Namba Wan Brens-Ofis i Bin Kamap Wan Handet Yia i Go Pinis

Long Disemba 15, 1884, ol i rejistaim Sosaiti Was Taua long gavman, long Pensilvenia, Amerika.a Long dispela hap ol i kamapim hetkota bilong dispela sosaiti. Bihain, long Epril 23, 1900, ol i baim hap graun bilong wokim namba wan brens-ofis long Landon, Inglan. Ol i wokim long 131 Jipsi Len, Forest Get, long Is Landon, olsem piksa hia i kamapim.

TAIM ol i kamapim dispela namba wan brens-ofis inap 100 yia i go pinis, i gat 138 Sumatin Bilong Baibel long Inglan, em nem bilong ol Witnes Bilong Jehova long dispela taim. Tupela yia bihain, long 1902, ol i kamapim namba tu brens-ofis, em long Jemani; na long 1904, ol i kamapim 2-pela brens-ofis moa long Ostrelia na Swiselan.

Long 1918, em yia Namba Wan Pait i pinis, long olgeta hap bilong graun i gat 3,868 Sumatin Bilong Baibel i putim ripot bilong wok autim tok ol i mekim. Long yia bihain ol i kamapim namba 5 brens-ofis bilong Sosaiti Was Taua​—⁠dispela ol i kamapim long Kanada. Bihain, taim wok bilong autim tok bilong Baibel i go bikpela, ol i kamapim ol nupela brens-ofis long planti kantri; insait long yia 1921 tasol ol i kamapim 6-pela.

Long 1931, taim ol Sumatin Bilong Baibel i kisim nem olsem ol Witnes Bilong Jehova, em Baibel i as bilong dispela nem, i gat 40 brens-ofis long olgeta hap. (Aisaia 43:​10-12) Insait long 3-pela yia bihain, namba bilong ol brens-ofis i go antap long 49! Long 1938 inap 59,047 Witnes i autim tok long 52 kantri, tasol long dispela taim pasin birua nogut tru i kamap pinis na i laik pasim wok Kristen bilong ol long planti kantri.

Taim ol gavman totaliterian na gavman dikteta i kamap long planti kantri na Namba Tu Pait i kirap long Septemba 1939, ol i pasim ol brens-ofis bilong ol Witnes Bilong Jehova long planti kantri. Long 1942, inap 25 tasol i wok yet. Tasol yumi kirap nogut olsem long taim bilong dispela bikpela pait nogut tru, em kain pait olsem i no bin kamap bipo, ol Witnes Bilong Jehova i wok yet long autim tok long olgeta hap na ol i kamap planti tru, winim planti narapela yia long nau.

Taim Namba Tu Pait i pinis long 1945​—⁠na planti hap bilong graun i bagarap​—⁠ol i opim gen ol brens-ofis bilong ol Witnes na ol i kamapim tu sampela nupela. Long 1946 i gat 57 brens-ofis long olgeta hap. Na hamas Witnes ol i autim tok? Inap 176,456! Dispela namba i winim moa yet namba bilong ol Witnes long 1938 (inap 300 pesen)!

Ol Brens-Ofis Bilong Pastaim i Go Bikpela

Pastaim namba wan brens-ofis bilong Sosaiti Was Taua, long Landon, Inglan, i bin stap long 131 Jipsi Len, na long 1911 ol i putim long 34 Kreven Teris​—⁠dispela hap i bikpela moa bilong ol ofis na ol ples slip i ken stap long en. Na long Epril 26, 1959, ol i dediketim nupela brens-ofis long Mil Hil, Landon. Bihain ol i kamapim sampela rum slip moa, na long 1993 ol i dediketim wanpela bikpela haus em inap olsem 18,500 skwe mita na i stap klostu​—⁠em ol ofis na haus faktori bilong wokim ol buk samting. Long dispela hap ol i wokim long olgeta yia inap olsem 90 milion Wastaua na Kirap! long 23 tok ples.

Namba tu brens-ofis bilong Sosaiti i go bikpela moa yet. Long 1923 ol i putim brens-ofis bilong Jemani i go long Magdabek. Nius Wastaua bilong Julai 15, 1923, em i namba wan nius ol i wokim long dispela hap long ol masin bilong Sosaiti yet. Insait long sampela yia, ol i baim sampela hap graun i stap klostu na wokim sampela haus moa, na ol i baim ol masin bilong pasim skin bilong ol buk na ol masin bilong wokim ol buk. Long 1933 ol lain Natsi i kisim brens-ofis, na ol i tambuim wok bilong ol Witnes, na bihain ol i salim inap olsem 2,000 Witnes i go long ol banis kalabus nogut.

Taim Namba Tu Pait i pinis long 1945, ol Witnes i kisim bek ol hap graun na haus samting long Magdabek, na ol i kamapim gen brens-ofis. Long dispela taim Magdabek i stap long Is Jemani. Tasol long Ogas 30, 1950, ol polis bilong lain Komyunis ol i kisim ol haus samting na holim ol wokman, na ol i tambuim ol Witnes long Is Jemani. Long 1947, Sosaiti i baim hap graun long Wisbaden, Wes Jemani. Insait long ol 30 yia samting bihain long dispela, ol i skruim ol nupela rum i go long ol haus ol i bin wokim long dispela hap, long wanem, ol i mas wokim planti buk na nius moa.

