Wok Long Strongim Marit na Bai i Stap Oltaim
“Samting God i pasim pinis, em man i no ken katim.”—MATYU 19:6.
PLANTI tausen marit namel long lain bilong Jehova long nau ol i stap amamas na marit bilong ol i stap strong. Tasol dispela i no save kamap nating. Marit bilong ol Kristen i save kamap strong taim tupela wantaim (1) i daun long tingting bilong God long marit, na (2) tupela i wok strong long bihainim ol lo bilong God long Baibel. Dispela i stret, long wanem, God yet i bin kamapim marit long pastaim tru. Em yet i bin “givim nem long olgeta . . . lain.” (Efesus 3:14, 15) Jehova i save long ol samting inap strongim marit, olsem na sapos yumi bihainim ol tok bilong em long marit, dispela bai helpim yumi.—Aisaia 48:17.
2 Tasol sapos tupela marit i no bihainim ol lo bilong Baibel long marit, bai bikpela hevi i kamap namel long tupela. Sampela saveman i ting, long olgeta 10-pela marit long Amerika long nau, inap olsem 7-pela bai i katim marit long bihain. Na hevi inap kamap namel long ol marit Kristen tu, long wanem, nau yumi stap long taim bilong “planti hevi nogut tru.” (2 Timoti 3:1) Ol hevi bilong mani na hevi i kamap long ples wok inap long nogutim marit bilong yumi. Sampela Kristen i bel hevi tru long poroman marit bilong ol i no bihainim ol lo bilong Baibel long marit. Wanpela meri Kristen i tok: “Mi laikim tru Jehova, tasol inap 20 yia pinis mi gat planti hevi tru long marit bilong mi. Man bilong mi i save tingim em yet tasol na em i no laik senisim pasin bilong em. Mi pilim olsem mi kalabus tru!” Planti manmeri ol i mekim wankain tok. Wanem samting i mekim na ol dispela hevi i kamap? Wanem samting inap helpim ol marit na narapela i no ken givim baksait long narapela na pasin birua i no ken kamap namel long tupela?
Marit i Bilong Stap Oltaim
3 Yumi save, ol man na meri marit wantaim ol i no gutpela olgeta—ol i gat sin. (Lo 32:5) Olsem na aposel Pol i tok: “Ol manmeri i marit bai i painim planti hevi long laip bilong ol.” (1 Korin 7:28) Sampela taim bikpela hevi tru i kamap insait long marit na ol i bruk o katim marit. (Matyu 19:9; 1 Korin 7:12-15) Tasol planti marit Kristen ol i save bihainim tok bilong Pol, em i tok: “Meri i no ken lusim man bilong en. . . . Na man tu em i no ken rausim meri bilong en.” (1 Korin 7:10, 11) Yumi save, em laik bilong God long tupela marit i ken stap wantaim inap long olgeta taim, long wanem, Krais Jisas i tok: “Samting God i pasim pinis, em man i no ken katim.”—Matyu 19:6.
4 Sapos wanpela i pilim olsem em i kalabus insait long marit i gat kros pait o i no gat pasin sori long en, ating em bai ting lo bilong Jehova i strong tumas na i no stret. Tasol nogat. Taim tupela marit i daun long God na ol i save, marit i bilong i stap oltaim, dispela bai kirapim tupela long painim rot bilong stretim ol hevi bilong tupela. Taim wanpela hevi i kamap, tupela i no kirap tasol na brukim marit. Wanpela man em i marit pinis inap 20 yia samting, na em i tok: “Yu no inap abrusim ol hevi. Na yu no ken ting, narapela bai amamas long narapela long olgeta taim. Orait, long kain taim olsem, em bikpela samting tru long tupela i mas tingim ol wok bilong tupela insait long marit.” Na ol marit Kristen i mas tingim namba wan wok bilong ol, em bilong bihainim ol lo bilong Jehova, em i As bilong marit.—Lukim Saveman 5:4.
