating wantaim na i no marit tru. (1 Tesalonaika 4:3) Jisas i tokim ol disaipel bilong em long bihainim lo bilong marit em God i bin putim long namba wan taim.—Mak 10:6-8.

Long ai bilong God, marit i bilong stap oltaim. Taim man na meri i marit, ol i tok promis long stap gut long narapela narapela na stap wantaim long taim tupela wantaim i stap laip yet. God i laik bai tupela i inapim dispela tok promis.—Mak 10:9.

Olsem wanem long pasin bilong seperet na divos?

Ating i gat sampela taim we man marit o meri marit i mas lusim poroman marit na i go, olsem long taim wanpela bikpela hevi i kamap insait long famili bilong em. Tasol Baibel i no orait long pasin bilong seperet bikos long ol hevi i kamap insait long marit, nogat. Baibel i tokim ol marit long stretim hevi i kamap insait long marit na mekim ol samting bilong stap wanbel wantaim.—1 Korin 7:10.

Baibel i tok orait long tupela marit i divos sapos wanpela bilong tupela i mekim pasin adaltri. (Matyu 19:9) Tasol sapos tupela marit i tingting long seperet o divos bikos long narapela risen na i no pasin adaltri, orait Baibel i no orait long tupela i ken prenim o maritim narapela man o meri.—Matyu 5:32; 1 Korin 7:11.

Olsem wanem? Ol marit i mas rejistaim marit bilong ol bambai God i ken orait long en?

God i laik bai ol Kristen i bihainim ol lo bilong gavman long sait bilong marit. (Taitus 3:1) Sapos ol marit inap rejistaim marit bilong ol long gavman, na ol i mekim olsem, ol i soim rispek long ol gavman na lo bilong God olsem marit em samting bilong i stap oltaim.a

Baibel i kolim wanem ol wok bilong ol man marit na ol meri marit?

• Ol i wok wantaim long mekim ol wok. Man marit na meri marit i mas mekim pasin laikim na rispektim narapela narapela. (Efesus 5:33) Ol i mas mekim pasin laikim taim ol i tingim laik bilong narapela narapela long mekim maritpasin, na sakim olgeta kain pasin bilong i no stap gut long poroman marit. (1 Korin 7:3; Hibru 13:4) Sapos ol i gat ol pikinini, man na meri wantaim i gat wok long mekim bikpela long ol.—Provep 6:20.

  

  Baibel i no stori long olgeta liklik samting em tupela marit i mas mekim long sait bilong wok mani na ol wok bilong haus. Ol i ken toktok wantaim na makim wanem ol samting i gutpela bilong helpim famili bilong ol.

• Wok bilong man marit. Baibel i tok “maritman em i stap het bilong meri bilong em.” (Efesus 5:23) Em i stap olsem het bilong famili so em i mas stiaim ol na mekim ol disisen we bai helpim meri na ol pikinini bilong em.

  

  Em i mas mekim ol samting na bai famili i stap helti, amamas, na pas gut wantaim God. (1 Timoti 5:8) Em i soim olsem em i tingim ol gutpela pasin bilong meri bilong em na wok gut wantaim em, na tingim gut tingting na ol filings bilong meri taim em i mekim ol disisen. (Provep 31:11, 28) Baibel i tok olsem man marit i mas tingim ol wok bilong em na mekim long pasin laikim.—Kolosi 3:19.

• Wok bilong meri marit. Baibel i tok “maritmeri i mas i gat bikpela rispek long man bilong em.” (Efesus 5:33) God i amamas taim meri i rispektim wok God i givim long man bilong em.

  

  Wok bilong meri em long sapotim man bilong em, helpim em long mekim ol gutpela disisen na sapotim wok bilong man olsem het bilong famili. (Stat 2:18) Baibel i mekim gutpela tok long meri husat i mekim gut wok bilong em insait long marit.—Provep 31:10.

Yu ting God i laik bai ol marit long nau i mas kamapim ol pikinini?

Nogat. Long bipo, God i tokim sampela bilong ol manmeri i lotuim em long kamapim ol pikinini. (Stat 1:28; 9:1) Tasol ol Kristen i no gat wok long bihainim dispela tok. Jisas i no tokim ol disaipel bilong em long kamapim ol pikinini. Na tu, ol disaipel bilong em long bipo i no tok ol marit i mas kamapim ol pikinini, nogat. Ol marit yet i ken skelim olsem ol bai kamapim ol pikinini o nogat.

Olsem wanem Baibel inap helpim marit bilong mi?

Baibel i gat ol stiatok we inap helpim man na meri taim ol marit. Ol stiatok bilong Baibel inap helpim tu ol marit long abrusim o winim ol hevi.

Ol stiatok bilong Baibel inap helpim ol marit long . . .

• soim pasin laikim tru.—1 Korin 13:4-7; Kolosi 3:14.

• tingim ol samting bilong helpim narapela narapela.—1 Korin 10:24.

• putim gut yau.—Jems 1:19.

• soim pasin rispek.—Rom 12:10.

• redi long fogivim narapela narapela.—1 Pita 4:8.

• stap gut long narapela narapela.—Mak 10:9.

• no ken les kwik.—Efesus 4:2, 3.

• wok wantaim olsem wanpela tim—Eklisiastis 4:9.

• strongim tok promis bilong ol.—Solomon 8:7.