I no gat sampela hap graun moa bilong skruim brens-ofis long Wisbaden, olsem na long 1979 ol i baim wanpela hap graun i gat 30 hekta klostu long Seltes. Insait long 5-pela yia samting ol i wokim wanpela bikpela brens-ofis, na ol i dediketim long Epril 21, 1984. Long ol yia bihain long dispela ol i bin skruim sampela haus moa, na nau winim 1,000 brata sista ol i wok na slip long dispela hap. Long olgeta mun ol i wokim olsem 16 milion nius long 30 tok ples samting long ol bikpela masin bilong prinim ol buk samting long Seltes; na i no longtaim i go pinis long wanpela yia ol masin bilong pasim skin bilong ol buk i kamapim olsem 18 milion buk na Baibel.

Sampela Bikpela Brens-Ofis Moa Bilong Prinim Ol Buk

Long 1927 ol i kamapim namba wan brens-ofis bilong Japan long Kobe, tasol long taim bilong Namba Tu Pait ol birua i mekim nogut tru long ol Witnes na dispela i pasim sampela wok bilong ol. Tasol taim pait i pinis, bihain liklik ol i kamapim gen brens-ofis​—⁠ol i kamapim long Tokyo. Taim i no gat sampela hap graun moa bilong skruim brens-ofis long dispela hap, ol i wokim nupela brens-ofis long Numasu. Ol i dediketim long 1973. Insait long liklik taim dispela brens-ofis i liklik tumas, olsem na ol i wokim nupela bikpela brens-ofis long Ebina, na ol i dediketim long 1982. Long 1998 ol i pinisim sampela nupela haus moa long dispela hap, na inap 900 wokman i ken slip long en. Long 1999, long tok ples Japan tasol ol i wokim olsem 94 milion nius Wastaua na Kirap!, na ol i prinim tu planti milion buk.

Long planti kantri ol brens-ofis i go bikpela olsem long Japan. Long 1929, ol i kamapim wanpela brens-ofis long Meksiko Siti, long Meksiko. Bihain, taim namba bilong ol Witnes i go antap long 60,000, ol i wokim wanpela nupela bikpela brens-ofis ausait long taun. Ol i dediketim dispela brens-ofis long 1974, na long 1985 na 1989 ol i skruim sampela haus moa long en. I no longtaim na ol bai pinisim wanpela nupela bikpela haus faktori bilong prinim ol buk na haus slip. Olsem na klostu nau inap olsem 1,200 wokman i ken stap long dispela brens-ofis bilong Meksiko. Long nau brens-ofis i save wokim ol nius na buk bilong 500,000 Witnes na planti milion manmeri moa long Meksiko, na bilong planti manmeri i sindaun klostu long dispela kantri.

Long 1923 ol i kamapim wanpela brens-ofis long Rio de Janero, Brasil, na bihain ol i wokim sampela gutpela haus slip long dispela hap. Tasol Sau Paulo em ples bilong ol wok bisnis na ples bilong salim ol samting i go long ol narapela hap, olsem na long 1968 ol i wokim nupela brens-ofis long dispela taun. Long 1975 samting, i gat olsem 100,000 Witnes long Brasil. Tasol ol i no inap skruim brens-ofis i go bikpela moa long Sau Paulo, olsem na ol i baim wanpela hap graun i gat 115 hekta long Sesaryu Lanse, em inap olsem 150 kilomita longwe long Sau Paulo. Long Mas 21, 1981, ol i dediketim brens-ofis long dispela nupela ples. Bihain ol i skruim dispela brens-ofis, olsem na inap 1,200 manmeri i ken sindaun long en. Ol i wokim ol nius na buk long Brasil bilong salim i go long klostu olgeta hap bilong Saut Amerika na long sampela narapela hap bilong graun.

Long 1992, klostu long Bogota, Kalombia, ol i wokim narapela bikpela brens-ofis i gat haus faktori bilong wokim ol buk na nius. Long dispela hap ol i wokim nius Wastaua na Kirap! bilong salim i go long planti hap long not-wes bilong Saut Amerika.

Sampela narapela brens-ofis i prinim planti milion nius long olgeta yia ol i stap long Ajentina, Filipin, Finlan, Itali, Kanada, Korea, Naijiria, Ostrelia, Saut Afrika, na Spen. Na long olgeta yia brens-ofis bilong Itali i wokim planti milion buk na Baibel long planti tok ples. Tasol planti buk na nius em Sosaiti i wokim long olgeta yia​—⁠winim 40 milion buk na wan bilion nius​—⁠ol i prinim yet long hetkota bilong Sosaiti Was Taua long Bruklin, Nu Yok, na long haus faktori bilong ol i stap long hap not bilong Nu Yok.

Man! Em gutpela samting tru! Inap wan handet yia i go pinis i gat wanpela brens-ofis tasol, na nau i gat 109 brens-ofis bilong helpim wok bilong ol Witnes Bilong Jehova long 234 kantri. Na inap olsem 13,000 Kristen i dediket pinis ol i mekim wok volantia long ol dispela brens-ofis! Yumi save, wok bilong ol na wok bilong ol 5,500 volantia long hetkota bilong Sosaiti em i bikpela samting bilong truim tok profet bilong Jisas Krais olsem ol bai ‘autim dispela gutnius bilong kingdom bilong God long olgeta hap bilong graun, na bihain tasol bai las de i kamap.’​—⁠Matyu 24:⁠14.

[Futnot]

[Piksa long pes 25]

Tom Hart, ol i ting em i namba wan Sumatin Bilong Baibel long Inglan

[Ol Piksa long pes 26]

Brens-ofis bilong Landon long 34 Kreven Teris (long poto long han sut)

[Ol Piksa long pes 26]

Haus na faktori nau ol i mekim wok long en long Landon