Wok Bos na Daun Long Man
5 Olsem na taim sampela hevi i kamap, yumi no ken painim rot bilong ranawe long hevi—yumi mas painim rot bilong bihainim ol tok i stap long Baibel. Tingim tok bilong Pol i stap long Efesus 5:22-25, 28, 29: “Yupela meri, yupela i mas aninit long ol man bilong yupela, . . . long wanem, man em i het bilong meri bilong en, olsem Krais em i het bilong sios. . . . Sios em i stap aninit long Krais. Olsem tasol yupela meri tu, oltaim yupela i mas aninit long ol man bilong yupela. . . . Yupela man, yupela i mas laikim tru ol meri bilong yupela, olsem yupela i save laikim bodi bilong yupela yet. Man i laikim tru meri bilong en, em i laikim tru em yet. Yumi save, i no gat wanpela man i save birua long bodi bilong em yet. Nogat. Em i save givim kaikai long en na lukautim gut, olsem Krais i save mekim long sios.”
6 Planti man ol i bin mekim nabaut long wok bos bilong ol insait long marit, na ol i bosim strong meri bilong ol. (Stat 3:16) Tasol Pol i tokim ol man marit bilong lain Kristen, ol i mas i stap narapela kain long ol man bilong graun—ol i mas bihainim pasin bilong Krais na no ken bosim strong olgeta liklik samting meri bilong ol i mekim. Krais Jisas i no bin mekim hatpela pasin na bosim strong lain bilong em. Em i mekim gutpela pasin long ol. Em i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, . . . long wanem, mi save mekim pasin isi long ol man na mi save daunim mi yet.”—Matyu 11:28, 29.
7 Man Kristen i save mekim gut long meri bilong em, long wanem, skin bilong meri i no strong tumas. (1 Pita 3:7) Olsem: Sapos meri i mas mekim wok mani, man bai tingim dispela na em bai helpim gut meri na tingim em. Planti meri i bin tok, wanpela bikpela as na ol i laik katim marit, em man i no bin mekim gut wok bilong em long ol pikinini o long haus. Olsem na man Kristen i save helpim gut meri bilong em long haus na bai ol dispela wok i helpim olgeta wan wan long famili.
8 Sapos man i mekim gutpela pasin long meri bilong em, bai i no hatwok long meri Kristen i daun long man bilong em. Tasol i no olsem meri em i wanpela wokmeri nating. God i no tok olsem. Em i tok, meri i mas i stap olsem “helpim” bilong man bilong em, olsem gutpela samting bilong man. (Stat 2:18) Na Malakai 2:14 i tok, meri em i “poroman” bilong man bilong em. Olsem na long taim bilong Baibel, ol man i save larim meri bilong ol i mekim planti wok long save bilong ol yet. Baibel i stori long “hapmeri” bilong wok, olsem: “Man bilong dispela kain meri i save gut long meri i bihainim gutpela pasin oltaim.” Man i save larim em i bosim planti wok, olsem ol wok bilong haus, na wok bilong baim ol kaikai, na lukluk gut long wanpela hap graun em i laik baim, na bosim wanpela liklik bisnis.—Sindaun 31:10-31.
9 Tasol meri i pret long God, em i save man i bos bilong em. Sara i bin bihainim tok bilong Abraham na i kolim em “bikman.” Dispela i kamapim bel bilong Sara, em i daun long man bilong em. (1 Pita 3:6; Stat 18:12) Na Sara i orait long lusim gutpela sindaun bilong em long biktaun Ur na em i sindaun long ol haus sel wantaim man bilong em. (Hibru 11:8, 9) Tasol sapos meri i lukim olsem em i mas mekim wanpela samting, i no olsem em i no ken mekim. Taim Moses i no bihainim lo bilong God long katim skin, meri bilong em, Sipora, i kirap na mekim wanpela samting. Olsem na Moses i abrusim bagarap. (Kisim Bek 4:24-26) Meri marit i no ken tingting tasol long amamasim wanpela man i no gutpela olgeta. Ol meri i mas ‘aninit long man bilong ol, olsem ol i save aninit long Bikpela.’ (Efesus 5:22) Taim meri Kristen i tingting long i stap gut long ai bilong God, dispela bai helpim em long lusim tingting long ol liklik popaia bilong man, na man tu i mas mekim olsem long meri.
