Ol Witnes Bilong Jehova Long Olgeta Hap—Kalombia

KALOMBIA em i narapela kain kantri long Saut Amerika. Biksolwara Atlantik na Pasifik i wasim nambis bilong dispela kantri i gat planti maunten i paia. Long nambis na long ol ples stret, ples i hat, tasol antap long ol maunten Andis i gat ais na i kol.a

I gat planti gol na ston emeral long Kalombia, tasol gutpela samting tru bilong en em ol manmeri. Long nau Jehova i pulimapim ol gutpela samting long haus bilong em bilong spirit​—⁠ol gutpela manmeri bilong olgeta hap bilong graun, bilong Kalombia tu, ol i kam long en.​—⁠Hagai 2:⁠7.

Ol Bisnisman i Pilim

Long Sande, Novemba 1, 1992, ol i opim nupela haus brens na haus faktori long Fakatativa, em i stap longwe long biktaun Bogota inap 42 kilomita long not-wes. Ol man i kam lukim brens i pilim tru ol samting ol i lukim. Wanpela bilong ol i go bek long faktori em i wok long en na tokim ol bos bilong em, ol i mas i go lukim dispela oganaisesen ‘i bosim gut wok, na wok stret, na ol wokboi bilong en i stap amamas.’ Taim ol dispela bisnisman i go lukim, ol i kirap nogut na mekim planti askim.

Ol i laik salim ol manesa, na supavaisa, na bosboi, na olgeta wokman long faktori bilong ol i go lukim brens. Long olgeta wik ol i salim 15 inap 25 wokman i go lukim dispela lain i wok stret na mekim gut wok, inap long olgeta 1,300 i bin lukim.

Planti handet wokman bilong ol i bin lukim haus brens na haus faktori na lukim ol brata i wok olsem wanem, na ol i bin lukim video, nem bilong en Jehovah’s Witnesses​—⁠The Organization Behind the Name. Ol i kirap nogut long oganaisesen i bikpela tru, na ol i autim tok bilong Kingdom long olgeta hap bilong graun, na mekim bikpela wok long kain kain masin bilong wokim ol buk samting. Taim ol i lusim brens, ol brata i harim planti ol i tok ol i pilim olsem ‘ol i lusim Paradais na go bek long ples bilong mekim nabaut.’

Olgeta Kain Man i Harim Tok i Tru

Olgeta kain man i harim tok bilong Kingdom. (1 Timoti 2:​3, 4) Olsem: Wanpela man bipo em i raitim musik na bosim ben i wokim musik hevi-metal, em i harim tok i tru bilong Baibel, na em i bilip, na stretim pasin bilong em, na bihain em i kirap mekim wok painia oltaim. Bihain moa em i kamap wokman bilong kongrigesen. Sampela man bipo ol i insait long ol lain i pait long gavman, nau ol i bilip na wetim Kingdom bilong Jehova, na ol i wok strong long autim tok long nupela taim na gutaim bai kamap.

Sampela man bipo ol i kisim drak o maketim drak long pasin hait, nau ol i bilip long tok i tru. Wanpela yangpela man nau em i Witnes, bipo em i bosim bikpela gaden spakbrus na ples bilong wokim drak koken long bikbus inap 5-pela yia na em i lusim. Em i kisim save long ol lo bilong Baibel, na kirap long bihainim, na nau em i stap amamas. Long wanpela haus kalabus, sampela kilman i givim bel tru long stadi long Baibel na ol i beten strong askim Jehova long lusim rong bilong ol bambai ol i ken kamap wokman bilong em.

Olsem na olgeta kain manmeri i bilip long tok bilong Kingdom. Long dispela rot, long Kalombia na ol narapela kantri tu, Jehova i pulimapim ol gutpela samting long haus bilong em.

[Ol Futnot]

[Blok long pes 8]

OL SAMTING BILONG KANTRI

Yia Bilong Wok Bilong 1993

HAMAS OL I AUTIM TOK: 60,854

SKELIM OLSEM: Wanpela insait long 558

HAMAS I BUNG LONG MEMORIAL: 249,271

HAMAS PAINIA, AVERES: 8,487

HAMAS BAIBEL-STADI, AVERES: 100,927

HAMAS I KISIM BAPTAIS: 5,183

HAMAS KONGRIGESEN: 751

BRENS-OFIS: FAKATATIVA

[Piksa long pes 9]

Ol wokman bilong brens-ofis na ol misineri long yia 1956

[Piksa long pes 9]

Hap bilong brens-ofis