Rot Bilong Mekim Marit i Wok Gut

‘Man husat i bin wokim ol long pastaim tru, em i bin wokim ol i kamap man na meri. Na ating yupela i no bin ritim tok bilong em olsem: “Long dispela as man bai lusim papa na mama bilong en na pas wantaim meri bilong en, na tupela bai kamap wanpela bodi.” Olsem na samting God i pasim pinis, man i no ken katim.’—Em tok bilong Jisas Krais long Matyu 19:4-6.

LONG taim bilong yumi, tingting bilong ol man long stretpela pasin i wok long senis, olsem na ol i no tingim moa olsem marit i bikpela samting. Planti marit i seperet o divos taim poroman i no gat gutpela skin moa o taim ol hevi i kamap, na sampela taim ol dispela hevi i no bikpela tumas. Sori tru, planti taim i gat ol pikinini em bel na tingting bilong ol i bagarap tru bikos marit bilong papamama i bruk.

Ol Kristen i no kirap nogut long dispela samting. Baibel i tok profet olsem long “taim bilong las de” em nau yumi stap long en, planti man bai i nogat ol pasin we inap helpim famili long pas gut wantaim—olsem pasin bilong stap gut long narapela, laikim tru narapela, na laikim ol wanfamili. (2 Timoti 3:1-5) Planti man i no ting ol dispela pasin i bikpela samting. Olsem wanem? Yu tingting planti long dispela na ol hevi dispela i save kamapim long ol famili? Yu tingim marit olsem wanpela bikpela samting?

Sapos olsem, Baibel inap mekim gut bel bilong yu, long wanem, ol skultok bilong en i wok yet long helpim planti marit. Olsem, tingim 5-pela stiatok we inap helpim tru marit.a

Faivpela Rot Bilong Mekim Marit i Wok Gut

(1) Tingim Marit i Samting Holi. Olsem tok bilong Jisas long han kais i soim, em na Krieta bilong yumi, God Jehova, i tingim marit i samting holi. Dispela i kamap ples klia long strongpela tok kaunsel God i bin givim long sampela man long bipo. Ol i bin divosim meri bilong ol bambai ol i ken maritim ol yangpela meri. God i tok: “Yupela i brukim promis yupela i bin mekim long ol meri yupela i bin maritim taim yupela i yangpela yet. Ol meri i poroman bilong yupela na yupela i bin promis long ai bilong God bai yupela i no ken lusim ol. Tasol yupela i brukim dispela promis.” Na bihain Jehova i mekim dispela strongpela tok: ‘Mi no laik bai wanpela bilong yupela i bihainim pasin bilong mekim nogut long meri bilong yupela.’ (Malakai 2:14-16) Tru tumas, God i tingim marit olsem wanpela bikpela samting; em i save lukim pasin em maritman na maritmeri i mekim long narapela narapela.

(2) Mekim gut wok bilong yu olsem maritman. Taim sampela bikpela samting i kamap insait long famili, wanpela i mas wokim disisen. Baibel i givim dispela wok long maritman. Efesus 5:23 i tok: “Maritman em i stap het bilong meri bilong en.” Tasol dispela i no makim olsem man i ken mekim hatpela pasin. Maritman i mas tingim olsem em na meri bilong em i kamap “wanpela bodi,” na em i mas givim ona long meri na kisim tingting bilong em long ol samting bilong famili. (1 Pita 3:7) Baibel i tok “ol maritman i mas laikim meri bilong ol olsem ol i laikim bodi bilong ol yet.”—Efesus 5:28.

(3) Maritmeri sapotim man bilong yu. Baibel i tok meri em i “poroman” bilong man bilong em. (Stat 2:18) Olsem na em i gat ol gutpela pasin we inap helpim gut marit. Olsem wanpela poroman, meri i no resis wantaim man, nogat, em i sapotim em gut na dispela i kamapim bel isi insait long famili. Efesus 5:22 i tok: “Ol maritmeri i mas daun long man bilong ol.” Tasol olsem wanem sapos meri i no wanbel wantaim man long sampela samting? Long kain taim olsem, em i no ken pret long kamapim tingting bilong em, tasol em i mas mekim long pasin i soim ona na rispek, em kain pasin meri tu i laik bai man i mekim long em.

(4) Kisim stretpela tingting, na tingim olsem bai i gat ol hatwok. Ol samting inap givim hatwok long marit, olsem poroman i no tingting gut na mekim tok, hevi bilong mani, bikpela sik, o presa bilong mekim bikpela long ol pikinini. Olsem na Baibel i tok stret olsem ol lain husat i marit “ol bai karim pen na hevi long bodi bilong ol.” (1 Korin 7:28) Tasol i no olsem ol hevi na traim i mas nogutim marit, nogat, taim tupela marit i laikim tru narapela narapela na ol i gat savetingting i kam long God, ol i gat rot long stretim ol hevi. Olsem wanem? Yu gat savetingting bilong helpim yu long karim ol hevi we inap kamap insait long famili bilong yu? Baibel i tok: “Sapos wanpela bilong yupela i sot long savetingting, orait em i mas wok long askim God, na God bai givim long em. Long wanem, God i save amamas long givim planti samting long ol man na em i no save krosim ol taim em i mekim olsem.”—Jems 1:5.

(5) Stap gut long poroman marit. Pasin pamuk, olsem slip wantaim wanpela i no poroman marit bilong yu, i wanpela samting i save givim bikpela hevi tru long marit. Dispela pasin tasol i as bilong divos em God i orait long en. (Matyu 19:9) Baibel i tok: “Olgeta manmeri i mas tingim marit olsem samting i dia tumas. Marit i mas i stap klin, long wanem, God bai kotim ol man i mekim pasin pamuk na pasin adaltri.” (Hibru 13:4) Ol marit inap mekim wanem na bai ol i no painim narapela man o meri bilong inapim laik bilong ol long mekim maritpasin? Baibel i tok: “Maritman i mas givim long meri bilong en ol samting i stret meri i kisim. Na maritmeri i mas mekim wankain pasin long man bilong en.”—1 Korin 7:3, 4.

Ating sampela i ting ol dispela 5-pela poin em ol tingting bilong ol man long bipo. Tasol planti i luksave olsem taim ol i bihainim ol dispela tok, dispela i helpim ol long nau tu. Ol gutpela samting i save painim man husat i larim God i stiaim olgeta wokabaut bilong em. Baibel i tok: “Dispela man i olsem diwai ol man i bin planim klostu long wara. Em i save karim kaikai long taim bilong em stret, na lip bilong en i no save drai. Olgeta samting em i mekim i save kamap gutpela.” (Song 1:2, 3) Em nau, pasin bilong bihainim skultok i kam long God bai helpim marit long kamap gutpela.

[Futnot]

YU LAIK SAVE?

● God i gat wanem tingting long divos?—Malakai 2:14-16.

● Maritman i mas mekim wanem kain pasin long meri bilong em?—Efesus 5:23, 28.

● Savetingting bilong husat inap helpim marit long kamap gutpela?—Song 1:2, 3.