Toktok Gut Wantaim—Em i Save Strongim Marit
10 Ol i bin askim wanpela man bilong haus kot, wanem wanpela bikpela as na ol marit i katim marit. Em i tok: “Ol i no toktok gut wantaim na kamapim tru bel bilong ol na mekim gut long poroman olsem em i nambawan pren bilong ol.” Tru tumas, pasin bilong toktok gut wantaim em i nambawan samting bilong strongim marit. Olsem Baibel i tok, “Sapos yu laik mekim sampela wok, orait pastaim yu mas kisim tingting long planti arapela man.” (Sindaun 15:22) Man na meri bilong em i mas i stap olsem tupela gutpela pren i save toktok gut wantaim. (Sindaun 2:17) Tasol planti marit i hatwok tru long toktok gut wantaim, olsem na isi isi narapela i bel nogut long narapela, na bihain bikpela kros pait i kamap. Na sampela marit i mekim olsem ol i stap gut wantaim, tasol long bel bilong ol ol i stap longwe long poroman bilong ol.
11 Wanpela as bilong en i olsem: Planti meri ol i laik kamapim bel bilong ol, tasol ol man i laik toktok long dispela hevi stret i bin kamap. Ol meri i save mekim pasin sori na ol i laik mekim gut bel bilong narapela, tasol ol man i laik toktok long rot bilong stretim hevi. Tasol ol marit inap toktok gut wantaim sapos tupela wantaim i ‘putim yau kwik long harim tok, tasol ol i no ken hariap long mekim toktok, na no ken kros kwik.’ (Jems 1:19) Lukluk long ai bilong narapela na putim gut yau long tok bilong em. Mekim sampela gutpela askim bilong helpim em long kamapim bel bilong em. (Lukim 1 Samuel 1:8; Sindaun 20:5.) Sapos poroman i kamapim wanpela hevi, no ken kirap na tokim em long rot bilong stretim hariap—harim gut tok bilong em na toktok wantaim long gutpela rot bilong stretim dispela hevi. Na long pasin daun, beten wantaim na askim God long givim sampela tingting long yupela.—Song 65:2; Rom 12:12.
12 Sampela taim ol wok na hevi bilong graun i mekim na ol marit i no gat taim o strong bilong toktok gut wantaim. Tasol bilong helpim marit bilong ol long i stap gutpela na i no gat wanpela samting i bagarapim, ol marit Kristen i mas pas gut wantaim. Ol i mas tingim marit bilong ol i wanpela gutpela samting tru, na ol i mas lusim sampela wok samting bambai ol i gat taim bilong strongim marit. (Lukim Kolosi 4:5.) Sampela taim, sapos ol i pasim televisen ol i gat taim bilong toktok gut wantaim. Na tupela i ken sindaun wantaim na dring ti o kopi samting, na dispela bai helpim tupela long pas gut wantaim. Long kain taim olsem, ol i ken toktok long sampela samting bilong famili. (Sindaun 13:10) Na i gutpela tu long toktok wantaim long ol liklik samting i skrapim bel bilong poroman o sampela liklik kros, nogut ol dispela samting i kamap olsem wanpela bikpela hevi tru namel long tupela.—Lukim Matyu 5:23, 24; Efesus 4:26.
13 Wanpela man i tokaut olsem: “Mi save hatwok long kamapim tingting bilong mi long [meri bilong mi].” Tasol pasin bilong kamapim tingting i bikpela samting bilong helpim tupela marit long pas gut wantaim. Jisas i bin kamapim tru tingting bilong em long dispela lain ol bai kamap olsem meri bilong em. Em i tok: “Olgeta tok mi harim long Papa bilong mi, em mi tokim yupela pinis. Olsem na mi kolim yupela ‘pren.’ ” (Jon 15:15) Olsem na tingim poroman bilong yu i olsem pren bilong yu. Yu mas bilip long poroman na kamapim ol tingting i stap long bel bilong yu. Mekim ‘switpela tok’ long em na bai em i ken pilim olsem yu laikim em. (Solomon 1:2) Tru, sampela taim i hatwok long kamapim ol tingting bilong bel, tasol sapos tupela marit i wok strong long mekim olsem, dispela inap strongim marit na tupela bai pas gut wantaim inap long olgeta taim bihain.
Bilong Stretim Kros
14 Sampela taim ol liklik kros bai kamap namel long tupela marit. Tasol nogut haus bilong yu i kamap olsem ‘haus bilong kros na pait.’ (Sindaun 17:1) Na was gut—i gat sampela hevi o kros i no gutpela long toktok long en taim ol pikinini inap harim, nogut dispela i bagarapim bel bilong poroman. Wanpela taim Resel i kamapim bel hevi bilong em long em i no inap karim pikinini, na em i tokim Jekop long givim pikinini long en. Tasol Jekop i kros na i tok: “Mi no God na bai mi givim pikinini long yu.” (Stat 30:1, 2) Sapos wanpela hevi i kamap, tok bilong yu i mas sutim dispela hevi—em i no ken sutim poroman. Na yu no ken mekim ‘tok i bagarapim bel’ bilong poroman o katim tok bilong em.—Sindaun 12:18.
15 Tru, ating yu strong long kamapim tingting bilong yu, tasol taim yu kamapim, yu no ken “bel nogut na kros na belhat na bikmaus na tok bilas.” (Efesus 4:31) Wanpela man marit i tok: “Taim yutupela i toktok long wanpela hevi, toktok gut. Sapos wanpela i kros na bikmaus, no ken toktok moa. Bihain liklik yu ken kam bek na traim gen.” Sindaun 17:14 i tok: “Lusim dispela pasin na i no gat bikpela kros i ken kamap.” Taim bel i kol pinis, yupela ken toktok gen long dispela hevi.
Stap Gut Long Poroman
16 Hibru 13:4 i tok: “Yupela ol marit i mas lukautim gut marit bilong yupela, bai em i stap klin tru long ai bilong God. Yupela i save, God bai i bekim pe nogut long ol manmeri i . . . pamuk.” Pasin pamuk i rongim God na i bagarapim marit. (Stat 39:9) Wanpela man bilong givim tok long ol marit em i tok: ‘Taim wanpela marit i pamuk na dispela i kamap ples klia, em i olsem bikpela win saiklon i bagarapim ol haus—em i save bagarapim famili olgeta na famili i no bilip moa long dispela poroman.’ Ating bai em i gat bel o em i kisim sik nogut bilong pamuk.
17 Sampela i kaunim o lukim ol samting bilong maritpasin long ol buk na televisen na piksa wokabaut, na ol i kisim tingting long mekim pasin pamuk. (Galesia 6:8) Tasol sampela saveman i tok, planti ol i save pamuk, long wanem, ol i laik ting olsem skin bilong ol i gutpela yet, o ol i laik pilim olsem wanpela i laikim em, na i no olsem bel i gat laik long mekim maritpasin. (Lukim Sindaun 7:18.) Tasol maski i gat wanem as bilong en, Kristen i mas rausim ol dispela tingting bilong pamuk. Kamapim bel bilong yu long poroman bilong yu. Sapos yu no inap daunim dispela tingting, orait askim ol elda bilong kongrigesen long helpim yu. Sapos yu mekim olsem, ating bai yu no ken pundaun na mekim rong. Na ol man Kristen i mas was gut taim ol i stap wantaim wanpela meri, na meri Kristen tu i mas was gut olsem. Sapos wanpela i marit na bel i kirap na em i aigris long narapela i no poroman bilong em, dispela i no stret long lo bilong Baibel. (Jop 31:1; Matyu 5:28) Na man Kristen i mas was gut long ples wok, nogut em i kirap laikim wanpela meri wanwok; na meri Kristen tu i mas was gut long dispela pasin. Ol i mas i stap longwe liklik long ol dispela wanwok.
18 Tupela marit i mas pas gut wantaim na toktok wantaim. Planti saveman i tok, ol hevi bilong maritpasin i save kamap taim tupela marit i no toktok gut wantaim na kamapim bel bilong ol. Tasol dispela kain hevi i no save kamap tumas taim tupela i toktok gut wantaim na ol i mekim maritpasin bilong kamapim bel bilong ol olsem ol i laikim tru poroman, na i no olsem ol i mas mekim.a Long ol kain marit olsem, maritpasin inap strongim marit bilong ol.—1 Korin 7:2-5; 10:24.
19 Pasin bilong laikim tru ol narapela em i save mekim ol manmeri bilong kongrigesen Kristen long pas gut wantaim. Sapos ol marit Kristen i kisim dispela pasin, tupela inap ‘karim hevi na lusim sin bilong narapela.’ (Kolosi 3:13, 14) Man i givim bel long ol narapela, em i save painim rot bilong helpim ol. (1 Korin 13:4-8) Kisim dispela pasin bilong laikim tru narapela. Em bai helpim yu long strongim marit bilong yu. Bihainim ol lo bilong Baibel insait long marit. Olsem bai marit bilong yu i stap oltaim na i litimapim nem bilong God.
[Ol Futnot]
a Wanpela stori long Wastaua bilong Ogas 1, 1993, nem bilong en “Toktok Gut Wantaim,” em inap helpim ol marit long winim dispela kain hevi.
Bai Yu Bekim Olsem Wanem?
◻ Bilong wanem marit i bilong i stap oltaim?
◻ Baibel i tok wanem long wok bos insait long marit na meri i daun long man?
◻ Ol marit i ken mekim wanem bilong toktok gut wantaim?
◻ Taim kros i kamap namel long tupela marit, ol i ken mekim wanem bilong stretim long pasin Kristen?
◻ Wanem samting bai helpim tupela long strongim marit?
[Askim Bilong Stadi]
1. Namel long ol Kristen tru long nau, wanem samting i save mekim na marit bilong ol inap i stap strong?
2. Wanem ol samting inap kamap taim ol marit i no bihainim ol lo bilong Baibel insait long marit?
3, 4. (a) Wanem lo bilong God long marit? (b) Marit i bilong i stap oltaim, na olsem wanem dispela i stret na i save helpim gut ol marit?
5. Wanem sampela tok bilong Pol long helpim ol man marit na meri bilong ol?
6. Olsem wanem ol man marit bilong lain Kristen i ken i stap narapela kain long ol man bilong graun?
7. Olsem wanem man marit i ken mekim gut long meri bilong em taim meri i mas mekim wok mani?
8. Ol meri Kristen i mas mekim wanem bilong i stap daun long man bilong ol?
9. (a) Long taim bilong Baibel ol meri i pret long God ol i mekim wanem bilong kamapim bel bilong ol, ol i daun long man bilong ol? (b) Long nau wanem samting inap helpim meri Kristen long i stap daun long man bilong em?
10. Insait long marit, pasin bilong toktok gut wantaim em i bikpela samting olsem wanem?
11. Man na meri marit i ken mekim wanem na bai tupela inap toktok gut wantaim?
12. Olsem wanem ol marit Kristen i ken painim taim bilong sindaun na toktok gut wantaim?
13. (a) Olsem wanem Jisas i stap olsem gutpela piksa bilong kamapim olgeta tingting bilong bel na i no haitim sampela tingting? (b) Wanem sampela rot bilong helpim tupela marit long pas gut wantaim?
14, 15. Olsem wanem ol marit i ken abrusim pasin bilong tok kros?
16. Olsem wanem pasin pamuk em i bikpela rong tru insait long marit?
17. Olsem wanem ol marit i ken abrusim o sakim ol tingting bilong pamuk?
18. Planti taim i gat wanem as bilong ol hevi bilong maritpasin insait long marit? Ol marit i ken mekim wanem bilong stretim ol dispela hevi?
19. Wanem samting i save mekim ol man i ‘pas gut wantaim’? Dispela inap mekim wanem long marit bilong yu?
[Piksa long pes 12]
Sapos meri Kristen i mas mekim wok mani, man bilong em bilong lain Kristen i no ken larim em i mekim planti wok tumas insait long haus